27
Yesu ng’ali mu maiso ga Pilato
(Mar 15:1; Luk 23:1-2; Yoa 18:28-32)
1Obwire bwe bwakya, Bakabona Abakulu boonaboona n’abakulu ab’ebika baateesa ensambo ey’okwitamu Yesu. 2Agho baamusiba baamutwala era baamughaayo ew’omufuzi Pilato.
Okufa kwa Yuda
(Bik 1:18-19)
3Agho Yuda, eyamulyamu olukwe, bwe yabona nga bamusalire gwa kufa, yeenenia. Yaizaayo ebitundu bya feeza bire amakumi asatu ye Bakabona Abakulu n’abakulu ab’ebika.27:3-8: Bik 1:18-19 4Yaabakoba ati: “Nayona okughaayo omusaayi ogw’omuntu azira musango.” Aye baamukoba bati: “Ebyo bibyo ife tibitugemaaku.”
5Agho Yuda yaasuula ebitundu bya feeza bire mu isinzizo. Yaava agho, yaaja yeetuga.
6Aye Bakabona Abakulu baatoola ebitundu bya feeza ebyo bakoba bati: “Tikiikirizibwa kuta mpiiya dhino mu ndyanga ya isinzizo, kuba mpiiya dha musaayi.” 7Agho ni baateesa, era baadhigulamu ekibandha eky’omuwumbi, nga n’omw’okuziikanga abatamanhiibwa. 8Kyova ekibandha ekyo kyetebwa ekibandha eky’omusaayi ni ye buli eno.
9Agho kyatuukirira Yeremia omulanzi kye yalanga ng’akoba ati: “Baatoola feeza emwamwa amakumi asatu, omughendo ogugula oyo, abandi ku bantu ba Isiraeli gwe baasalagho okumutunda,27:9-10: Zek 11:12-13 10baagulamu ekibandha eky’omuwumbi, nga Musengwa bwe yankoba.”
Pilato abuuza Yesu ebibuuzo
(Mar 15:2-5; Luk 23:3-5; Yoa 18:33-38)
11Agho Yesu yaayemerera mu maiso ag’omufuzi, Pilato era Pilato yaamubuuza ati: “Niiwe kyabazinga ow’Abayudaaya?” Yesu yaakoba ati: “Niiwe okyogeire.” 12Aye Bakabona Abakulu n’abakulu ab’ebika bwe baamuseegha azira kye yairamu.
13Agho Pilato n’okumukoba ati: “Towulira byaga agho bano bye bakuvunaana?”
14Yaaloba kumwiramu waire kibono kirala, era omufuzi oyo yeewuunhia ekibitiriire.
Yesu asalirwa ogw’okufa
(Mar 15:6-15; Luk 23:13-25; Yoa 18:39—19:16)
15Mperaano, buli ku lunaku olw’Ekibinuko eky’Okubitizibwa, omufuzi oyo yali amanhiriire okulekulirayo abantu omusibe mulala ye baabanga nga basabye. 16Ku mukuzi guno ghaaligho omusibe eyali amanhiibwa einho, nga ni Barabba. 17Kale, bwe baali nga beesoloiza, Pilato yaabakoba ati: “Mwenda mbalekulire ani? Barabba oba Yesu ayetebwa Kurisito?” 18Kuba yali aidhi nga baamughaayo lwa nsaalwa.
19Mperaano, Pilato bwe yali ng’atyaime ku kityamo kye eky’obulamuzi, mukazi we yaamutumira obukwenda nga bukoba buti: “Omuntu oyo azira musango otaba ni ky’omukola kuba ebintu by’oyo kamaala byandaaziiza mu kirooto.”
20Aye Bakabona Abakulu n’abakulu ab’ebika baapikiriza abantu basabe Barabba, aye Yesu aitibwe. 21Omufuzi oyo yairamu kabiri yaabuuza ati: “Ku babiri naani ye mwenda mbalekulire?” Baakoba bati: “Barabba.”
