10
Yesu ayegeresa ku bufumbo
(Mat 19:1-12)
1Yesu yaava agho yaaja mu kiketezo eky’e Buyudaaya ng’osomoike Yorudani abantu kamaala baasombokera gh’ali kabiri era yeena yaabeegeresa, nga bwe yali amanhiriire.
2Agho Abafarisaayo baaseeta baamubuuza nga bamuleba oba nga kiikirizibwa mu Mateeka omusaadha okubinga mukazi we. 3Yesu yaabakoba ati: “Musa yabalagira ki?” 4Baakoba bati: “Musa yaganha okumughandiikira embaluwa ey’okumubinga, memale yasiibulwa.”10:4: Ma 24:1-4; Mat 5:31
5Agho Yesu yaabakoba ati: “Olw’okuba muli ba nkandya kyova yabaghandiikira eiteeka eryo. 6Aye ng’okuviira irala mu mainhama Katonda ng’atonda, yakola omusaadha n’omukazi.10:6: Mainh 1:27; 5:2 7Omusaadha kyava aleka ise n’inhina naagumira ku mukazi we, ababiri baafuuka muntu mulala.10:7-8: Mainh 2:24 8Olwo nga tibakaali bantu babiri aye mulala. 9Ekyo ni Katonda kye yayimba omuntu atakiyimbululanga.”
10Nga bali mu ndhu, Abeegeresebwa be baamubuuza kabiri ku nsonga eno. 11Yaabakoba ati: “Oyo abinga mukazi we n’abayiza owundi aba ayenze ku mukazi oyo.10:11-12: Mat 5:32; 1 Kor 7:10-11 12Era n’omukazi bw’anoba ku iba n’abayira owundi, aba ayenze.”
Yesu agha abaana abato omukisa
(Mat 19:13-15; Luk 18:15-17)
13Agho baamuleetera abaana abato abagemeku, aye Abeegeresebwa be baadhuuka abaali babaleeta nga babalobera. 14Yesu olwakibona, yaasungughala, yaabakoba ati: “Muleke abaana abato baidhe ye ndi, mutabalobera kuba abali ng’abo n’ababa mu Bwakyabazinga bwa Katonda. 15Bwenebwene ka mbakobere, oyo ataikiriza Bwakyabazinga bwa Katonda ng’omwana omuto, taghanga naire kububaamu.”10:15: Mat 18:3
16Agho yaalera abaana yaabagha omukisa ng’abaisaaku emikono.
Omukombe n’obulamu obutawaagho
(Mat 19:16-30; Luk 18:18-30)
17Yesu olwagwa mu ngira ati, ghaabaagho eyamulumuukirira yaakuba amakiryaivu, yaamubuuza ati: “Mwegeresa omulungi, nkole ki okufuna obulamu obutawaagho?”
18Yesu yaamukoba ati: “Ondhetera ki omulungi? Ezira mulungi okutoolaku Katonda yenka. 19Ebiragiro obiidhi: ‘Toitanga, toyendanga, toibanga, toghaayirizanga, tokupankupanianga, lata wo n’inhoko obaghanga ekitiisa.’ ”10:19: Kuv 20:12-16; Ma 5:16-20
20Agho yaakoba Yesu ati: “Mwegeresa, ebyo byonabyona nabigema okuva mu buto.”
21Yesu yaamwekalirisa yaamwesiimisa, era yaamukoba ati: “Kirala ky’okaabulwaku! Ja otunde by’oli nabyo byonabyona, oghe abaavu, eby’obukombe oliba nabyo mu igulu oidhe obitenga ninze.”
22Ekyo kyamunakughaza yaaja ng’afootookereire, kuba yali n’ebintu kamaala.
23Yesu yeezunguluza maiso, yaakoba Abeegeresebwa be ati: “Nga kikalangufu abakombe okutuuka mu Bwakyabazinga bwa Katonda!”
24Abeegeresebwa be beewuunhia ebibono ebyo. Aye Yesu yaabakoba ati: “Baana bange, nga kikalangufu okutuuka mu Bwakyabazinga bwa Katonda. 25Kiba kyangu engamiya okubita mu mpami ey’empiso okusinga omukombe okutuuka mu Bwakyabazinga bwa Katonda.”
26Agho beewuunhia n’okusingagho era mule beebuuza bati: “Memale olwo naani asobola okulokolebwa?”
27Agho Yesu yaabalingirira, yaakoba ati: “Ku bw’omuntu tikisoboka aye ti ku Katonda kuba mu Katonda byonabyona bisoboka.”
