4
Olufumo olw’omusizi
(Mat 13:1-9; Luk 8:4-8)
1Agho kabiri yainhama okwegeresa eyo ku nhandha. Abantu lukunkumuli beesololeza gh’ali, era yaaniina bwa mu lyato eryali mu nhandha yaatyama omwo, abantu boonaboona baasigala ku bukalu.4:1: Luk 5:1-3
2Yaabeegeresa ebintu kamaala mu nfumo era mu kubeegeresa yaabakoba ati: 3“Muwulirise! Olwatuuka, omusizi yaafuluma okuja okusiga ensigo. 4Bwe yali asiga, ensigo edhindi dhaagwa mu ngira, era enhonhi dhaidha dhaadhirya.
5“Edhindi dhaagwa ku lubaalebaale aghaali eitaka eitonioli, era tidhaalwa dhaamera. Aye olw’eitaka okuba eitono, 6tidhaaba na mizi, era endhuba olwavaayo ng’obusimbe buniala, nga bukala.
7“Edhindi dhaagwa mu mawa, amawa gaaduuma gaadhifundekeza era edho tidhaabala.
8“Edhindi dhaagwa ku itaka eirungi, dhaamera dhaakula, dheeyongera okwama ndala yaavaamu asatu, eyindi nkaaga n’eyindi kikumi!”
9Agho yaakoba ati: “Ali n’amatu agawulira awulire.”
Ekigendererwa eky’enfumo
(Mat 13:10-17; Luk 8:9-10)
10Agho Yesu bwe yali embali yenka, abaali agho, n’Eikumi n’Ababiri baamubuuza ku nfumo. 11Yaabakoba ati: “Imwe mwagheebwa okumanha ebyama eby’Obwakyabazinga bwa Katonda, aye abandi ab’endha, buli kintu kibakoberwa mu nfumo: 12olwo babe,4:12: Isa 6:9-10
ng’okumoga bamoga
aye nga tibabona,
n’okuwulira baawulira
aye nga tibategeera;
kuba bandibaire bakyuka
baasoniyibwa ebibi byaibwe.”
Okwinhonhola okw’olufumo olw’omusizi
(Mat 13:18-23; Luk 8:11-15)
13Era yaabakoba ati: “Olufumo luno timulutegeire! Memale enfumo edhindi dhoonadhoona mulidhitegeera mutya?
14“Omusizi asiga kibono. 15Agho ni, abali ku ngira okusigibwa ekibono n’abo oluwulira ekibono, mangu ago Sitaani ng’aidha aswankula ekibasigiibwamu. 16Era edho edhisigibwa mu itaka ery’oku lubaalebaale, n’abo abawulira ekibono baakitwala n’eisanhu. 17Aye olw’okuba bazira mizi, ekibono bakisanhukira akaseera katono era ebizibu oba okukirigibwa bwe kwidha olw’ekibono, bawaamu mangu amaani.
18“Edhindi edhaasigibwa mu mawa, n’abo abawulira ekibono 19aye olw’okweraliikirira eby’obulamu obw’oku nsi, okuguyibwa eby’obukombe, n’okwegomba kwonakwona okundi, bwe bibangiramu, bifundekeza ekibono, kyaloba kubala naire. 20Ate edho edhaasigibwa mu itaka eirungi, n’abo abawulira ekibono baakiikiriza n’omwoyo mulala era kyayama, okundi asatu, okundi nkaaga, n’okundi kikumi.”
Olufumo olw’eitaala
(Luk 8:16-18)
21Agho Yesu era yaakoba ati: “Eitaala balireeta kulifundikira mu kiibo, oba kulita mu kunkuliisi? Ti kulighanika ku kikondo kyalyo?4:21: Mat 5:15; Luk 11:33 22Ghazira kikwekeibwa kitalikwekulwa, era ghazira kyama kitalimanhika mu lwatu!4:22: Mat 10:26; Luk 12:2 23Ali n’amatu agawulira, awulire.”
24Ekindi, yaabakoba ati: “Mwegendereze bye muwulira, ekigero ky’ogerera abandi weena ky’oligererwa, ate n’okwongerwa kiryongerwaku;4:24: Mat 7:2; Luk 6:38 25kuba ali nakyo aligheebwa ate ole azira, n’ako k’ali nako kalimutoolebwaku.”4:25: Mat 13:12; 25:29; Luk 19:26
Olufumo olw’ensigo
26Era yaakoba ati: “Obwakyabazinga bwa Katonda bufaanana ng’oti n’omuntu asiga ensigo mu itaka, 27yaatenduka era yaazuuka, omusana n’obwire ensigo eyo yaamera yaakula nga taidhi. 28Eitaka lyene n’erikuza ekimera ekyo okutuusa ku kwama ebibala. Ekimera ekyo kisooka kuleeta makaba, kyabeeka ebifaaganda ebito. Ate ebifaaganda ebyo byakula byabaamu empeke edhikuze obukalamu. 29Era empeke edho olwenga dhiti ng’omuntu aja na muwolo kuwoobya, kuba okukungula kutuuse.”4:29: Yoe 3:13
Olufumo olw’akamuuma
(Mat 13:31-32; Luk 13:18-19)
30Agho yaakoba ati: “Obwakyabazinga bwa Katonda tunaabufaanania ki? 31Oba tunaabugeza ku ki? Buli ng’akamuuma ka kaladaali bwe kasimbibwa mu itaka, katonioli okusinga emuuma dhoonadhoona edhiri mu nsi. 32Aye bwe kasimbibwa mu itaka kakula kaaleegha okusinga ebisimbe byonabyona, era kaleeta ensaga enene nga n’enhonhi edh’omu ibbanga dhisobola okuzimba ebisu mu kinsense kyako.”
Okukozesa enfumo
(Mat 13:34-35)
33Era yaabakobera ekibono mu nfumo kamaala edhifaananaku n’edho, nga bwebaaghanganga okutegeera. 34Tiyayogeranga nabo nga takozeisa lufumo aye bwe baasigalanga bonka ng’Abeegeresebwa be abainhonhola byonabyona.
Okulekeza kiwunga
(Mat 8:23-27; Luk 8:22-25)
35Ku lunaku lwene olwo nga buli kuziba, Yesu yaabakoba ati: “Tusomoke tuje eruuyi ere.” 36Baaleka ekiyindi eky’abantu, baamutwala nga bwe yali mu lyato, n’amaato agandi gaaja naye.
37Agho kiwunga ow’amaani yaatoolera era amayengo gaafukika mu lyato, kumpi kwidhula bwidhule. 38Yesu yali atendwike mu kalumba ak’eryato nga yeeziziike akaito, baamuzuusa baamukoba bati: “Mwegeresa, tofaayo ng’obona tufa!”
39Yesu yaasituka yaakaabukira kiwunga, n’enhandha yaagikoba ati: “Sirika, laala!” Era kiwunga yaalekera, n’enhandha yaalaala inho. 40Agho yaabakoba ati: “Lwaki mutiire mutyo? Muzira kwikiriza?” 41Baatya n’okutya kunene era buli muntu yaakoba mwine ati: “Ono oba muntu wa nsambo ki? Kiwunga n’enhandha bimuwulira!”