8
Yesu awonia omuntu ow’endwaire ey’ebigenge
(Mar 1:40-45; Luk 5:12-16)
1Agho Yesu bwe yava ku lusozi, ebikunsu eby’abantu byamunonereza. 2Agho omuntu ow’endwaire ey’ebigenge yaidha ye Yesu yaakuba amakiryaivu yaakoba ati: “Musengwa, bw’oyenda oghanga okumponia.”
3Yesu yaagolola omukono gwe yaamugemaku ng’akoba ati: “Nhenda, wona.” Era mangu ago yaawona endwaire ey’ebigenge. 4Yesu yaamukoba ati: “Bona nti tokoberaku muntu, aye ja weeyandhule ewa kabona era ogheeyo ekirabo Musa kye yalagira, kwe banaakakalisa.”8:4: Lev 14:1-32
Yesu awonia omwiru ow’omukulu ow’ekikunsu eky’abaisirukale
(Luk 7:1-10)
5Yesu bwe yangira mu Kaperinaumu, Omukulu ow’ekikunsu eky’abaisirukale yaidha yaamweghemba, 6ng’akoba ati: “Musengwa, omugheereza wange agoomeire ghaka mu bulumi obubitirivu.”
7Yesu yaamukoba ati: “Leka ndidhe mmuwonie.”
8Omukulu ow’ekikunsu eky’abaisirukale yairamu ati: “Musengwa, tigwanira iwe kwingira mu ndhu yange, aye yogera bwogere kibono omugheereza wange aidha kuwona. 9Nze zeena ndi muntu atwalibwa, ate ndi n’abaisirukale be ntwala. Era bwe nkoba ono nti, ‘Ja,’ aja n’owundi nti, ‘Idha,’ aidha n’omwiru wange nti, ‘Kola kino,’ akikola.”
10Yesu bwe yawulira ebyo, yeewuunhia, era yaakoba abaali bamunonereza, ati: “Bwenebwene ka mbakobere tyagaananga muntu ali na kwikiriza nga kuno mu Isiraeli! 11Era ka mbakobere: abantu kamaala baliva ku luuyi olw’e buvandhuba n’olw’e bugwandhuba, baatyama ni Aburahamu, ni Isaaka, ni Yakobo mu Bwakyabazinga obw’omu igulu8:11: Luk 13:29 12aye abaana ab’omu Bwakyabazinga balibingirwa ku luya mu kizikiiza, omuliba okugegenga n’okuluma emba olw’obulumi obubitirivu.”8:12: Mat 22:13; 25:30; Luk 13:28 13Agho Yesu yaakoba omukulu w’ekikunsu eky’abaisirukale ati: “Ja, kikukolerwe nga bw’oikiriiza.”
Era mu saawa yeene eyo, omugheereza yaawona.
Yesu awonia abantu kamaala
(Mar 1:29-34; Luk 4:38-41)
14Agho Yesu yaatuuka mu nhumba ya Petero, yaabona mukoirume wa Petero nga alambaire agho omusuudha gumuli bubi. 15Yaamugema ku mukono, omusuudha gwamuleka yaasituka yaamugheereza.
16Obwire bwe bwali nga buziba, baamuleetera abantu kamaala abaaliku emizimu emibi era yaabinga emizimu egyo ng’ayogera bwogere, era yaawonia abalwaire boonaboona. 17Kino kyatuukiriza omulanzi Isaia kye yakoba ati:
“Yatuwonia ebituluma, yeetwika ebirwaire byaife.”8:17: Isa 53:4
Obuzibu obw’okunonereza Yesu
(Luk 9:57-62)
18Yesu bwe yabona ng’abantu kamaala bamwetooloire, yaalagira Abeegeresebwa be basomoke enhandha. 19Munamateeka mulala yaaseeta yaamukoba ati: “Mwegeresa ndidha kukunonereza buli gh’onaajanga.”
20Yesu yaamukoba ati: “Ebibe biri n’ebiina, n’enhonhi edh’omu ibbanga dhiri n’ebisu, aye Omwana ow’Omuntu azira gh’aisa mutwe.”
21Owundi, mulala ku Beegeresebwa be, yaamukoba ati: “Sooka onganhe nje nziike lata wange.”
22Aye Yesu yaamukoba ati: “Nnonereza, leka abafu baziike abafu baibwe.”
Yesu alekeza kiwunga
(Mar 4:35-41; Luk 8:22-25)
23Agho Yesu yaaniina eryato, n’Abeegeresebwa be baaja naye. 24Tibwalwa kiwunga ow’amaani yaasituka ku nhandha, amayengo nga genda kusaaniagho bwa lyato. Yesu yali atendwike. 25Kale Abeegeresebwa baaseeta gh’ali baamuzuusa nga bakoba bati: “Musengwa, tuwonie tuli kusaanagho.”
26Yesu yaabakoba ati: “Lwaki mutiire, imwe ab’okwikiriza okutono!” Yaasituka, yaakaabukira kiwunga n’enhandha, era kyaba mulaala inho.
27Abantu beewuunhia nga bakoba bati: “Ono muntu wa kika ki kiwunga n’enhandha ye biwulira!”
Yesu awonia abaaliku emizimu emibi e Gadara
(Mar 5:1-20; Luk 8:26-39)
28Agho bwe yatuuka eruuyi ere mu nsi ey’Abagadara, abantu babiri abaaliku emizimu emibi baamwagaana nga bava mu lwambiidhi omwaziikibwanga abantu, nga bakambwe ekibitiriire era nga ghazira muntu asobola kubita mu ngira eyo. 29Olwamubona baawowoigana nga bakoba bati: “Otwendeza ki iwe Omwana wa Katonda? Oidhie ghano okutudaazadaaza ng’obwire bukaali kutuuka?”
30Ghaaligho ekighaso eky’embiidhi kamaala edhaali dhiri kulya, nga dheeswireku akata. 31Emizimu gyamweghemba nga gikoba giti: “Bw’otubinga ghano, tusindike mu kighaso eky’embiidhi.”
32Yaagikoba ati: “Kale muje.” Agho gyabavaaku, gyaja mu mbiidhi. Ekighaso kyonakyona kyalindimukira ku kiyiriro embiidhi dhaagwa mu nhandha, dhaafiira mu maadhi.
33Abaali badhaaya baalumuka baaja mu kibuga, baaghaya byonabyona n’ebyafa ku baaliku emizimu. 34Agho ab’omu kibuga boonaboona baavaayo baidha ye Yesu. Era bwe baamubona baamweghemba ave mu kiketezo kyaibwe.