26
Olukwe olw’okwita Yesu
(Mar 14:1-2; Luk 22:1-2; Yoa 11:45-53)
1Agho olwatuuka, Yesu bwe yamala okwogera ebyo byonabyona yaakoba Abeegeresebwa be ati: 2“Mwidhi ng’ebulayo enaku ibiri Ekibinuko eky’Okubitizibwa kituuke, era Omwana w’Omuntu aidha kugheebwayo akomererwe ku musalaba.”26:2: Kuv 12:1-27
3Agho Bakabona Abakulu n’abakulu ab’ebika beesololeza mu kisaagaati kya Kayafa Omukulu wa Bakabona, 4baasala olukwe olw’okugema Yesu mu ngiso bamwite. 5Aye Bakabona baakoba bati: “Tutakikola ku lunaku lukulu, tomanha bantu bwe bakola keegugungo.”
Yesu bamusiiga omuzigo e Bethania
(Mar 14:3-9; Yoa 12:1-8)
6Agho Yesu bwe yali e Bethania mu ndhu ya Simoni eyali n’endwaire ey’ebigenge, 7ng’ali ku kiiwulo alya, omukazi yaidha ng’ali n’akadoome ka alabasituro, nga kalimu omuzigo ogw’omughendo, yaagusiiga ku mutwe gwa Yesu!26:7: Luk 7:37-38 8Abeegeresebwa olwakibona baanakughala, baakoba bati: “Lwaki omuzigo ogwo gwonooneibwa? 9Omuzigo ogwo gwandibaire gusobola okutanibwamu empiiya kamaala, dhaagheebwa abaavu.”
10Aye Yesu yaakimanha, yaakoba ati: “Lwaki mutabula omukazi ono? Ekikolwa ky’ankoleire kikalamu 11kuba abaavu muli nabo buliidho, aye nze timwidha kuba ninze buliidho.26:11: Ma 15:11 12Era kino ky’akoze okunsiiga omuzigo ku mubiri kibaire kunziraga. 13Bwenebwene ka mbakobere: Buli Amawulire Amalungi gano ye galikoberwa, mu nsi yoonayoona, kino omukazi ky’akoze kyona kinaayogerwangaku okumwidhukira.”
Yuda aganha okulya mu Yesu olukwe
(Mar 14:10-11; Luk 22:3-6)
14Agho mulala ku ikumi n’Ababiri ayetebwa Yuda Isikarioti, yaaja eri Bakabona Abakulu, 15yaabakoba ati: “Munampaamu ki nze mmubagemye?” Baamugha ebitundu bya feeza amakumi asatu.26:15: Zek 11:12 16Era okuva ku olwo yaanoonia bwa kaghagaanhia ka kumubagemya.
Yesu alya embaga n’Abeegeresebwa be
(Mar 14:12-21; Luk 22:7-14, 21-23; Yoa 13:21-30)
17Ku lunaku olusooka mu dh’emigaati egitazimbulukusiibwa, Abeegeresebwa baidha ye Yesu baakoba bati: “Gha y’oyenda tukutegekere, y’onaaliira Ekibinuko eky’Okwidhukiriraku Okubitizibwa?”
18Yaakoba ati: “Muje ewa nankani mu kibuga, mumukobe muti Omwegeresa akobye ati, ‘Ekiseera kyange kituuse, ewuwo ye nnaaliira Ekibinuko eky’Okwidhukiriraku Okubitizibwa n’Abeegeresebwa bange.’ ”
19Abeegeresebwa baakola nga Yesu bwe yabakoba, baategeka Ekibinuko eky’Okwidhukiriraku Okubitizibwa.
20Eigulo bwe lyatuuka yaatyama ku kiiwulo ghalala n’Abeegeresebwa be eikumi n’ababiri. 21Bwe baali bali kulya yaakoba ati: “Bwenebwene ka mbakobere, mulala ku imwe aidha kumpaayo.”
22Abeegeresebwa baanakughala inho, era baatoolera okumukoba mulala mulala bati: “Musengwa, otakoba oti ninze?”
23Yesu yaabairamu ati: “Oyo akoza ninze mu kibya, oyo n’aidha okumpaayo.26:23: Zab 41:9 24Kale Omwana w’Omuntu aja kufa nga bwe kyamughandiikibwaku, aye akagwireku oyo anaaghaayo Omwana w’Omuntu! Omuntu oyo kyandimubeereire kikalamu nguli tiyazaalibwa.”
25Yuda, eyamulyamu olukwe, yaakoba ati: “Mwegeresa, otakoba oti ninze?” Yaamukoba ati: “Niiwe okyogeire.”
