105
Katonda n’abantu be Abaisiraeli
1Mwenamwena musiime Musengwa Katonda, musaake eriina lye;
mumanhise amaghanga agandi ebyo bye yakola.
2Mumwembere nga mwemba enhembo edhimusaaka;
nga mukobera abantu ebyewuunhisa byonabyona bye yakola.
3Muwulire okwesiima olw’eriina lye eitukuvu;
abo abasinza Musengwa Katonda ka basagambe.
4Musabe Musengwa Katonda ababeerenga;
mumusinzenga nga muli gh’ali ekiseera kyonakyona.
5Muteerabiranga ebyewuunhio,
n’eby’amaani bye yakola era n’ensala ye yasalamu emisango,
6imwe abaana ba Aburahamu omugheereza we
era baidhukulu ba Yakobo ye yeerondera.
7Oyo ni Musengwa Katonda waife,
ebiragiro bye bikola mu nsi yoonayoona.
8Akuuma endagaano ebyanda n’ebyanda,
yaagumira ku bye yasuubiza ni bweghabitagho ense olukumi.105:8-9: Luk 1:72-73
9Akuuma endagaano ye yakola ni Aburahamu,
n’ekisuubizo kye yasuubiza Isaaka nga yeerayirira.
10Endagaano eyo yagikola n’omugheereza we Yakobo,105:10-11: Mainh 28:13 yaagitaagho ng’eiteeka
era nga n’endagaano n’Abaisiraeli etaliwaagho,
11ng’akoba ati: “Ndibagha ensi Kanaani,
yaaba yaimwe ku bwaimwe.”
12Abantu ba Katonda baali bakaali batono abazira ghe baaga,
era nga basenze busenze mu nsi eyo.
13Baatambulatambula eyo batyo baava mu nsi eyindi
kabiri baaja mu yindi,
era baava mu bwakyabazinga obundi, baaja mu bundi.
14Aye Katonda tiyaganha muntu yeenayeena kubakiriga;105:14-15: Mainh 20:3-7
ku lwaibwe yakaabukira ba kyabazinga
15ng’abakoba ati: “Ghatabaagho agema ku bantu bange be nasiiga omuzigo;
abalanzi bange mutabakola kibi kyonakyona.”
16Bwe yabaleetera endhala okugwa mu nsi mwe baali,105:16: Mainh 41:53-57
n’ababuzaaku kiisi kantu koonakoona akasobola okuliibwa,
17yali yamala ira okugheerezaayo emberi waibwe,105:17: Mainh 37:28; 45:5
omusaadha ayetebwa Yosefu, ye baatunda yo mu bwiru.
18Yateebwa mu ikomera, baamusiba n’endhegere ku bigere,105:18-19: Mainh 39:20—40:23
n’ekikomo eky’ekyuma mu nkoto
19okutuusa ekyo kye yakoba ati kiribaagho lwe kyatuukirira,
ekibono kya Musengwa Katonda ni kimukakasa okuba omutuufu.
20Olwo Kyabazinga yaatuma baamusibula;105:20: Mainh 41:14
oyo afuga abantu yamulekula yeetaaya.
21Yaagha Yosefu oyo okukuumanga amaka ge goonagoona,105:21: Mainh 41:39-41
yaamugha okulabiriranga ebibye byonabyona.
22Kyabazinga yaamugha obukumu okulagira abakungu be boonaboona
nga bwe yayendanga,
n’okugha abaami be amagezi.
23Agho Isiraeli yaaja mu Misiri;105:23: Mainh 46:6; 47:11
Yakobo yaasenga mu nsi ya Hamu.
24Musengwa Katonda yaabagha okuzaalagana baayala,105:24-25: Kuv 1:7-14
baaba ba maani okusinga abazigu baibwe.
25Yaakyusa emyoyo gy’Abamisiri baakyagha abantu be,
era baatoolera okulya mu bagheereza be abo enkwe.
26Yaabatumira Musa omugheereza we,105:26: Kuv 3:1—4:17
ni Aaroni ye yeerondera.
27Baabakolera ebyewuunhio nga babona,
era baabakolera eby’amaani nga bali mu nsi ya Hamu.
28Yabasindikira enzikiiza yaagema ensi yoonayoona,105:28: Kuv 10:21-23
aye era Abamisiri tibaagondera kiragiro kye.
29Yaakyusa amaadhi gaibwe gaafuuka musaayi,105:29: Kuv 7:17-21
era yaaleetera ebyenhandha byaibwe okufa.
30Ensi yaibwe yaidhula ebikere,105:30: Kuv 8:1-6
nga biidhwire ni mu kisaagaati kya kyabazinga waibwe.
31Yalagira ebikuukuulu by’ensowera105:31: Kuv 8:16-17, 20-24 n’obudhuuni
byabunia ensi yaibwe.
32Yabasindikira mugozi mu kifo ky’amaadhi okugwa,105:32-33: Kuv 9:22-25
n’olukuba lwamyansa lwamazaaku ensi yaibwe.
33Yazikiriza emiti gyaibwe emizabbibu n’emitiini,
yaamenhamenha n’emiti gyonagyona egy’omu nsi yaibwe!
34Yalagira enzige dhaidha kamaala,105:34-35: Kuv 10:12-15
nga n’okubalika tidhibalika,
35dhaalya kiisi kimera kyonakyona ekyali mu nsi omwo,
na kiisi kisimbe kyonakyona.
36Yaita abaana ababeri abalenzi mu nsi omwo boonaboona,105:36: Kuv 12:29
abasooka mu kiisi ndhu.
37Agho yaatoola Abaisiraeli mu nsi omwo,
baaja n’ebintu ebya feeza n’ebya zaabu,
nga boonaboona balamu era nga ba maani.
38Bwe baavaayo Abamisiri baasangaala,
kuba baali batooleire okubatya einho.
39Katonda yaayandhuluza ekire kyabwika abantu be,
ate obwire yaataagho omuliro gwabamuliikirira.
40Baamusaba, yaabasindikira obunhonhi obuli ng’oti bukologo,
yaabagha n’emere kamaala okuva mu igulu.
41Yakuba olubaale lwayawuka, mwafukumukamu amaadhi,
gaakuuluula mu irungu ng’oti mwiga;
42kuba yaidhukira endagaano ye entukuvu,
ye yakola ni Aburahamu omugheereza we.
43Kale yaatoola abantu be mu nsi omwo nga basangaavu,
abantu be abo be yeerondera baavaamu nga bemba.
44Yaabagha ensi edh’abamaghanga agandi,
era beiriza amasamba abantu abandi ge baatakabanira okulima,
45ng’ayenda abantu be abo bagonderenga amateeka ge,
era bajiirenga ku biragiro bye.
Mwenamwena musaake Musengwa Katonda.