24
Okwonoonebwa okw’eisinzizo
(Mar 13:1-2; Luk 21:5-6)
1Agho Yesu bwe yava mu isinzizo, ng’agolola, Abeegeresebwa be baidha okumulaga enzimba ey’eisinzizo. 2Yaabakoba ati: “Ebyo byonabyona timuli kubibona? Bwenebwene ka mbakobere: Ghano tighaliba ibaale lirisigala ku liinaalyo nga tirisuuliibwa ghansi.”
Entandiikwa y’ebibonoobono
(Mar 13:3-13; Luk 21:7-19)
3Bwe yali ng’atyaime ku Lusozi olw’Emiti Emyoliva, Abeegeresebwa baidha y’ali mu kyama, baakoba bati: “Tukobere ebyo biribaagho li, era kiki ekiriba akamanhiso ak’okwidha kwo, n’okufundikira okw’ebyanda?”
4Yesu yaabairamu ati: “Mwekuume, ghalobe kubaagho abaghabya. 5Abantu kamaala baliidha mu liina lyange nga beeyeta nze, Kurisito, era balighabya abantu kamaala. 6Muliwulira entalo ghano ni ghale, mwekuume, mutatabulwa ebyo biri n’okubaagho, aye ng’enkomerero ekaali. 7Eighanga lirirumba liinaalyo, n’obwakyabazinga bwalumba bwinaabwo. Ghalibaagho endhala ni musisi mu biketezo kamaala. 8Aye bino byonabyona, biriba oti bisa ebisooka eby’omukazi alumwa.
9“Mu biseera ebyo balibagema baabaghaayo okudaazibwadaazibwa, n’okwitibwa. Abamaghanga agandi boonaboona balibakyagha nga babalanga nze.24:9: Mat 10:22 10Agho abantu kamaala baliterebuka, baaliidhaganamu enkwe, era baakyaghagana. 11Abalanzi abaguya kamaala baliboneka era balikyamya abantu kamaala. 12Olw’okuba obudheemu bulyeyongera, okugonza kw’abantu kamaala kuja kwiririra. 13Aye oyo alyekalangula okutuusa ku nkomerero, alirokoka.24:13: Mat 10:22 14Era n’Amawulire Amalungi ag’Obwakyabazinga galirangirirwa mu nsi yoonayoona, ng’amazima ag’okudhulirwa amaghanga goonagoona agho ni ng’enkomerero etuuka.
Ekyenhinhalwa Ekizikiriza
(Mar 13:14-23; Luk 21:20-24)
15“Kale bwe mubonanga Ekyenhinhalwa Ekizikiriza,24:15 Ekyenhinhalwa Ekizikiriza: Ekifaananie eky’omusambwa ogw’abamaghanga agandi ekyateebwagho mu isinzizo mu Yerusalemu. ekyayogerwaku Danieli omulanzi, nga kiri mu kifo ekitukuvu, asoma bino ategeere.24:15: Dan 9:27; 11:31; 12:11; 1 Bamak 1:54-61 16Abo abaliba mu Buyudaaya balumukiranga mu nsozi. 17Oyo aliba ghaigulu ku ndhu ataikanga kutoola mu ndhu ye bibye. 18Era oyo aliba mu nimiro atakyukanga kwira inhuma kunona kivaalo kye. 19Abalinda n’abayonsa mu nnaku edho nga balidaagadaaga inho! 20Musabe, obwire bwaimwe obw’okulumukiramu bulobe kubaagho mu biseera bya kiinhogogo oba ku Sabbato 21kuba ghalibaagho okudaagadaaga okw’amaani, nga tikubangaghooku kutyo okuva ku mainhama ag’ensi, okutuuka buti, era okutaja kubaagho kabiri.24:21: Dan 12:1; Kwol 7:14 22Nguli enaku edho tidhaakendeezebwaku, ghazira muntu yandiwonie. Aye ku lw’abalonde enaku edho dhirikendeezebwaku.
23“Agho ni bweghabaagho abakoba ati, ‘Bona, Kurisito wuuno’ oba ati, ‘Wuule.’ Mutaikirizanga 24kuba ghaliidhagho abantu abeeyeta Kurisito n’abeeyeta abalanzi, era baakola obumanhiso obw’amaani n’ebyewuunhio, nga benda okuwubania n’abalonde, bwe kiba kisoboka.