Ekyeigulo kya Musengwa
(Mar 14:22-26; Luk 22:15-20; 1 Kor 11:23-25)
26Bwe baali balya, Yesu yaatoola omugaati, yaagugha enkabi nga yeebaza, yaagumegulamegulamu, yaagha Abeegeresebwa yaakoba ati: “Mutoole, mulye guno mubiri gwange.”
27Ate yaatoola ekikopo, yeeyanza, yaakibagha ng’akoba ati: “Munhwe kuno mwenamwena 28kuba guno musaayi gwange, ogw’endagaano empyaka oguyuyibwa olw’abantu kamaala okusoniyibwa ebibi.26:28: Kuv 24:8; Yer 31:31-34 29Ka mbakobere: tiriirayo kunhwa ku kibala kino eky’omuzabbibu, okutuusa ku lunaku olwo lwe ndikinhwa n’imwe nga kiyaaka mu Bwakyabazinga bwa Lata wange.”
30Era bwe baamala okwemba olwembo baafuluma baaja ku Lusozi olw’Emiti Emyoliva.
Yesu akoba nga Petero bw’aidha okumwegaana
(Mar 14:27-31; Luk 22:31-34; Yoa 13:36-38)
31Agho Yesu yaabakoba ati: “Imwe mwenamwena, obwire bwaleero, mwidha kuneegaana kuba kyaghandiikibwa kiti, ‘Ndiita omwayi, n’entaama edh’omu kisibo dhaasansaana.’26:31: Zek 13:7 32Aye bwe ndimala okuzuukira ndibeesookayo e Galilaaya.”26:32: Mat 28:16
33Petero yaamwiramu ati: “Waire abandi boonaboona banaakwegaana, nze tiidha kukwegaana naire.”
34Yesu yaamukoba ati: “Bwenebwene ka nkukobere obwire bwaleero bwene, enkoko enaaba ekaali kukolyoka, ng’oneegaaniire emikuzi esatu.”
35Petero yaamukoba ati: “Ni bwe kiba nga kyetaagisa nze okufa n’iwe, tiidha kukwegaana naire.” Era n’Abeegeresebwa boonaboona baakoba batyo.
Yesu asaba e Gethisemane
(Mar 14:32-42; Luk 22:39-46)
36Agho Yesu yaatuuka nabo mu kifo ekyetebwa Gethisemane, era yaakoba Abeegeresebwa ati: “Imwe mutyame ghano, nze njenga ere nsabe.” 37Yaatoola Petero ni batabane ba Zebedaayo bombiriri yaaja nabo yaawulira enaku n’okweraliikirira. 38Agho yaabakoba ati: “Ndi n’enaku ku mwoyo eyenda kundhita. Imwe musigale ghano mumoge ghalala ninze.”
39Yeeyongerayooku katono, yaakuba amakiryaivu yaasaba ng’akoba ati: “Lata oba kisoboka mponia ekikopo kino, ti nga nze bwe nhenda, aye nga iwe bw’oyenda.”
40Yaidha eri Abeegeresebwa, yaayagaana nga batendwike, agho yaakoba Petero ati: “Olwo imwe timughanze kumogaku ninze saawa ndala eti? 41Mumoge era musabe mulobe kulebwa kuba omwoyo mumalirivu aye omubiri munafu.”
42Kabiri yaaja omukuzi ogwokubiri yaasaba ng’akoba ati: “Lata, oba nga ekikopo kino tikighanga kuntoolebwaku, okutoolaku nga nkinhweire, kikolebwe nga bw’oyenda.” 43Yaira kabiri, yaabaagaana nga batendwike, kuba amaiso gaibwe gaali gazitoighe.
44Yaabaleka kabiri yaaja yaasaba omukuzi ogwokusatu, ng’ayogera ebibono n’ebirala ebyo. 45Agho yaaja eri Abeegeresebwa yaabakoba ati: “Imwe buti mutenduke era muwuumule. Biwoire. Esaawa etuuse, era Omwana w’Omuntu aja kugheebwayo mu mikono egy’aboonooni. 46Musituke, tuje, anampaayo ali kumpi.”
Yesu bamugema
(Mar 14:43-50; Luk 22:47-53; Yoa 18:3-12)
47Yesu bwe yali ng’ayogera, Yuda, omulala ku Ikumi n’Ababiri yaatuuka n’eikuukuubira ery’abantu okuva eri Bakabona Abakulu, n’abakulu ab’ebika, nga bagemye empiima n’emiigo. 48Mperaano, eyamulyamu olukwe yabagha akamanhiso. Yali abakobye ati: “Ye nnaalamusa nga mmugwa mu kifuba nga n’oyo, mumugeme.”
49Era mangu ago olwatuuka ghe Yesu ng’amukoba ati: “Ba miraala Mwegeresa!” Ng’amugwa mu kifuba.
