OKWOLEKEBWA
KWA YOANNE
Enhandhula
Ekitabo ky’Okwolekebwa kwa Yoanne kyaghandiikibwa mu biseera Abakurisito ghe baabakirigira einho, era ng’ekyabaleetera okukirigibwa n’okwikiriza kwe baali nakwo mu Yesu Kurisito nga Musengwa waibwe. Omughandiisi ekyasinga okukimughandiisa n’okwoleka be yaghandiikira nga bw’eriyo eisuubi. Yabagumya era yaabakubiriza okusigala nga bakaali mu kwikiriza, waire ng’ebiseera ebyo baali badaazibwadaazibwa n’okukirigibwa.
Ekimega ekisinga bubba eky’ekitabo kino, kirimu okwolekebwa n’okubonekerwa okwomwidhirano nga kwa mikuzi egigheraku. Ebintu ebyo omughandiisi yabighandiika mu lulimi olw’obumanhiso olwali nga lusobola okutegeerebwa Abakurisito abaaligho mu biseera ebyo, aye ng’ate y’abandi lusigala nga luli kyama ekigise. Ebikulu ebighandiikiibwaku mu kitabo kino, omughandiisi aja ng’abiiraganamu mu nsambo efaanana, era yaaja ng’aghandiika ku kubonekerwa okw’endhawulo ghano ni ghale. Ebikulu ebyo abiiraganamu oti se bya lwembo oluzibuzibu.
Waire ghaligho obutaisania mu bidhuubo mu kugha amakulu amakenenule ag’ekitabo kino, abantu kamaala bajiire nga bakivuunula n’amakulu agatafaanana. Aye ng’olugombololo okwazimbirwa ekitabo kino lukoba luti: Ku nkomerero ya byonabyona, Katonda aja kughangulira irala abazigu be boonaboona, ng’omwo mw’otwaliiza ni Sitaani. Era luti, aja kugha abantu be abamwesiga empeera, ng’empeera eyo n’okubagha enkambi okuba mu igulu eiyaaka n’ensi empyaka. Kino kija kubaagho ng’obughanguzi buno bumaze okutuukirizibwa. Kino ng’akikola ng’abita mu Kurisito Musengwa.
Ebirimu nga bwe biiraganwaku
Enhandhula 1:1-8
Okubonekerwa okwigulagho era n’embaluwa edhaghandiikirwa Ebikunsu eby’Abaikiriza mu Kurisito omusanvu 1:9—3:22
Enzingo y’ekitabo n’obumanhiso omusanvu 4:1—7:17
Amagwala omusanvu 8:1—11:19
Ogusota n’ebisolo ebibiri ebikambwe 12:1—13:18
Okubonekerwa okw’endhawulo okw’emikuzi egigheraku 14:1—15:8
Ebibya omusanvu eby’obusungu bwa Katonda 16:1-21
Okuzikirizibwa kwa Babiloni, okughangulwa okw’ekisolo ekikambwe, abalanzi abaguya, ni Sitaani 17:1—20:10
Okusala omusango okusembayo 20:11-15
Eigulu eiyaaka, ensi empyaka era ni Yerusalemu ekiyaaka 21:1—22:5
Okufundikira ekitabo kino 22:6-21