22Pilato yaabakoba ati: “Memale olwo Yesu ayetebwa Kurisito mmukole ki?” Boonaboona baakoba bati: “Mukomerere ku musalaba.”
23Aye yaabakoba ati: “Lwaki, yakola kibi ki?” Aye bale baakaalaama bukaalaame nga bakoba bati: “Akomererwe ku musalaba.”
24Pilato bwe yabona nga byonabyona bya bwereere, okudhagalala nga n’okuligho, yaatoola amaadhi yaanaaba mu ngalo mu maiso ag’eikuukuubira ng’akoba ati: “Nze nzira musango ku kuyugha omusaayi ogw’omuntu ono niimwe beene abalibona.”27:24: Ma 21:6-9
25Abantu boonaboona baakoba bati: “Omusaayi gwe gube ku ife ni ku baana baife.”
26Agho Pilato yaabalekulira Barabba ate Yesu nga bamaze okumuwaiga enkoba, yaamubagemya bamukomerere ku musalaba.
Abaisirukale badaaza Yesu
(Mar 15:16-20; Yoa 19:2-3)
27Agho abaisirukale ab’omufuzi oyo baatwala Yesu munda mu kisaagaati ekyetebwa Puraetorio, era eigye lyonalyona lyesololeza gh’ali. 28Baamutoolamu ebivaalo bye, baamuvaaza olugoye olw’ekitiibwa olwa kasaayisaayi. 29Baaluka engule ey’amawa baagimuta ku mutwe, baamugemya n’olugada mu mukono omusaadha. Agho ni baakuba amakiryaivu mu maiso ge baamukiina nga bakoba bati: “Ghangaala Kyabazinga ow’Abayudaaya!” 30Baamufuudhaku amatanta, baatoola olugada baamukonta mu mutwe. 31Agho nga bamaze okumudaazadaaza, baamutoolamu olugoye olumyufu, baamuvaaza ebivaalo bye, baamutwala okumukomerera ku musalaba.
Yesu aitibwa
(Mar 15:21-32; Luk 23:26-43; Yoa 19:17-27)
32Bwe baali bafuluma bati, baayagaana omusaadha Omukurenayo, ye baayetanga Simoni ono baamukaka okubbeeda omusalaba gwa Yesu. 33Baatuuka mu kifo ekyetebwa Gologotha, ekitegeeza ekifo eky’ekighanga. 34Agho baamugha omwenge ogw’emizabbibu okunhwa nga gutabwirwamu ekintu ekikaagha era bwe yakombaku yaaloba kugunhwa.27:34: Zab 69:21
35Bwe bamala okumukomerera ku musalaba, baagabana ebivaalo bye nga babikubaku akalulu.27:35: Zab 22:18 36Baatyama agho baamukuuma. 37Agho nga ghaigulu gh’omutwe gwe baataagho ensonga ye baamulanga ng’eghandiikiibwa eti: ONO NI YESU KYABAZINGA OW’ABAYUDAAYA. 38Baamukomerera n’abanhazi babiri omulala ku mukono omusaadha, ate owundi ku mugooda.
39Ababise baamuvuma bwe batengeesa emitwe gyaibwe,27:39: Zab 22:7; 109:25 40nga bakoba bati: “Iwe omenha eisinzizo, ate n’olizimba mu nnaku eisatu! Oba ng’oli Mwana wa Katonda weewonie, va ku musalaba oike.”27:40: Mat 26:61; Yoa 2:19
41Era ni Bakabona Abakulu baakoba n’ekirala, baamukiina, aghalala n’Abanamateeka n’abakulu ab’ebika baakoba bati: 42“Yawonianga abandi, mwene taghanga kwewonia! Mbu ni kyabazinga wa Isiraeli, mperaano aike ave ku musalaba, olwo tumwikirize. 43Yeesiga Katonda. Mperaano amuwonie, oba nga amwenda kuba yakobanga ati Mwana wa Katonda.”27:43: Zab 22:8 44Abanhazi be baamukomerera nabo boona batyo baamuduula.
