29
Amamiro ga Musengwa Katonda gakola ebyewuunhio
1Imwe abali mu igulu, musaake Musengwa Katonda,
mwatule nga Musengwa Katonda bw’ali ow’ekitiisa era ow’amaani.29:1-2: Zab 96:7-9
2Mwatule muti eriina lya Musengwa Katonda liri n’ekitiisa,
musinze Musengwa Katonda ng’aboneike mu butukuvu bwe.
3Amamiro ga Musengwa Katonda ogawulirira ku maadhi;
Katonda ow’ekitiisa abwatuka ng’oti lukuba;
Musengwa Katonda awulirwa ku maadhi amangi.
4Amamiro ga Musengwa Katonda gali n’obukumu;
amamiro ga Musengwa Katonda gawulikika nga ga buyinza.
5Amamiro ga Musengwa Katonda gamenha emivule;
Musengwa Katonda amenha emivule egy’e Lebanoni.
6Atuumya ensozi edh’omu Lebanoni ng’oti nte nto,
era yaatuumya Sirioni ng’oti n’embogo enume entototo.
7Amamiro ga Musengwa Katonda gavaamu enimi edh’omuliro edhimyansa.
8Amamiro ga Musengwa Katonda gatengeesa eirungu;
Musengwa Katonda atengeesa eirungu ery’e Kadeshi.
9Amamiro ga Musengwa Katonda gatengeesa emiti emikologho,29:9 Gatengeesa emiti emikologho: oba “Gazaaza empongo”.
era gaakunkumusa amakaba okuva ku miti gyonagyona,
n’abali mu isinzizo lye boonaboona baayasiikana bati: “Katonda wa kitiisa!”
10Musengwa Katonda n’afuga omwidhuzo gw’amaadhi;
afuga nga ni kyabazinga ebyanda n’ebyanda.
11Musengwa Katonda aghenga abantu be amaani,
era aghenga abantu be enkabi babe miraala.