14
1Wa nkabi oyo atamala gagwa na bibono nga tamaze kwetegereza, era awulira mule ng’azira musango gumuliku lwa kibi. 2Wa nkabi oyo atawulira mule ng’omwoyo gwe ghaligho kye gumulumiriza, era atawaamu isuubi.
Okukozesa obulungi obukombe
3Omuntu eyeerowoozaaku yenka tagwaniire kuba mukombe. N’omukodo yeena kiki ky’agasibwa mu kukombaghala? 4Omuntu bw’afuna eby’obukombe n’abyebbuutaku, aye nga mwene yeerumya aghazira kubikozesa kwesanhusaaku, aba ali kubisololeza bandi abalibyetwalira ni baba mu bulamu obw’okwedhalabya. 5Omuntu bwe yeekodoghalira mwene n’ateesanhusaaku na bukombe bwe naire, olwo alisobola atya okuba omugabi eri omuntu owundi yeenayeena? 6Omuntu eyeekodoghalira mwene, ezirayo muntu wundi amuwula kuba mubi. Era ekibi ekyo ky’akola eky’okwerumya mwene, n’ekimuleetera okubonerezebwa. 7Ni bw’akola ekirungi, takikola kyeyendere. Era ku nkomerero obukodo bwe bumala bwamuseegha nga bweyoleike. 8Omuntu eyeerowoozaaku yenka aba mubi, kuba tafa ku bantu bandi naire, aye abanhooma bunhoome. 9Omuntu ow’omuwuudu ezira mugabo gumumala. Okululunkanira ebintu kw’aba nakwo kumuleetera okuseenena omwoyo. 10Ku meeza y’omukodo tikubaaku kaliibwa naire, aye alinganga ku mere ya bantu bandi.
11Mwana wange, weerabirirenga bukalamu ng’ojiira ku busobozi bw’oli nabwo, era oghengayo ye Musengwa ebigheebwayo ebimugwaniire. 12Idhukira nga luliba lulala okufa kwakwidhira, era nga bakaali kukukobera lunaku lw’olingira magombe. 13Koleranga bakagwa bo ebirungi ng’okaali kufa, obenga mugabi ye bali nga bw’osobola. 14Oteesubyanga lunaku lwa kusanhukaku, era otalekanga kintu kirungi ekigwaniire kukubitaku bubite. 15Olowooza oti bye wakolerera tolibirekera bandi, ebyo bye wafaabiikanira ni bigabibwa nga bikubirwa bwa bululu? 16Kale gabanga, aye nga weena otoola abandi bye bakugha waasanhukaku; kuba e magombe tolyagaanayo masanhu. 17Kiisi kiramu kyonakyona kikairigha ng’oti kivaalo, era eiteeka ery’eira likoba liti: “Tuteekwa buteekwe okufa.” 18Abantu bali ng’oti makaba ku muti omukologho omuzibirivu; agandi gakunkumuka, ate agandi gaasibuka. N’abantu boona batyo: abandi bafa, ate abandi baazaalibwa. 19Buli kintu ekikolebwa omuntu kirivunda kyaweekereragho. N’oyo akikola yeena alivunda yaweekereragho.
Eisanhu eriva mu kuba n’amagezi
2014:20-25: Nsa 8:32-35Wa nkabi oyo eyeefumintiriza amagezi bye gakoba, era n’asengeka by’akola ng’alimu okutegeera. 21Ole bw’akenkuka mu magezi n’engeri dhaago, ategeera n’ebyama byago. 22Ja obingirire amagezi ng’omuyiizi bw’abinga ensolo, obwame mu ngira yaago ogeeteege. 23Lengeza mu madinisa gaago, owulirise ni ku miryango gyago. 24Simba weema yo kumpi n’endhu yaago, okomerere ebikondo by’eweema eyo gha bimante by’endhu yaago. 25Bw’onaasimba weema yo okumpi n’endhu yaago, oidha kuba ng’oli mu kifo ekirungi einho. 26Olita abaana bo ghansi mu kinsense kyago, era waazimba omwo amaka go. 27Galibakingiriza baawona okwokya kw’akasana, n’ekitiisa kyago kyabeezungulula.