28Agho Petero yaatoolera okumukoba ati: “Kale ife, twaleka byonabyona twabita ni iwe!” 29Yesu yaakoba ati: “Bwenebwene mbakobera nti ghazira oyo aleka maka ge, oba baganda be, oba baanhina, oba inhina, oba ise, oba baana, oba kibandha kye, ku lwange ni ku lw’Amawulire Amalungi 30n’atafuna maka ni baganda be ni baanhina ni ba inhina n’abaana n’ebibandha, emikuzi kikumi mu nsi muno, taaku okudaazibwadaazibwa, ate mu biseera ebiidha, obulamu obutawaagho. 31Aye abantu ab’emberi kamaala abaliba ab’ensembo n’ab’ensembo abaliba ab’emberi.”10:31: Mat 20:16; Luk 13:30
Ayogera ku kufa kwe omukuzi ogwokusatu
(Mat 20:17-19; Luk 18:31-34)
32Agho Abeegeresebwa baaba mu ngira nga baja e Yerusalemu, Yesu nga n’abembereiremu; beewuunhia inho era baamunonereza nga batya.
Kabiri yaatoola Eikumi n’Ababiri yaatoolera okubakobera ebija okumugwira, ng’akoba ati: 33“Mwetegereze, buti tuli kuja e Yerusalemu, Omwana w’Omuntu aidha kugheebwayo ye Bakabona Abakulu ni y’Abanamateeka. Abo baidha kumughaayo eri abamaghanga agandi, 34bamukiine, baamufuudheku amatanta, baamudaazedaaze era bamwite. Aye nga ghabise enaku isatu alizuukira.”
Okusaba kwa Yakobo ni Yoanne
(Mat 20:20-28)
35Agho Yakobo ni Yoanne, abaana ba Zebedaayo baaseeta aghaali Yesu baamukoba bati: “Mwegeresa, twenda otukolere kyonakyona kye tunaakusaba.” 36Yaabakoba ati: “Kiki kye mwenda mbakolere?”
37Baamukoba bati: “Tuganhe, omulala atyame ku mukono gwo omusaadha, ate owundi ku mugooda mu kitiisa kyo.”
38Yesu yaabakoba ati: “Kye musaba timukiidhi! Musobola okunhwa ekikopo kye nhwaku, oba okubatizibwa n’okubatizibwa kwe mbatizibwa?”10:38: Luk 12:50
39Baamukoba bati: “Tusobola.” Agho Yesu yaabakoba ati: “Ekikopo kye nhwa mulikinhwa, n’okubatizibwa kwe mbatizibwa mwena mulikubatizibwa. 40Aye eky’okutyama ku mukono gwange omusaadha oba ku mugooda ti ninze nkibagha, era ky’abo be kyategekerwa.”
41Bale Eikumi bwe baawulira, baasungughalira Yakobo ni Yoanne. 42Yesu yaabeeta yaabakoba ati: “Mwidhi muti abo ababalibwa nga bafuzi ba maghanga, bagafuga, era n’abakulu mu abo, baba n’obuyinza ku banaibwe.10:42-43: Luk 22:25-26 43Aye mu imwe tikiri kityo! Buli ayenda okuba omukulu mu imwe, abe mugheereza waimwe.10:43-44: Mat 23:11; Mar 9:35; Luk 22:26 44Era buli ayenda okuba asooka mu imwe, abe mwiru wa boonaboona 45kuba n’Omwana w’Omuntu tiyaidha kugheerezebwa aye kugheereza n’okughaayo obulamu bwe, olw’okununula abantu kamaala.”
Barutimao awonezebwa
(Mat 20:29-34; Luk 18:35-43)
46Agho baatuuka e Yeriko era yaava mu Yeriko ng’ali n’Abeegeresebwa be n’eikuukuubira ery’abantu. Barutimao omutulu, omwana wa Timao, eyali ng’asabiriza yali atyaime agho ku mbali ku ngira. 47Bwe yawulira ati Yesu Omunazarethi n’ali kubita yaatoolera okwasiikana ng’akoba ati: “Yesu, mwidhukulu wa Daudi, nsaasira.”
48Abantu kamaala baamukaabukira asirike, aye yayongera bwongere kwasiikana ati: “Mwidhukulu wa Daudi, nsaasira.”
49Yesu yaayemerera, yaakoba ati: “Mumwete.”
Agho baayeta omutulu nga bamukoba bati: “Guma omwoyo, situka, ali kukweta.”
50Agho yaasuula ere ekidhuuba, yaasituka mangu yaaja aghaali Yesu.
51Yesu yaamukoba ati: “Oyenda nkukolere ki?” Omutulu yaamukoba ati: “Rabboni”, ekitegeeza “Mwegeresa”, “Nhenda kwiramu kubona.”
52Agho Yesu yaamukoba ati: “Ja, okwikiriza kwo kukuwoniiza.” Era nga mangu ago airamu okubona, era yaamunonereza mu ngira.