Okufa kwa Yesu
(Mar 15:33-41; Luk 23:44-49; Yoa 19:28-30)
45Mperaano, okuva ku saawa eyomukaaga enzikiiza yaagema ensi yoonayoona okutuuka ku saawa eyomwenda. 46Era nga ku saawa eyomwenda, Yesu yaaleekaana ati: “Eloi, Eloi, lama sabakitani?” Ekitegeeza kiti: “Katonda wange, Katonda wange, lwaki ondekuliire agho?”27:46: Zab 22:1
47Abandi ku baali beemereire agho olwakiwulira baakoba bati: “Ali kweta Eliya!” 48Era mangu ago owundi yaalumuka yaatoola ekyangu yaakiinhika mu mwenge ogw’emizabbibu endoota, era yaakita ku lugada yaamugha anhwe.27:48: Zab 69:21
49Aye abandi baakoba bati: “Leka tubone oba nga Eliya anaidha okumuwonia.” 50Yesu kabiri yaaleekaana mu iroboozi ery’amaani, era bwe yamala yaisa omuuka ogwasembayo.
51Agho olusuubo olw’omu isinzizo lwakanukamu ghabiri, okuva ghaigulu okutuuka ghansi ensi yeesuukunda, embaale dhaayatika.27:51: Kuv 26:31-33 52Amagombe gaiguka, era emibiri kamaala egy’abatuukirivu abaafa gyazuukizibwa, 53baava mu magombe. Era ng’amaze okuzuukira baaja mu kibuga ekitukuvu era abantu kamaala baababona.
54Agho omukulu w’ekikunsu eky’abaisirukale n’abo abaali naye nga bakuuma Yesu bwe baabona musisi n’ebintu engeri ye byabaamu, baatya ekibitiriire, baakoba bati: “Bwenebwene, ono abaire Mwana wa Katonda!”
55Agho era ghaaligho abakazi kamaala, abaali bali kulengera nga baliku ghala, abaanonereza Yesu okuva e Galilaaya nga bamugheereza.27:55-56: Luk 8:2-3 56Mu abo mwalimu Maria Magadalene ni Maria mukaire wa Yakobo ni Yosefu, ni mukaire wa batabane ba Zebedaayo.
Okuziikibwa kwa Yesu
(Mar 15:42-47; Luk 23:50-56; Yoa 19:38-42)
57Eigulo bwe lyatuuka ghaidhagho omusaadha omukombe okuva mu Arimathea, eriina lye nga ni Yosefu, ate ng’era yali mwegeresebwa wa Yesu. 58Ono yaaja ye Pilato yaamusaba omulambo gwa Yesu. Pilato yaalagira bagumughe. 59Agho Yosefu yaatoola omulambo yaaguzinga mu lugoye olweru. 60Yaaguta mu magombe agage amayaaka, ge yali asimye mu lubaale. Agho yaagalangula ogubaale ogunene yaaguta mu mulyango ogw’amagombe, yaagolola. 61Maria Magadalene ni Maria ole owundi baali agho nga batyaime nga balingiriire amagombe.
62Ku lunaku olwairirira nga n’olunaku olwiririra okutegeka, Bakabona Abakulu n’Abafarisaayo baaja ewa Pilato. 63Baakoba bati: “Musengwa twidhukiire ng’omuguya oyo bwe yali ng’akaali mulamu yakoba ati, ‘Nga ghabiseegho enaku isatu ndizuukira.’27:63: Mat 16:21; 17:23; 20:19; Mar 8:31; 9:31; 10:33-34; Luk 9:22; 18:31-33 64Kale ni lagira amagombe gakuumirwe irala okutuusa olunaku olwokusatu, tomanha Beegeresebwa bwe baidha ni bamwiba ate ni bakoba bantu bati, ‘Azuukire mu bafu.’ Era olwo obuguya obunairirira bwidha kuba bubi okusinga obwasooka.”
65Pilato yaabakoba ati: “Abakuumi muli nabo. Muje mukuume nga bwe mughanga.” 66Agho baaja baakalangula amagombe nga eibaale balitaaku akamanhiso, era baataagho n’abakuumi.