EMBALUWA PAULO YE YAGHANDIIKIRA
AB’E FILIPPI
Enhandhula
Embaluwa Paulo ye yaghandiikira ab’e Filippi, yagighandiikira Ekikunsu eky’Abaikiriza mu Kurisito kye yasookeraku mu isaza ly’Abaroma ery’e Makedonia. Omutume yagighandiika ng’ali mu ikomera, mu kiseera ghe yali ng’atawanizibwa Abakuristo abandi abaali bamutakania ate nga boona baali bakola mulimo n’omulala ogwo ogw’okusansaania Amawulire Amalungi. Era yali ng’awulira enaku olw’ebikyamu ebyali byegeresebwa mu Kikunsu eky’Abaikiriza mu Kurisito eky’e Filippi. Mu kiseera n’ekirala ekyo embaluwa eno eyoleka obusangaavu n’okwekakasa Paulo bye yali nabyo ebyali ebizibu eby’okwinhonhola. Okusobola okubitegeera, oli na kusooka kumanha nti Paulo yali n’okwikiriza mu Yesu Kurisito okunene okutaloodheka.
Ensonga y’oboneragho amangu eyamughandiikisa embaluwa eno n’eyokweyanza Abakurisito ab’e Filippi olw’ekirabo kye baamugheereza okumuyamba ng’ali mu bwetaavu. Era akozesa omukisa ogwo okubagumya basigale nga bakaalimu amaani era nga beekakasa, waire yali ali n’obuzibu obubwe ate nga ni beene boona bali n’obwaibwe. Abeeghemba babe ng’oti ni Yesu, balobe kuba baghaaghaavu, era balobe kufugibwa mairu gaakweyendezanga bonka birungi, n’okwetwala ng’abaghaigulu. Abaidhusa ati okweyimba ni Kurisito okuba ng’omuntu omulala kitone butone ekiva ye Katonda mwene olw’ekivunika kye. Ekitone ekyo baakifuna lwa kwikiriza, se ti lwa kugondera mironso gy’amateeka ga Kiyudaaya. Aghandiika ku kusangaala n’emiraala Katonda by’agha abo abali ng’omuntu omulala ni Kurisito.
Embaluwa eno ya ndhawulo olw’obukulu bw’egha ebintu bino: okusangaala, okwekakasa, okweyimba abantu ni baba muntu mulala n’okuguminkiriza ebiri mu ndhikiriza y’Ekikurisito, n’obulamu obw’Ekikurisito. Embaluwa eno era eyoleka okugonza okw’amaani Paulo kwe yali nakwo olw’Ekikunsu eky’Abaikiriza mu Kurisito eky’e Filippi.
Ebirimu nga bwe biiraganwaku
Enhandhula 1:1-11
Ebigema ku Paulo ku bubwe yenka 1:12-26
Obulamu Kurisito bw’atugha 1:27—2:18
Entegeka ya Paulo okutuma Timotheo ni Epafurodito 2:19-30
Okulabula ku bazigu ni ku bizibu ebiidha 3:1—4:9
Paulo ni bakagwa be Abafilippi 4:10-20
Okufundikira embaluwa eno 4:21-23