15
1Bw’otya Musengwa ekyo ky’olikola, era bw’ogema Amateeka ge olifuna amagezi. 2Amagezi ago galiidha gaakusangaaza, ng’oti ni maama wo bwe yandikusangaaziiza. Oba ng’oti n’omugole ye waakafumbirwa bwe yandikusangaaziiza. 3Galikugha okumanha n’okutegeera, ng’oti gali kukugha bya kulya na bya kunhwa. 4Bw’oligeesiiraku toligwa, era bw’oligeesiga toliswazibwa. 5Galikuleetera okuba ow’ekitiisa okuwula baino boonaboona, era gaakuleetera okukozesa ebibono ebituufu mu bantu abeesoloiza. 6Galikuleetera okusangaala era gaakuvaaza okusagamba ng’engule. Waafuna eriina lye banaidhukiranga ebyanda n’ebyanda. 7Abasirusiru tibalifuna ku magezi ago, waire aboonooni okugabonaku obubone. 8Abo abeekuluntaza gabeesamba, era gaaloba kwingira mu bidhuubo bya baguya. 9Omwonooni tagwanira kwemba lwembo lwa kusaaka, kuba Musengwa tasobola kuba nga n’amuleeteire okulwemba. 10Olwembo olw’okusaaka luli n’okwoleka amagezi agali mu oyo ali kulwemba, era Musengwa n’amusobozesa okukola ekyo.
Omuntu alondagho eky’okukola kyeyendere
1115:11-20: Sir 17:1-12Otakobanga oti: “Musengwa n’eyandeetera okuva ku kituufu kye nali ngwaine okukola”, kuba Musengwa oyo tasobola kukukozesa kintu mwene ky’akyagha. 12Otakobanga oti: “Musengwa n’eyandeetera okudaaliima”, kuba Musengwa oyo tiyeetaaga buyambi bwa boonooni okutuukiriza ky’ayenda. 13Musengwa akyagha ebibi byonabyona, n’abo abamutya boona tibabyenderaku irala naire. 14Musengwa oyo n’eyatonda omuntu mu kwinhama, yaamulekera okulondangagho eky’okukola kyeyendere. 15Osobola okusalagho okugema ebiragiro bye, era mwene iwe niiwe osalagho ku lulwo okuba oba obutaba mwesigwa y’ali. 16Yakuleetera omuliro n’amaadhi mu maiso go. Kale golola omukono otooleku ky’oyenda ku ebyo. 17Oli n’ebintu bibiri agho mu maiso go, obulamu oba okufa, era ky’olondaku ku ebyo n’ekikugheebwa. 18Amagezi ga Musengwa mangi inho. Ali n’obuyinza obutaloodheka, era abona buli kintu. 19Alabirira abo abamutya, era aidhi bukalamu buli muntu ky’akola. 20Katonda talagirangaku muntu yeenayeena butamutya, oba okuganha omuntu waire omulala okukola ebibi.