24
Edheikumi n’omwenda
1Oteegombanga bakozi ba bibi naire, era otagezanga kubafuula bakagwa bo.
2Mu myoyo gyaibwe bayiiya kukola bya bukambwe era bye boogera bireeta kutabulatabula.
Edhamakumi abiri
3Endhu ezimbwa na magezi, era yaaguma bweghabaagho okutegeera.
4Okumanha kwidhuza ebisenge byayo ebintu eby’omughendo era ebirungi.
Edhamakumi abiri n’endala
5Omuntu omugezi awula ole ow’amaani era ali n’okumanha awula ow’obuyinza. 6Kuba okulwana olutalo osooka kwebuuza ku magezi era aghali abawi ab’amagezi kamaala ghabaagho okughangula.
Edhamakumi abiri n’eibiri
7Amagezi gaswikiriire inho okutegeera okw’omusiru, era azira ky’ayogera nga bali mu kifo eky’olwekobaano.
Edhamakumi abiri n’eisatu
8Omuntu ategeka okukola akabi buli kiseera, balimweta, “mwene kubidooma”. 9Omusiru by’ategeka okukola byonabyona, bivaamu bibi byereere, era abantu bakyayira irala omuntu omunhoomi.
Edhamakumi abiri n’eina
10Bw’owaamu amaani mu kiseera ekizibu, oba oli munafu.
Edhamakumi abiri n’eitaanu
11Owonianga abantu be bali kutwala okwita, era waaloberanga abantu okubaghaluudhania, okuja okubatirimbula. 12Osobola okwewuuguusa oti: “Bona eno, ekyo nze tikimanhangaku naire.” Aye Katonda abona ebigendererwa eby’omuntu era yaabimanha. Oyo n’akuuma obulamu bwo, era abona buli kintu. Era aja kusasula buli muntu, ng’ajiira ku bikolwa bye.
Edhamakumi abiri n’omukaaga
13Mwana wange, lyanga ku mudheenene ogw’endhuki, kuba mulungi. Nga bwe gudhuudhuula ku lulimi lwo, nga guva mu bisasala byagwo, 14manha oti n’amagezi goona gatyo bwe gali amalungi y’oli. Bw’ogafuna, obulamu bwo obw’omu maiso, bwidha kubanga bukalamu, n’ebyo by’osuubira birobenga kukufa busa.
Edhamakumi abiri n’omusanvu
15Otabanga ng’ababi abeeteega amaka ag’abatuufu, era ni bagalumba okugakolaku eby’obukambwe. 16Abakola ebituufu ni bwe bagwa emikuzi kamaala gitya, bamala baasituka aye abakozi b’ebibi bazikirira buzikirire ng’akabi kabaidhiire.
Edhamakumi abiri n’omunaana
17Otasagambanga ng’omuzigu wo agwire waire okusanhuka ng’agangaliime. 18Musengwa Katonda aidha kukibona anakughale, era alekere agho okusungughalira ole.
Edhamakumi abiri n’omwenda
19Otafangayo ku abo abakola ebibi, era oteesiimisanga babi. 20Omubi azira ky’asuubira mu biseera bya mu maiso, era aja kuzikira ng’oti ntaala.
Edhamakumi asatu
21Mwana wange otyanga Musengwa Katonda ni kyabazinga, era otabadheemeranga. 22Akabi Musengwa Katonda ni kyabazinga ke balisindika, kaja kukugwaku bugwe. Era ghazira aidhi kuzikirira okuliva mu kabi ako ghe kulyaga.
Endhogera edh’amagezi edhindi
23Dhino dhoona ndhogera dha ba magezi:
Kiba kibi omuntu okusaliriza ng’ali kusala emisango.
24Ole akoba omuntu eyaiza omusango ati: “Ja, oziraku musango,”
abantu balimukolimira n’amaghanga gaamukyagha.
25Aye ole abonereza omuntu eyaiza omusango ebintu biri mujiira bukalamu,
era abantu baamusabira enkabi.
26Omuntu okukwiramu ekituufu,
ako kaba kamanhiso ka mukwano.
27Sooka otereeze emirimo gyo egy’okuliya,
era otegeke bukalamu emisiri gyo,
memale weezimbire endhu.
28Otaghanga budhulizi ku muntu ng’ozira nsonga ntuufu,
era otayogeranga bya buguya.
29Otakobanga oti: “Ky’ankoze zeena kye ndimukola;
ndimwesasuuza olw’ekyo ky’ankoze.”
30Lwali lulala, naabita ku musiri ogw’omugayaavu;
ku isamba ery’emizabbibu ery’omuntu aziramu kategeera.
31Naja okubona, nga mwonamwona muzise n’amawa;
era nga ku itaka kwidhwire isubi,
n’olukomera lwaku olw’amabaale nga lwagwa.
32Bwe nakibona naalowooza inho,
era naafunamu eky’okwega kino:
3324:33-34: Nsa 6:10-11 Eby’okutendukaku akatono n’eby’okulambaalaku akatono,
era n’eby’okuzingira amakono okuwuumulaku,
34n’ebireetera obwavu okulumba omuntu ng’oti mukambuzi,
n’obwetaavu okumweyongeraku ng’oti n’ole omunhazi ali n’ekiisi y’anhazeeku ebibye.