112
Omuntu atya Musengwa Katonda aba n’enkabi
1Mwenamwena musaake Musengwa Katonda.
Wa nkabi omuntu atya Musengwa Katonda,
asangaalira okukola ng’ebiragiro bye bwebikoba.
2Abaana be n’abaidhukulu baba ba maani mu nsi;
oluse oluva mu muntu oyo atya Katonda luba lwa nkabi.
3Ab’omu maka ge baba bafuni nga bakombe,
era wa kusiimibwanga Katonda ebyanda n’ebyanda.
4Obutangaavu bwidha mu nzikiiza bwamuliikirira abo abatya Katonda,
era bwayakira abo ab’ekivunika, abasaasizi era abatuufu.
5Wa nkabi omuntu oyo omugabi era awola baine empiiya,
n’akola buli kintu mu mazima.
6Omuntu atya Katonda ghazira kisobola kumutengeesa;
aidha kwidhukirwanga ebyanda n’ebyanda.
7Amawulire amabi tigamutiisa,
omwoyo gwe mugumu nga yeesiga Musengwa Katonda.
8Omwoyo gwe tigukyukakyuka waire okutya;
okutuusa lw’abona ng’abazigu be baghangwirwa.
9Agabira abaavu na mwoyo mulala,
era ekisa kye tikimuwaaku,
aidha kusiimibwanga Katonda era agheebwenga ekitiibwa ebyanda n’ebyanda. 112:9 2 Kor 9:9
10Omubi bw’abona ekyo asungughala,
yeeguguna era yaaseenena,
aye bye yeegomba okukola tabifuna.