10
1Omufuzi omugezi asomesa abantu be, era obufuzi obw’omuntu ategeera ng’oti n’oyo buba busengeke bukalamu. 2Omufuzi nga bw’aba, n’abakungu be boona batyo bwe baba, era n’abantu b’afuga boona batyo. 3Kyabazinga atafugisa magezi aleetera abantu be okuzikirira. Aye obufuzi bwe bubaamu abakulembeze abagezi bukulankulana. 4Musengwa ni mwene bufuzi obw’oku nsi, era n’ataagho omufuzi omutuufu mu biseera ebituufu. 5Musengwa n’aleetera abantu okutuukiriza entegeka dhebakola, era n’aleetera n’omufuzi okwisibwamu ekitiisa.
Okwekuluntaza
6Otasungughaliranga mwino mu buli nsobi y’akoze, era otakolanga kintu kyonakyona na bunhoomi. 7Musengwa akyagha okwekuluntaza n’obutakolera ku mazima, era n’abantu boona babikyagha. 8Okwekuluntaza, n’obutakolera ku mazima, era n’okululunkanira eby’obukombe, bireetera obufuzi okuva ku bantu abandi bwatwalibwa abandi. 9Lwaki twekuluntaza nga tuli ivu buvu na nkungu bukungu? Emibiri gyaife givunda nga tukaali na balamu. 10Obulwaire obutawona busobera omuyigha. Kyabazinga asobola okuba omulamu olwaleero, olwaidho yaafa. 11Omuntu bw’amala okufa, aba asigaliire kufuna bisiisa, nsowera na nhengere, ng’omugabo gwe.
12Omuntu bwe yeetoola ku Musengwa, atoolera okwekuluntaza olwo yaaleetera omwoyo gwe okuva ku oyo Eyamutonda. 13Okwekuluntaza n’ensimuko y’ebibi byonabyona. Era omuntu eyeekalangulira ku kwekuluntaza, akola byenhinhalwa byereere. Musengwa kyeyava n’abonereza einho abantu abandi, era n’abazikiriza okubamaliragho irala. 1410:14: 1 Sam 2:8; Luk 1:52Musengwa yatoola bakyabazinga ku bityamo byaibwe oby’obwakyabazinga yaabasuula ghansi. Yaamala yaabityamyaku abo abeisa ghansi. 15Musengwa yaiwululagho amaghanga amalambirira n’emizi gyago, mu kifo kyago yaizaamu amawombeefu. 16Musengwa yatoola amaghanga mu buyinza, yaagazikiriza okugamaliragho irala n’emisingi gyago. 17Agandi yagatoola mu buyinza yaagazikiriza, olwo gaazima nga tibakaagaidhukira nga gaalighooku ku nsi naire. 18Katonda tiyatondera bantu kwekuluntaza, waire okukola ebikolwa eby’obukambwe.
Abagwaniire okugheebwa ekitiisa
19Naani agwaniire okugheebwa ekitiisa? Abantu abatya Musengwa n’abagwaniire. Ate naani atagwaniire kugheebwa kitiisa? Abantu abadheemera ebiragiro bya Musengwa n’abatagwaniire. 20Omukulembeze agwaniire okugheebwa ekitiisa abo b’akulembera. Ni Musengwa yeena agha ekitiisa abo abamutya. 21[Omuntu okusobola okughangula mu by’akola, asooka na kutya Musengwa. Aye okulemwa kuva ku mpwitu na kwekuluntaza.10:21: Mu bighandiiko ebindi mulimu akanhiriri ako 21, aye mu bindi kaziramu.]
22Abakombe n’ab’ebitiibwa n’abaavu, boonaboona beenhumiririza mu kutya Musengwa. 23Ti kituufu kunhooma muntu mwavu nga mugezi, era ti kituufu kugha mwonooni kitiisa. 24Abantu bagha abakungu n’abalamuzi n’abafuzi ekitiisa, aye ku abo boonaboona ghazira awula muntu atya Musengwa bukologho. 25Abatali bairu baligheereza omwiru omugezi, era bwe baliba nga bategeevu tibalyemuluguunhia.
Obuwombeefu era n’okwetaamu ekinhagansi mwene
26Bw’obanga ng’okola emirimo gyo, oteeraganga nga bw’oli omugezi. Era bw’obanga mu buzibu, otaleeteranga bantu kulowooza bati oli bukalamu nga weesuuta. 27Omuntu eyeekolera n’afuna ebintu kamaala ebisinga ni bye yeetaaga, awula ole aja nga yeesuutasuuta aye ng’azira na kya kulya.
28Mwana wange, kuumanga ekitiibwa kyo ng’oli muwombeefu, era weetengamu ekinhagansi ekikugwaniire. 29Naani atoola omuntu eyeekola ebibi, n’amweta omulungi? Era naani agha omuntu ekitiisa, ate nga omuntu oyo yeedheeguula? 30Omwavu bamugha ekitiisa lwa magezi ge, ate omukombe baakimugha olw’obukombe bwe. 31Oba nga omuntu bamugha ekitiisa nga mwavu, memale bw’akombaghala? Era oba omuntu bamunhooma nga mukombe, memale bw’ayavughala?