9
Katonda n’abantu be abalonde
1Ndhogera mazima mu Kurisito tiguya, era n’omwoyo gwange gundhulira mu Mwoyo Mutukuvu. 2Ndi n’enaku nnene n’okulumwa kunene mu mwoyo gwange. 3Kuba kasinga nze mwene Kurisito yandiinaamye olwa baganda bange, ab’eighanga eirala ninze. 4Bano n’Abaisiraeli abaafuna omukisa okufuuka abaana ba Katonda, ni bagabana ku kitiisa kye, n’akola nabo endagaano, n’abagha Amateeka, n’ensambo ey’okusinzangamu, era n’ebisuubizo.9:4: Kuv 4:22 5Abo ni beene badhaadha abakulu era beene ighanga omwava Kurisito ng’omuntu, Katonda afuga byonabyona asaakibwe ebyanda n’ebyanda. Amiina.
6Kino tikitegeeza nti ebisuubizo bya Katonda byalemwa okutuukirizibwa, kuba Abaisiraeli boonaboona ti n’abantu ba Katonda abalonde. 7Waire baidhukulu ba Aburahamu boonaboona, ti n’abaana ba Katonda, aye nga bwe kyaghandiikibwa kiti: “Mu Isaaka n’omuliva abalyetebwa baidhukulu bo.”9:7: Mainh 21:12 8Kino kitegeeza nti abaana abazaalibwa mu mubiri ti n’abaana ba Katonda, aye abo abazaalibwa olw’okusuubiza kwa Katonda n’abatwalibwa okuba baidhukulu ba Aburahamu abatuufu. 9Kuba ekisuubizo kya Katonda kyakoba kiti: “Mu biseera oti ni bino ndiira era Sara aliba aliku omwana omulenzi.”9:9: Mainh 18:10
10Era ti n’ekyo kyonka, kuba abaana ba Rebekka bombi, baali ni Iseibwe mulala, Isaaka dhaadha waife. 11Waire baali nga bakaali na kuzaalibwa era nga bakaali na kukolaku kibi oba kikalamu, aye olw’okutuukiriza entegeka ya Katonda ey’okulondaku omwana omulala, nga tajiira ku bikolwa aye nga ajiira ku kweta kwe mwene, 12yaakoba Rebekka ati: “Omukulu aligheereza omuto.”
Kino kyali kityo okukakasa nti Katonda alonda y’aba ayese nga tajiira ku bikolwa bya bantu.9:12: Mainh 25:23 13Kuba kyaghandiikibwa kiti: “Nagonza Yakobo aye naakyagha Esau.”9:13: Mal 1:2-3
14Kale tunaakoba tutya? Tuti Katonda asaliriza? Busa naire 15kuba yakoba Musa ati: “Ndisaasira oyo ye nsaasira, ndigemerwa ekivunika oyo ye ngemerwa ekivunika.”9:15: Kuv 33:19
16Kale Katonda tajiira ku muntu by’ayenda oba by’akola, aye ku kusaasira kwe mwene kwonka. 17Ebyaghandiikibwa bikoba Farao biti: “Nakufuula omukulu, mu iwe obukumu bwange bwolekebwe era eriina lyange limanhibwe mu nsi yoonayoona.”9:17: Kuv 9:16
18Kale ni Katonda asaasira oyo y’aba ayenze okusaasira era yaakalangusa omwoyo gw’oyo y’aba ayenze okukalangusa.
Obusungu bwa Katonda era n’ekisa kye
19Agho mwidha kunkoba muti, oba nga kiri kityo, lwaki Katonda anenia omuntu? Naani asobola okulobera Katonda ky’ayenda? 209:20: Isa 29:16; 45:9; Mag 12:12 Aye iwe omuntu niiwe ani atakania Katonda? Ekiwumbe kisobola okukoba eyakiwumba kiti: “Lwaki wampumba oti?” 219:21: Mag 15:7; Sir 33:13 Omuwumbi ti wa idembe okukola ky’ayenda mu itosi? Tasobola kutoola ku itosi eirala eryo, erindi n’aliwumbamu ekibya eky’ebbeeyi, n’erindi n’aliwumbamu ekibya ekyabuliidho?
22N’ekyo Katonda kye yakola kifaananaku ni kino. Yayenda okwoleka obusungu bwe n’okumanhisa obukumu bwe. Kyeyava n’aguminkiriza einho abo be yasungughalira abaali bateegereire okuzikirira. 23Era yayenda okwoleka ekitiisa kye ekinene einho y’abo be yagemerwa ekisa, abo be yategekera ekitiisa okuva eira n’eira. 24Kuba niife be yayeta, ti kuva mu Bayudaaya mwonka aye n’okuva mu bamaghanga agandi, 25nga bw’akoba mu kitabo kya Hosea ati:9:25: Hos 2:23
“Abantu abataali bange
ndibeeta ‘Abantu bange.’
Ye nali tigonza,
ndimweta ‘Mukagwa wange.’
26Mu kifo gheene ghe bayeterwa ‘Abatali bange’,9:26: Hos 1:10
agho gheene ghe balyeterwa abaana ba Katonda omulamu.”
27Isaia yeena yalangirira ku Isiraeli ati: “Abantu ba Isiraeli ni bwe balyaga omusenho ogw’enhandha obungi, aye batono bati abaliwonagho ni balokolebwa9:27-28: Isa 10:22-23 28kuba Musengwa taliroba kutuukiriza mangu kye yakoba okukola ku nsi.” 29Kiri nga Isaia bwe yalanga ati: “Nguli Musengwa Afuga Amagye tiyatulekeragho izaire, twandibaire ng’oti n’ab’e Sodoma, era twafaanana ng’oti n’ab’e Gomorra.”
Paulo asabira Isiraeli
30Kale tunaakoba tutya? Ka tukobe tuti abamaghanga agandi abataakolerera butuukirivu, baafuna obutuukirivu obuva mu kwikiriza. 31Aye ng’Abaisiraeli abaanoonia obutuukirivu obujiira ku Mateeka, tibaasobola kutuukiriza Mateeka ago. 32Lwaki? Kuba tibaabunoonia nga bajiira ku kwikiriza, aye nga bajiira ku bikolwa. Beekontola ku ibaale eryo eryekontolwaku, 33nga bwe kyaghandiikibwa kiti:
“Bona ndi kuta mu Sioni eibaale
eryekontolwaku abantu,
olubaale olulibagwisa.
Aye kiisi aikiriza oyo taliswazibwa.”