83
Okusaba okw’ensi abazigu ye beesoomeire okulumba
1Wo Katonda, otasirika busirike,
waire okuba obwagho nga toli kufaayo.
2Bona, abazigu bo bali kwegugunga;
abo abakukyagha bali kudheema.
3Bakola entegeka edh’okulumba abantu bo;
era beeteesa bwe banaalumba abantu bo b’okuuma.
4Bakoba bati: “Ka tumalegho eighanga lya Isiraeli,
ghabule aidhukira nga ghaalighooku eighanga eryetebwa Isiraeli.”
5Bwenebwene beekobaana eky’okudheema,
era beeyimba baakola endagaano ey’okukwesonsaaku.
6Abazigu abo ni bano: Abaedomu, Abaishimaeli,
Abamoabu, Abahagari,
7Abagebali, Abammoni, Abamaleki, Abafilisiti n’Abatiro.
8N’Abassiria boona baabeeyimbyeku,
bayambe abasaadha ab’amaani baidhukulu ba Loti.
9Aye iwe bakole kye wakola Abamidia,83:9: Balam 4:6-22; 7:1-23
era kye wakola Sisera ni Yabini ku mwiga Kishoni,
10abaitirwa mu kibuga Endori,
ni baba agho ku itaka ng’oti mmungo ya busa.
11Abafuzi baibwe bakole nga bwe wakola Orebu ni Zeebu,83:11: Balam 7:25; 8:12
n’abakungu baibwe obakole nga bwe wakola Zeba ni Zalumunna.
12Abo n’abaakoba bati: “Ka twetwalire eitaka
lya Katonda libe lyaife ku bwaife.”
13Wo Katonda wange, bafuule ng’oti n’enkungu eri kwezungululira mu mpewo ey’amaani,
babe ng’oti n’omusinsi empewo gw’efuuwa ere.
14Ng’oluyiira bwerusenkeenha ekibira,
n’enimi edh’omuliro ni dhikoleeza ensozi,
15weena otyo bw’obe obabingirire n’amaadhi agalimu kiwunga ow’amaani,
obatiikize irala n’empewo ere yeene ezikiriza.
16Baswaze ebitoogerekeka,
balwe eira baire y’oli iwe Musengwa Katonda.
17Ensoni ka dhibagemenga era basoberwenga ebyanda n’ebyanda;
bafe nga banhoomebwa.
18Ka bamanhe nga iwe wenka niiwe Musengwa Katonda,
era nga niiwe oyo Ali Ghaigulu Yeene
asinga ebintu byonabyona eby’oku nsi.