21
Eigulu eiyaaka n’ensi empyaka
1Agho naabona eigulu eiyaaka n’ensi empyaka, kuba eigulu eryasooka n’ensi eyasooka byali bibuzeegho, n’enhandha nga tekaaligho.21:1: Isa 65:17; 66:22; 2 Pet 3:13 2Naabona ekibuga ekitukuvu, Yerusalemu ekiyaaka, nga kiika kiva mu igulu ewa Katonda, nga kiri ng’oti n’omugole ye bavaaziiza, eyetegeike okutwalibwa ewa iba.21:2: Isa 52:1; 61:10; Kwol 3:12 3Naawulira amamiro ag’amaani nga gava gha kityamo eky’obwakyabazinga, nga gakoba gati: “Bona, mperaano ekifo Katonda mw’aba kiri mu bantu. Katonda anaabanga nabo, nga ni Katonda waibwe, era nga beene bantu be.21:3: Ezek 37:27; Lev 26:11, 12 4Alibeeya amaziga goonagoona mu maiso. Ghaliba tighakaali kufa, kugegenga oba kulira, oba obulumi. Kuba olwo eby’eira biriba nga byawaagho.”21:4: Isa 25:8; 35:10; 65:19
5Agho eyali atyaime ku kityamo eky’obwakyabazinga yankoba ati: “Bona! Ebintu byonabyona mbiiza buyaaka.” Era yankoba ati: “Bino bighandiike, kuba ebibono bino bituufu era bya mazima.” 6Era yankoba ati: “Biwoire! Ninze Alufa ni Omega, entoolo n’enkomerero. Kiisi ali ndiwo ndimugha yaanhwera ku bwereere ku nsulo ey’amaadhi ag’obulamu.21:6: Isa 55:1 7Oyo aghangula, alifuna ebyo. Nze ndiba Katonda we, mwene yaaba mwana wange.21:7: 2 Sam 7:14; Zab 89:26-27 8Aye abo abati, n’abataikiriza, n’abadankaanu, n’abatemo, n’abenzi, n’abalogo, n’abasinza ebitali Katonda, n’abaguya boonaboona, ekifo kyaibwe kiriba mu nhandha ey’omuliro n’obunhota bwa salufa: okwo n’okufa okwokubiri.”
Yerusalemu ekiyaaka
9Agho owundi ku bamalaika omusanvu abaali n’ebibya omusanvu, ebyali biidhwire ebibamba omusanvu eby’ensembo, yaidha, yaayogera ninze, yankoba ati: “Idha, ndidha kukwoleka omugole Entaama Ento y’ebayiiza.” 10Agho mu Mwoyo malaika yantwala ku lusozi olukologho era oluleeyi, yandholeka Yerusalemu ekibuga ekitukuvu, nga kiika nga kiva mu igulu ewa Katonda.21:10: Ezek 40:2 11Kyali kiidhwire okumesunkana okw’ekitiisa kya Katonda. Okumesunkana kwakyo nga kuli ng’oti n’okw’eibaale ery’omughendo einho eryetebwa Yasipera, nga kibitamu amaiso. 12Kyali kyezungulwirwa ekimante ekikologho era ekireeyi, nga kuliku emiryango ikumi n’ebiri nga giriku bamalaika ikumi na babiri. Era nga gighandiikiibwaku amaina ag’ebika eikumi n’ebibiri eby’Abaisiraeli.21:12-13: Ezek 48:30-35 13Ku luuyi olw’e buvandhuba nga kiriku emiryango esatu, ni ku luuyi olw’omukono omusaadha olw’e buvandhuba emiryango esatu, ni ku luuyi olw’omukono omugooda olw’e buvandhuba, emiryango esatu ni ku luuyi olw’e bugwandhuba emiryango esatu. 14Ekimante ekyo eky’ekibuga kyali kyemereire ku mabaale ikumi n’abiri ag’omusingi, ku kiisi ibaale nga kuliku eriina ery’omulala ku batume eikumi n’ababiri ab’Entaama Ento.
15Malaika eyali ali kwogera ninze, yali n’olupimo olwa zaabu olw’okupima ekibuga, n’emiryango gyakyo, n’ekimante ekikyezungulwire.21:15: Ezek 40:3 16Endhuyi edh’ekibuga ekyo eina dhaali dhaagayaga, obuleeyi n’obugazi. Agho malaika yaapima ekibuga ekyo n’olupimo lwe, nga kigheza kilomita nkumi ibiri na bina (2,400) obuleeyi, n’obugazi, n’obugungumavu bwakyo nga byagayaga. 17Era yaapima n’ekimante ekikyezungulwire, nga kigheza mita nkaaga malaika yapima mu kipimo ekyabuliidho eky’abantu. 18Ekimante ekyo kyali kizimbiibwa n’amabaale ag’omughendo ageetebwa yasipera. Aye ekibuga kyene nga kya zaabu omukenenule, omutangaavu ng’oti kirawuli.21:18-21: Isa 54:11-12 19Omusingi ogw’ekimante eky’ekibuga nga gutoneibwatoneibwa n’amabaale ag’omughendo aga buli nsambo. Erisooka nga lyetebwa yasipera, eryokubiri saffiro, eryokusatu agate, eryokuna emeraludo, 20eryokutaanu sarudokinisi, eryomukaaga sarudioni, eryomusanvu kurisolito, eryomunaana berulo, eryomwenda topazio, eryeikumi kirusopuraso, eryeikumi n’eirala yakinto, eryeikumi n’abiri ametusito. 21Ate emiryango eikumi n’ebiri gyali amabaale ag’omughendo einho ikumi n’abiri. Nga buli mulyango gukoleibwa mu ibaale irala. Oluguudo olw’ekibuga ekyo lwali lwa zaabu omukenenule abitamu amaiso ng’oti kirawuli.
22Mu kibuga ekyo tyabonamu isinzizo, kuba Musengwa Katonda Aghanga Ebintu Byonabyona aghalala n’Entaama Ento, abo nga n’eisinzizo lyakyo. 23Era ekibuga ekyo tikyetaaga ndhuba, waire mwezi kukyakira, kuba ekitiisa kya Katonda n’obutangaavu bwakyo, era Entaama Ento n’entaala yaakyo.21:23: Isa 60:19-20 24Abantu abamaghanga goonagoona banaatambuliranga mu butangaavu bwakyo, era bakyabazinga ab’oku nsi banaaleetangamu eby’obukombe byaibwe.21:24: Isa 60:3 25Emiryango gyakyo tigija kwigalwanga olunaku lwonalwona, era eyo teribaayo bwire.21:25-26: Isa 60:11 26Ekitiisa n’eby’obukombe eby’amaghanga goonagoona birireetebwa mu kibuga ekyo. 27Aye tikiringiramu kintu kitali kirongoofu, waire omuntu akola ebyenhinhalwa oba omuguya, okutoolaku abo bonka abaaghandiikibwa mu kitabo eky’obulamu eky’Entaama Ento.21:27: Isa 52:1; Ezek 44:9