16
Abafarisaayo basaba akamanhiso
(Mar 8:11-13; Luk 12:54-56)
1Agho Abafarisaayo n’Abasaddukaayo baaseeta aghaali Yesu, nga bamuleba, abaghe akamanhiso akava mu igulu.16:1: Mat 12:38; Luk 11:16 2Aye Yesu yairamu yaabakoba ati: “Eigulo bwe bwerituuka, mukoba muti, ‘Obwire bunaaba bukalamu kuba eigulu limyuse’ 3ate mu nkyo eigulu bwe limyuka mukoba muti, ‘Gazigwire era gandiba amabi.’ Mwidhi emboneka ey’eigulu ky’etegeeza aye mwaloba okumanha obumanhiso obw’ebiseera bino? 4Abantu ab’oluse luno aboonooni era abatatya Katonda benda akamanhiso! Ate nga akamanhiso tikaidha kubagheebwa, okutoolaku akamanhiso aka Yona.”16:4: Mat 12:39; Luk 11:29
Yaabavaaku yaaja.
Ekizimbulukusa eky’Abafarisaayo n’Abasaddukaayo
(Mar 8:14-21)
5Abeegeresebwa bwe baasomoka enhandha beerabira okutwala emigaati. Yesu yaabakoba ati: 6“Mwekuume era mwegendereze ekizimbulukusa eky’Abafarisaayo n’Abasaddukaayo!”16:6: Luk 12:1
7Aye baatoolera okwebuuzagania beene na beene nga bakoba bati: “Kuba tituleese migaati?”
8Yesu yaakimanha n’okubakoba ati: “Ye bano abali n’okwikiriza okutono! Lwaki mwogera ku ky’okubula emigaati? 9Mukaali kutegeera, naire okwidhukira emigaati etaanu gye mwagabula abantu enkumi eitaanu, n’ebiibo bye mwasoloza?16:9: Mat 14:17-21 10Waire emigaati omusanvu gye mwagabula enkumi eina, n’ebiibo bye mwasoloza?16:10: Mat 15:34-38 11Kale kitya bwe mutategeera nti bye mbakobye tibigema ku migaati? Aye mwegendereze ekizimbulukusa eky’Abafarisaayo n’Abasaddukaayo.”
12Agho ni baategeera bati takobye kwegendereza kizimbulukusa kya migaati, aye ebyegeresebwa Abafarisaayo n’Abasaddukaayo.
Petero ayatula ati Yesu ni Kurisito
(Mar 8:27-30; Luk 9:18-21)
13Agho Yesu bwe yatuuka mu biketezo bya Kaisaria Filippi, yaabuuza Abeegeresebwa be ati: “Omwana w’Omuntu abantu bamweta batya?”
14Baakoba bati: “Abandi bamweta Yoanne Omubatiza, abandi Eliya, ate abandi Yeremia, oba omulanzi ng’abalanzi abandi.”16:14: Mat 14:1-2; Mar 6:14-15; Luk 9:7-8
15Yaabakoba ati: “Aye imwe mundheta mutya?” 16Simoni Petero yaamwiramu ati: “Niiwe Kurisito Omwana wa Katonda omulamu.”16:16: Yoa 6:68-69 17Yesu yaamukoba ati: “Simoni mutabane wa Yona, oli wa nkabi, kuba ti muntu buntu eyakubwikulira ekyo, aye Lata wange ow’omu igulu. 18Era zeena ka nkukobere, Petero, ‘Oli lubaale, era ku lubaale kuno, kwe ndizimba Ekikunsu kyange eky’Abaikiriza mu Kurisito n’emiryango egy’e magombe tigirikisobola naire. 19Ndikugha ebisumuluzo eby’Obwakyabazinga obw’omu igulu, era kyonakyona ky’olisiba ku nsi nga ni mu igulu kisibiibwa, ate kyonakyona ky’olisimulula ku nsi nga ni mu igulu kisimulwirwa.’ ”16:19: Mat 18:18; Yoa 20:23 20Agho ni yaasikirira Abeegeresebwa obutakobera ku muntu yeenayeena bati ni Kurisito.
Yesu alanga okufa kwe n’okuzuukira
(Mar 8:31—9:1; Luk 9:22-27)
21Okuva ku olwo Yesu yaatoolera okulaga Abeegeresebwa be ati ali n’okuja e Yerusalemu, n’okudaazibwadaazibwa einho abakulu ab’ebika, Bakabona Abakulu, n’Abanamateeka, era bamwite, ate azuukire ku lunaku olwokusatu. 22Agho Petero yaamwiza gha mbali yaamukoba ati: “Musengwa tokoba otyo, Katonda agwana ayambe ebyo birobe kukutuukaku.” 23Aye Yesu yaakyuka yaakoba Petero ati: “Nva mu maiso Sitaani, oli kitimuguunha mu ngira yange kuba ebya Katonda tobitegeera, otegeera bya bantu.”
24Agho Yesu yaakoba Abeegeresebwa be ati: “Oba nga ghaligho ayenda okuunonereza, alobe kwefaaku naire, abbeede omusalaba gwe annonereze16:24: Mat 10:38; Luk 14:27 25kuba buli ayenda okuwonia obulamu bwe abufiirwa aye oyo afiirwa obulamu bwe ku lwange alibufuna.16:25: Mat 10:39; Luk 17:33; Yoa 12:25 26Omuntu aganhulwamu ki okufuna ensi yoonayoona aye n’afiirwa obulamu bwe? Oba omuntu aghanga kughaayo ki okununula obulamu bwe? 27Omwana w’Omuntu aja kwidha mu kitiisa kya Ise, ni bamalaika be, era buli muntu amughe ekimugwana ng’ajiira ku bikolwa bye.16:27: Mat 25:31; Zab 62:12; Rom 2:6 28Bwenebwene ka mbakobere ghaligho abandi ku beemereire ghano abataja kukomba ku kufa okutuusa nga baboine Omwana w’Omuntu ng’aidha nga Kyabazinga.”