13
1Bw’ogema ku koolaasi akufuutuusa. Era bw’obita n’abantu abeekuluntaza, weena ofuuka ng’oti ni beene. 2Otabbeedanga kintu kizito ekiswikiriire amaani go, era weesambenga abantu abakusinga obukumu n’obukombe. Osobola okuta entamu ey’eitosi kumpi n’ey’ekyuma? Busa naire, kuba ey’eitosi bwe yeekonta ku y’ekyuma, emenheka bumenheke. 3Omukombe bw’akola ensobi, ayongeraku n’okuvuma. Aye omwavu bwebamukolaku ekibi, mwene ateekwa okwetondera abamukozeeku ekibi. 4Omukombe asigala ng’akaakukozesa kasita aba ng’ali kukufunamu, aye bweghabaagho ky’omwetaagaku akulekulira bw’agho. 5Aba ghalala n’iwe kasita oba ng’oliku ebibyo by’oli nabyo, aye bw’amala okubikumalaku ng’olwo takaakufaaku naire. 6Bw’aba nga ghaligho ky’akwendaku akusendasenda, yaakwesekezasekezaaku, yaakuleetera okuba ni ky’omusuubiramu. Akwebuuzisabuuzisa n’ekisa nga yeekoza ati: “Oliku ni kye weetaaga?” 7Akugha eby’okulya byakusemba ni ku mwoyo, waaswala n’okuswala. Agho yaakukamula emikuzi ebiri oba esatu yaakumalaku ebibyo, era bw’amala yaakusekerera. Bw’akubonaku nga ghabiseeghooku ekiseera, takufaaku era atengeesa bwa mutwe okulaga nga takwidhi naire.
8Weegenderezenga olobe kubuzibwabuzibwa, kuba osobala okuba ng’oli mu masanhu gaakuleetera okugwa waaswala. 9Omukombe bw’akwetanga ewuwe ku bugeni, weefuganga. Olwo alikweta ni ku mikuzi egindi. 10Otamweseeterezangaku inho, kuba asobola okukusindika ere. Aye era otamwesambanga inho, kuba aghanga okukwerabirira irala. 11Otamwegezangaku ng’oti oyagayaga naye, waire okwesiganga ebibono kamaala by’ayogera, kuba mu bingi by’ayogera aba ali kukuleba, era ni bw’akusekera aba ali kukukemenkereza.
12Omuntu bw’omukobera eby’omunda aye n’atabikuuma nga bya kyama, oyo aba azira kisa naire era talwa kukukolaku kabi oba okukusibya mu ikomera. 13[Kuumanga ebyama byo iwe mwene era weegenderezenga, kuba oli mu kabi ekiseera kyonakyona.13:13: Ebighandiiko ebindi byongerezaaku obunhiriri 13b-14: Bw’owuliranga kino ng’oli mu ndoolo, ozuukanga!] 14Era ogonzanga Musengwa wo obulamu bwo bwonabwona, waamweghembanga akutoole mu buzibu.
15Kiisi kitonde kigonza kitonde kiinaakyo nga bwe bifaanana. N’abantu boona batyo bwe bakola. 16Ebiramu byonabyona bijiira ghalala ni biinaabyo nga bwe bifaanana. N’abantu boona baba ghalala n’abo nga bwe bafaanana. 17Oba nga omusege n’entaama ento tibiisania, obwo butya omwonooni bw’aisania n’ole atya Katonda? 18Oba nga empiti n’embwa tibiba ghalala mu miraala, obwo butya omukombe bw’anaaba aghalala n’omwavu? 19Ng’empologoma bw’eyiiga endogoyi ey’omu nsiko ng’omuyiigo gwayo, n’omukombe atyo bw’ayiiga omwavu okumukuunhia. 20Ng’omuntu eyeekuluntaza bw’abona ole omuwombeefu ng’oti bwa kyenhinhalwa, n’omukombe atyo bw’abona omwavu. 21Omukombe bwe yeekontola obwekontole, bakagwa be bamugemerera obutagwa. Aye omwavu bw’agwa, ni bakagwa be beene bamusindika bw’ere. 22Omukombe bw’agwa mu nsobi, afuna abamuwolereza kamaala. Ni bw’ayogera ebitali bikalamu, bamusemba busembe. Aye omwavu bw’agwa mu nsobi, bamuvuma n’okumuvuma. Ni bw’ayogera eby’amakulu tibamuwulirisa naire. 23Omukombe bw’ayogera, boonaboona basirika be kye! Era bagulumiza by’ayogeire okubituusa ni ku bire. Aye omwavu bw’ayogera, bakoba bati: “Oyo naani?” Era bw’asobyamuuku bamusindika, baamutyamya ni ghansi.
24Okuba omukombe kirungi, kasita oba nga tiwakombaghala ng’obita mu kukola bibi. N’okuba omwavu, abo abatatya Katonda n’abalowooza bati omuntu aba yakola ekibi. 25Mu mwoyo gw’omuntu n’omuviira omuntu oyo okuboneka mu maiso nga musangaavu, oba nga munakughavu. 26Omusangaavu mu mwoyo, ni mu maiso amoga isanhu. Aye okuyiiya ensambo kyetaagisa okwerumya einho ng’olowooza.