16
Ekibonerezo Katonda ky’agha aboonooni
1Oteegombanga kuba na baana kamaala abazira kye bagasa. Era otasanhukanga lwa kuba na baana, aye nga tibatya Katonda. 2Otasanhukanga ni bw’obanga ng’oli na bangi inho, okutoolaku nga batya Katonda. 3Otadhuubanga oti balighangaala oba okubeesigulirangaku olw’okuba kamaala einho, kuba omwana ni bw’aba omulala ati aye ng’atya Katonda, awula abaana olukumi abatamutya. Era okufa ng’oziraku mwana, kiba kirungi okusinga okuba n’abaana abatatya Katonda. 4Ekibuga kisobola okweyongeramu abantu baakiidhuza, olw’omuntu omulala ali n’okutegeera. Aye ate ekibuga ekyo kisobola okufuuka ebifulukwa kyawolongera, olw’ekika ekiramba eky’abantu abatatya Katonda. 5Mboine bingi ebiri ng’oti n’ebyo, era naawulira ebyewuninkiriza okusingaku n’ebyo. 6Obusungu bwa Musengwa bulitumbuka ng’oti muliro ku boonooni nga beesoloiza, era ekiruyi kye kirikunaana mu ighanga ery’abadheemu eryo. 716:7: Mainh 6:4; Mag 14:6Ate oba Katonda oyo tiyasaasira bantu bawaigufu ab’eira abaamudheemera, nga beesiga amaani gaibwe. 8Yeesinwa abantu Loti be yabangamu olw’okwekuluntaza kwaibwe, era yaaloba kubasaasira naire. 9Tiyagemerwa kivunika ighanga, lye yasalagho okuzikiriza olw’ebibi byalyo, 10oba okugemerwa ekivunika abantu emitwalo enkaaga (600,000) abaali mu lugendo nga bali kutambula mu irungu, ni bamala beesoloza okumudheemera olw’empwitu. 11Ni bwekyandibaire nga muntu mulala yenka n’eyadheema, bwona era kyandibaire kyewuunhio omuntu oyo obutabonerezebwa, kuba waire Musengwa asaasira abantu aye era abasungughalira. Asobola okusoniyira irala era n’okubonerekeza irala. 12Y’akoma okuba n’ekisa ekingi, y’akoma n’okubonereza einho. Asalira abantu omusango ng’ajiira ku bikolwa byaibwe. 13Omwonooni talinhaga kintu n’akitwala ni batamugema. N’obuguminkiriza bw’abo abatya Katonda tibuliroba kusasulwa Katonda oyo. 14Kiisi akola eby’ekisa, Katonda alimusasulamu yaafuna empeera emujaamu. 15[Musengwa yaaleetera kyabazinga wa Misiri okuba n’empwitu, yaaloba okumwatula nga ni Musengwa. Ekyo yakikola ensi etegeere Musengwa oyo by’akola. 16Ebitonde bye byonabyona abyoleka ekisa kye, era yayawula obutangaavu n’enzikiiza ng’akozesa omugugha ogupima.16:16: Mu bighandiiko ebindi obunhiriri obwo 15-16 bulimu, aye mu bindi buziramu.]
17Otakobanga oti: “Musengwa ndimwekwekaku. Mu igulu eyo naani alindidhukira? Naani alimbona mu bantu kamaala batyo? Obwo nze ninze ani mu lukunkumuli olw’ebitonde olwaga agho? 18Bona eno, bw’aliidha, eigulu lyene era n’eigulu lire erisingayo okuba ghaigulu, n’ensi, ni ghansi mu lwina olutakoma, byonabyona biritengeeta. 19Bw’aliringa obulinge ku nsozi ni ku misingi gy’ensi, biridhugumira. 20Musengwa talindidhukira. Naani alifaayo ku bye nkola? 21Bwenkola ebibi ghazira ambona. Bwentaba mwesigwa mu kyama naani asobola okumanha?16:21: Mu Luheburayi bityo bwe byaghandiikibwa nga bwe biri eitale Aye mu Lugureki byaghandiikibwa biti: 20 Kino kiswikiriire inho amagezi g’omuntu. Ghazira muntu asobola kutegeera nkola ye. 21 Nga kiwunga bw’aidha n’azindula obuzindule nga ghazira muntu ali kumubona, n’ebyo Katonda by’akola bityo bwe bitamanhiibwa. 22Ni bwenkola ebirungi naani alimanhisa Musengwa bye nkola? Era naani aliba agho mbu amuteegerere? Mbona alwagho inho okutuukiriza by’aba alagaaniiza okukola.” 23Omuntu aziramu magezi na kategeera era ow’ebidhuubo ebyadaaliima, ni yenka asobola okulowooza ebintu ng’ebyo.
Amagezi ga Katonda gabonekera mu bitonde
24Mwana wange, wulirisa bukalamu bye ndi kukoba, oidha kufuna amagezi. 25Ndidha kukwinhonhola bukalamu, nkwegerese amagezi geene.
26Okuviira irala mu mainhama, Musengwa yatonda ebintu byonabyona,
buli kintu yaakigha ekifo kyakyo.
27Yabitaanha yaabita mu bifo byabyo ebyanda n’ebyanda,
nga biri n’okubanga bityo ense n’ense.
Endhala tebiruma era tibiwaamu maani,
waire okulekeraku okukola mirimo gyabyo.
28Ezira kingira mu kifo kya kiinaakyo,
era tibimudheemera naire.
29Musengwa bwe yamala okukola ebintu ebyo yaalingirira ensi,
yaagiidhuza ebirungi bye.
30Yaagiidhuza ebitonde ebya buli nsambo
ebimala ni biirayo mu itaka omwo.