25“Mwekuume mbakobeire nga bukaali. 26Kale ni, bwe bakoba bati, ‘Kurisito ali mu irungu,’ timujangayo oba bati, ‘Wuuno, ali mu kisenge,’ mutaikirizanga.24:26-27: Luk 17:23-24 27Kuba ng’olukuba bwe lumyansa okuva ku luuyi olw’e buvandhuba ni lutuuka ku luuyi olw’e bugwandhuba, n’okwidha kw’Omwana w’Omuntu kutyo bwe kuliba. 28Aghaba omulambo ensega ghe dheesololeza.24:28: Luk 17:37
Okutuuka kw’Omwana w’Omuntu
(Mar 13:24-27; Luk 21:25-28)
29“Okudaagadaaga okw’enaku edho nga kwakawa, endhuba eriirugala, omwezi guliroba okwaka, emuunienie dhirimagalika okuva mu igulu, n’amaani ag’omu igulu galitengeesebwa.24:29: Isa 13:10; 34:4; Ezek 32:7; Yoe 2:10, 31; 3:15; Kwol 6:12-13 30Agho akamanhiso ak’Omwana w’Omuntu kaliboneka mu igulu era abantu boonaboona ab’oku nsi balikuba empungu, nga babona Omwana w’Omuntu aidhira mu bire eby’omu igulu n’amaani, n’ekitiisa ekinene. 31Eigwala ery’amaani bwe lirifuuwa, alituma bamalaika be baasoloza abalonde be okuva mu mpewo eina, okuva eigulu ye liva okutuusa ye likoma.
Ekyegerwa ku muti omutiini
(Mar 13:28-31; Luk 21:29-33)
32“Mwegere ku lufumo olw’omuti omutiini. Ensaga bwe dhiira obuto mumanha muti endoboozi eri kumpi. 33Kale imwe mwena bwe mubonanga ebintu bino byonabyona, mumanhanga muti ali kumpi, ku mulyango kwene. 34Bwenebwene ka mbakobere: abantu ab’oluse luno baliba bakaali kuwaagho ng’ebintu bino byonabyona bibairegho. 35Eigulu n’ensi biriwaagho aye ebibono byange tibiriwaagho.
Olunaku ni saawa tibimanhiibwa
(Mar 13:32-37; Luk 17:26-30, 34-36)
36“Aye ghazira aidhi lunaku olwo ni saawa, ni bwebaakaba bamalaika ab’omu igulu, waire Mwana, okutoolaku Lata yenka. 37Nga bwe kyali mu biseera bya Noa, ni mu kwidha kw’Omwana w’Omuntu bwe kiriba.24:37: Mainh 6:5-8 38Nga bwe kyali mu nnaku edho edhaakulembera amaadhi ag’omwidhuzo, abantu baali mu kulya na kunhwa, kubayiza na kubayira, okutuusa olunaku Noa lwe yangira mu lyato. 39Aye tibaamanha okutuusa amaadhi ag’omwidhuzo bwe gaidha ni gabasaaniagho. Kale atyo n’Omwana w’Omuntu bw’aliidha.24:39: Mainh 7:6-24 40Agho abaliba ababiri mu nimiro, omulala alitwalibwa owundi yaalekebwa. 41Ababiri abaliba basa ku lubengo, omulala alitwalibwa owundi yaalekebwa.
42“Kale ni mumoge, kuba timwidhi kiseera Musengwa waimwe ky’alituukiramu. 43Mutegeere ni kino: Nguli mwenemu amanha bwire ki omwibi bw’anaatuukiramu, nguli akuuma yaaloba kuganha ndhu ye kusimibwa.24:43-44: Luk 12:39-40 44Kale imwe mwena mwetegeke, kuba mu kiseera kye mutamusuubiriramu, Omwana w’Omuntu mw’alituukira.
Omugheereza omulungi
(Luk 12:41-48)
45“Naani omugheereza omulungi era omugezi? Oyo musengwa we ye yalekera ab’omu maka ge okubaghanga emere yaibwe mu kiseera ekituufu? 46Wa nkabi omugheereza oyo Musengwa we bw’aira n’amwagaana ng’ali kukola atyo. 47Bwenebwene ka mbakobere: Aja kumusigira ebibye byonabyona. 48Aye omugheereza bw’aba mubi n’akoba mule mu mwoyo gwe ati Musengwa we taidha kwira mangu, 49era n’atoolera okukuba bagheereza baine, n’okulya n’okunhwa n’abatamiivu, 50Musengwa w’omugheereza aliidha mu kiseera ky’atamusuubiriramu, ku saawa gy’ataidhi. 51Musengwa we alimubonereza inho, yaamuta mu bakuusa omuli okugegenga n’okuluma emba olw’obulumi obubitirivu.