69
Okusaba kw’omuntu adaazibwadaazibwa
1Wo Katonda wange mponia,
amaadhi gantuuse mu nkoto.
2Ndi kudimira mu bitosi
omuzira gha kuniina naire.
Ndi kweyongerayo bwa mu maadhi amaleeyi,
omwidhuzo gw’amaadhi gwenda kundheyaagho.
3Mpoiremu olw’okulira nga nkweta, amamiro gansaakaala.
Amaiso tikaaghanga na kumoga,
olw’okuteegerera Katonda wange okumbeera.
4Abankyagha ng’ate ghazira kye mbakoze bali kamaala okusinga enviiri
edhiri ku mutwe gwange.
Abo abenda okusirisa obulamu bwange nga bampaama bye ntakoze,
ba maani beenebeene.
Bampaliriza okuligha ebintu bye ntaibangaku naire.69:4: Zab 35:19; Yoa 15:25
5Wo Katonda wange, niiwe oidhi nga bwendi omusirusiru,
ghazira kibi kye nakola ky’otaidhi.
6Wo Musengwa Katonda Afuga Amagye, ka ndobe kuswaza abo abasuubira mu iwe.
Wo Katonda wa Isiraeli, nhamba ndobe kunhoomesa abo abakusinza.
7Ku lulwo abantu banvuma,
era tikaayala na mu bantu.
8Aboluganda lwange baaningaku ng’oti tibandidhi,
baganda bange ku maama bambona ng’oti ndi wa ndha.
9Okugonza einho eisinzizo lyo kuumazeegho;
ebivumo by’abo abakuvuma biira ku nze.69:9: Yoa 2:17; Rom 15:3
10Bwe neerumya nga nsiiba endhala,
kinfuukira ekivumo.
11Bwe nvaala ekutiya olw’enaku,
nfuuka kibono kya kudhondha.
12Nafuuka kya kughayaku eri abo abatyama mu kifo ky’olwekobaano,
ku mulyango ogwingira mu kibuga,
n’abatamiivu bandhiiyaamu enhembo.
13Aye nze nsaba iwe Musengwa Katonda.
Wo Katonda wange, ndhiraamu mu kiseera kyo mwene ky’oba ng’olonze,
olw’okugonza kwo okungi okutakoma,
era n’olw’okusuubiza kwo okwesigika.
14Mponia okudimira mu bitosi
ontoole mu ngalo edh’abazigu bange
ndobe kweyongerayo mu maadhi maleeyi.
15Otaganha mwidhuzo gwa maadhi kundheyaagho
waire okundeka okudimira okutuuka ku ntobo.
Era otaganha magombe kunsandikira.
16Wo Musengwa Katonda, olw’okugonza kwo okutakoma n’olw’obulungi bwo
ndhiraamu bye nkusaba;
olw’okusaasira kwo okungi ba ku luuyi lwange.
17Nze omwiru wo otankuba nkoone,
yangughaku ombeere kuba ndi mu buzibu bunene.
18Ndhiruukirira omponie,
era nteekuluza abazigu bange.
19Oidhi bwebanvuma ni banswazaswaza ni baanhooma;
era oidhi abazigu bange boonaboona.
20Banvumye bankutula n’omwoyo,
buti n’eisuubi nzira.
Nanoonia anansaasiraku yambula;
naanoonia anandhizaamu amaani, yambula.
21Endhala bwe yaanuma, mu kifo eky’okumpa emere enkalamu,
bampa eri ng’oti butwa;
endiwo yaanuma bampa omwenge endoota.69:21: Mat 27:48; Mar 15:36; Luk 23:36; Yoa 19:29
22Kale ni embaga dhaibwe dhe balya ka dhibafuukire ng’oti
lutuula olubagemya;
ebibinuko byaibwe eby’emisengo gye baaghaayo,
ka bibaviiremu okugwa.69:22-23: Rom 11:9-10
23Amaiso gaibwe ka gazibibwe, balobe kubona,
era emigongo gyaibwe gifunhibwe enaku dhoonadhoona.
24Babonereze n’ekiruyi kyo,
obamalireku obusungu bwo obwokya ng’oti muliro.69:24: Kwol 16:1
25Ebifo byaibwe mwe baba ka bisigale byanhe byereere ebizise;
n’endhu dhaibwe dhisigale bifulukwa.69:25: Bik 1:20
26Kuba baja baakiriga abo b’obonereiza;
baayongera obulumi ku abo b’ofumiite.
27Kale babungeku ebibonerezo,
ghabule y’osonighaku naire.
28Amaina gaibwe ka gasasibwe mu kitabo eky’obulamu;
gatoolebwe mu lukalala olulimu abatuufu.69:28: Kwol 3:5; 13:8
29Aye nze ndi kudaazibwadaazibwa era ndi mu bulumi.
Wo Katonda wange mponia, onkuumire ghe batantuukiraku.
30Ndidha kusaakanga eriina lya Katonda mu lwembo;
era ndhatulenga obukulu bwe nga mmusiima.
31Ekyo n’ekisiimya Musengwa Katonda okusinga okumugha ente ng’ekigheebwayo,
oba okumugha ente enume ng’omusengo, waire nga nkulu yeene
eriku n’amayiga.
32Abo abadaazibwadaazibwa bwe bakibona basangaala;
abo abasinza Katonda bwe bakibona kibaizaamu amaani,
33kuba Musengwa Katonda awulirisa okusaba kw’abo abali mu bwetaavu
era tiyeerabira bantu be abali mu busibe.
34Imwe eigulu n’ensi,
n’enhandha ni byonabyona ebirimu, musaake Katonda.
35Katonda aliwonia Sioni abazigu,
yairamu okuzimba ebibuga bya Yuda,
abantu be baabityamangamu nga byaibwe ku bwaibwe.
36Biribanga bya nsikirano mu baana b’abantu be,
n’abo abamugonza omwo mwe balibanga.