50Aye Yesu yaamukoba ati: “Muna kiki ekikuleese?” Agho, nga bale baseeta bamugema nga bamukalangula. 51Aye mulala ku abo abaali ni Yesu yaasowolayo empiima ye, yaatema omwiru w’Omukulu wa Bakabona yaamukutulaku kutu. 52Yesu yaamukoba ati: “Empiima yo giize mu kiruutu kyayo kuba abo boonaboona abakozesa empiima, empiima n’eribazikiriza. 53Olowooza oti tisobola kusaba Lata wange n’ampeereza magye ga bamalaika gaswika ikumi n’abiri buti buti? 54Aye ng’olwo kabiri Ebyaghandiikibwa bituukirira bitya, ebikoba biti kiri n’okuba kityo?”
55Mu saawa yeene eyo, Yesu yaakoba eikuukuubira ati: “Mwidhie okungema ng’abaja okugema omunhazi, mwaidha n’empiima n’emiigo? Buli lunaku natyamanga mu isinzizo naayegeresa, aye timwangema.26:55: Luk 19:47; 21:37 56Aye bino byonabyona bibairegho okutuukiriza ebyo ebyaghandiikibwa abalanzi.” Agho Abeegeresebwa boonaboona baamuleka baalumuka.
Yesu mu mbuga
(Mar 14:53-65; Luk 22:54-55, 63-71; Yoa 18:13-14, 19-24)
57Abo abaagema Yesu, baamutwala ewa Kayafa Omukulu wa Bakabona, eyeesolokeza Abanamateeka n’abakulu ab’ebika. 58Petero yaamunonereza ng’aleseeghooku akata, okutuukira irala mu kisaagaati eky’Omukulu wa Bakabona yangira yaatyama n’abakuumi, abone ebinairirira. 59Bakabona Abakulu, n’embuga yoonayoona, baanoonia obudhulizi obw’okusubaayiriza ku Yesu, kwe babe basinziire okumwita. 60Aye ti baabufuna naire, waire ng’abadhulizi kamaala abaguya baavaayo baamughaayira. Aye olumaliira babiri bavaayo, 61baakoba bati: “Ono yakoba ati asobola okumenha eisinzizo lya Katonda ate era mu nnaku isatu yaalizimba.”26:61: Yoa 2:19
62Omukulu wa Bakabona yaasituka, yaamukoba ati: “Bano bye bali kukuseegha, ozira ky’oiramu?” 63Aye Yesu yaasirika busirike. Agho Omukulu wa Bakabona yaamukoba ati: “Mu ga Katonda omulamu, tukobere oba nga niiwe Kurisito Omwana wa Katonda.”
64Yesu yaamukoba ati: “Niiwe okyogeire. Aye ka mbakobere: okuva ni buti, mwidha kubona Omwana w’Omuntu ng’atyaime ku luuyi olw’omukono omusaadha ogw’ow’obukumu, era ng’aidhira mu bire eby’eigulu.”26:64: Dan 7:13
65Agho Omukulu wa Bakabona yaakendebula ebivaalo bye, era yaakoba ati: “Avumye Katonda! Tukaayenderaki abadhulizi? Mumaze okuwulira bw’avuma Katonda!26:65-66: Lev 24:16 66Imwe mukoba mutya?” Baamwiramu bati: “Agwaine afe.”
67Baamufuudha mu maiso, baamudaazadaaza inho, baamukuba empi,26:67: Isa 50:6 68nga bwe bamukoba bati: “Kurisito, teeba, naani akukubye?”
Petero yeegaana Yesu
(Mar 14:66-72; Luk 22:56-62; Yoa 18:15-18, 25-27)
69Agho Petero bwe yali ng’atyaime agho ku luya mu kisaagaati, omughala yaaseeta gh’ali, yaakoba ati: “Iwe weena obaire ni Yesu Omugalilaaya.”
70Aye yeegaana mu maiso ga boonaboona ati: “Tiidhi ky’okoba.” 71Bwe yali afuluma ku luya omughala owundi yaamubona era yaakoba abaali beemereire agho ati: “Ono abaire ni Yesu ow’e Nazarethi.”
72Kabiri era yeegaana nga n’okwefuugha kw’ataire, ati: “Nze oyo omusaadha timwidhi.”
73Nga ghabiseegho akaseera katono, abaali beemereire agho baaseeta, baakoba Petero bati: “Bwenebwene oli munaibwe inho, kuba endhogera yo yeene ekuseegha.”
74Agho yaatoolera okwefuugha era n’okulayira ati: “Nze omusaadha timwidhi.” Era mangu ago, enkoko yaakolyoka. 75Petero yaidhukira ekibono Yesu kye yali amukobye ati: “Enkoko enaaba ng’ekaali kukolyoka, oidha kuba ng’oneegaine emikuzi esatu.” Agho yaafuluma ku luya, yaalira inho.