18
Katonda mukologho
1Musengwa oyo omulamu ebyanda n’ebyanda, n’eyatonda ebintu byonabyona. 2Oyo ni yenka omutuufu, [ezirayo wundi kabiri. 3Atereeza ensi n’engalo dhe, buli kintu kyamuwulira. Oyo ni Kyabazinga w’ebintu byonabyona, era obuyinza bwe n’obwawula ebitukuvu ku bitali bitukuvu.18:3: Mu bighandiiko ebindi obunhiriri obwo 2b-3 bulimu, aye mu bindi buziramu.] 4Naani ye yaali aghaireku obukumu obw’okulangirira bye yakola? Era naani asobola okunoonenkereza ku by’amaani bye yakola. 5Naani asobola okupima obuyinza bwe obw’ekitiisa? Naani asobola okuloodha n’amalayo ekisa ky’ali nakyo? 6Tikisoboka ebyo kubikendeezaaku waire okubyongeraku. Era tikisoboka kunoonenkereza byewuunhio bya Musengwa kubimalayo, 7kuba omuntu aja yaadhuuba ati abimazeeyo okubiroodha, aye ate yaaba ng’ali kutoolera butoolere, era bw’amala asoberwa busoberwe.
Omuntu aziraku bw’ali
8Omuntu katyo ni ki, era mugaso ki gw’ali nagwo? Obulungi bwe n’obubi bwe buli gha? 9Bw’agheza emyaka ekikumi egy’obukulu, olwo aba aghangaire inho. 10Aye egyo bw’ogigeza ku myaka egy’ebyanda n’ebyanda, giba ng’oti itondo butondo ery’amaadhi erigwa mu nhandha, oba ng’oti n’akapeke akalala ak’omusenho. 11Kale Musengwa kyava n’aguminkiriza abantu, era n’abagemerwa ekisa ekingi. 12Abalingirira yaabona enkomerero yaibwe nga bw’eidha okuba embi, kale yaabasonigha ekibitiriire. 13Omuntu asaasira mwine y’aidhi, aye Katonda asaasira ebiramu byonabyona. Abikangaivula, yaabigalagira, yaabyegeresa era yaabiiza y’ali ng’omwayi bw’ayaya entaama dhe. 14Asaasira abo abaganha abagalagire, era ni bafaayo einho ng’abaneniiza.
Okuba n’ekisa era n’okugaba
15Mwana wange, bw’obanga ng’oyamba omuntu otatangaku na kumulangira. Bw’oghanga omuntu ekirabo, otamalanga n’omukoba ebimuleetera okunakughala. 16Omusulo bwe gugwa tiguwoleezaaku ku lwota lwa ndoboozi? Kale ni ekyo ky’oyogera kyona, kityo bwe kiwula ky’ogaba. 17Bwenebwene ekibono eky’ekisa tikiwula kirabo ni bwekiba ekirungi kitya? Era mu butuufu omuntu omulungi ebyo byombi aba nabyo. 18Omusiru taba na mpisa era aba muvumagani. N’ekirabo ky’agaba nga tikyakyeyendere, amaiso tigakyesumba naire.
Okwekebera
19Osookanga kwekakasa oba nga ky’oja okwogeraku okiidhi bukalamu, era olabiriranga obulamu bwo ng’okaali kulwala. 20Weekeberenga mwene mu mwoyo nga Musengwa akaali kukusalira musango, olwo ekiseera ekyo bwe kirituuka alikusonigha. 21Weewombeekenga ng’obulwaire bukaali kukukuba ku ndiri. Era bw’ogwanga mu kibi weenenianga waakyuka waira ye Musengwa. 22Bwe weeyamanga ekintu ye Musengwa, okituukirizanga mangu. Otakirindirizanga kutuusa ng’oli kumpi kufa. 23Aye ng’okaali kweyama, omalanga kwetegeka okakase ng’onaakituukiriza, olobe kuba ng’omuntu ali kuleba obulebe Musengwa. 24Lowoozanga ku bw’alikusungughalira ku lunaku lw’olifa. Era olowoozenga ku bw’alikulekulira agho ku lunaku lw’alikwesasuulizaaku ng’akubonereza. 25Bw’obanga mu biseera eby’omwero lowoozanga ku biseera eby’endhala. Era bw’obanga omukombe olowoozenga ku biseera eby’obwavu n’obwetaavu. 26Buli kiseera ebintu biba biri kukyuka okuva enkyo okutuuka eigulo, byonabyona byabitagho mangu inho mu maiso ga Musengwa. 27Omuntu omugezi yeegendereza mu byonabyona by’akola, era ekibi bwe kiseeta gh’ali, yeekuuma alobe kwonoona. 28Omuntu omutegeevu amanha amagezi, era yaasaaka oyo yeenayeena azuula ghe gali. 29Abo abategeera eby’amagezi ebyogerwa, boona bafuuka bagezi baakoba ensambo edh’amakulu.
Okwefuga
30Otatwalirizibwanga kwegomba kwo okubi, era fuganga amairu go. 31Bw’oganha okutwalirizibwa okwegomba okubi, ekyo kirikuleetera okusekererwa abazigu bo. 32Oteemaliranga mu bulamu bwa kudiibuula na kwesanhusa, kuba bulikwavughaza waawaamu. 33Oteewolanga n’okola mbaga aye ng’ozira mpiiya dhikumala, kuba ekyo kirikuleetera okufuuka asabiriza.