10
Eikumi n’Ababiri
(Mar 3:13-19; Luk 6:12-16)
1Agho Yesu yaayeta Abeegeresebwa be Eikumi n’Ababiri, yaabagha obuyinza ku mizimu emibi bagibingenga era bawonienga kiisi bulwaire na bugodhe. 2Amaina ag’Abatume eikumi n’Ababiri ni gano: asooka ni Simoni ayetebwa Petero, ni Anderea muganda we, ni Yakobo mutabane wa Zebedaayo ghalala ni Yoanne muganda we. 3Filipo ni Barutholomayo, Thomasi ni Matayo omughooza, Yakobo mutabane wa Alufaayo ni Thaddaayo, 4Simoni Omukananayo ni Yuda Isikarioti eyamulyamu olukwe.
Eikumi n’Ababiri batumibwa
(Mar 6:7-13; Luk 9:1-6)
5Bano Eikumi n’Ababiri Yesu be yatuma, yaabalagira ati: “Mutajanga mu biketezo bya bamaghanga gandi, era mutangiranga mu bibuga bya Basamaria. 6Aye, muje eri entaama edhaabula edh’omu ndhu ya Isiraeli. 7Bwe muja mubakobenga muti, ‘Obwakyabazinga obw’omu igulu buseese.’10:7-15: Luk 10:4-12 8Abalwaire mubawonianga, abafu mubazuukizanga, abali n’endwaire ey’ebigenge mubalongoosanga, emizimu emibi mugibinganga. Mwafuna kya busa mwena mukigheerenga busa. 9Timutwalanga zaabu, waire feeza, waire mpiiya, 10waire nsawo ya lugendo oba ebivaalo ebibiri, waire ngaito oba mwigo kuba omukozi agwana okusasulwa enkemba ye.10:10: 1 Kor 9:14; 1 Tim 5:18
11“Mu buli kibuga oba kyalo kye munaajangamu, mwagale aganha okubakyaza era agho ghe mube mubenga okutuusa lwe muva mu kifo ekyo. 12Ate nga mungira mu ndhu eyo, mukobanga muti, ‘Emiraala gibe n’imwe.’ 13Era endhu eyo bw’eba ng’egwaine, emiraala gyaimwe ginaagisigalangaku aye bw’eba tegwaine, emiraala gyaimwe ginaabairiranga. 14Bwe ghabangagho omuntu yeenayeena aloba okubakyaza, oba okuwulira ebibono byaimwe, mukunkumulanga enkungu mu bigere byaimwe nga muva mu ndhu ye oba mu kibuga ekyo.10:14: Bik 13:51 15Bwenebwene ka mbakobere ku lunaku olw’okusalirwaku omusango, Sodoma ni Gomorra birisaasirwa okusinga ekibuga ekyo.10:15: Mat 11:24; Mainh 19:24-28
Abakoberaku ku kukirigibwa okw’okubaagho
(Mar 13:9-13; Luk 21:12-17)
16“Bona, ndi kubatuma, nga muli oti ntaama ghagati mu misege. Kale ni mube bakabwidhibwidhi ng’emisota, ng’ate muli bawolu ng’oti njiibwa.10:16: Luk 10:3 17Mwekuume abantu kuba balibaghaayo mu mbuga, era ni mu sinagoga dhaibwe, balibakuba enkoba.10:17-20: Mar 13:9-11; Luk 12:11-12; 21:12-15 18Balibatwala mu maiso ag’abafuzi ni bakyabazinga nga babalanga nze, mube badhulizi bange mu abo ni mu bamaghanga agandi. 19Aye bwe babaghangayo muteeraliikiriranga kye munaayogera, oba kye munaakoba kuba mu kaseera keene ako munaagheebwanga eky’okwogera. 20Ti niimwe munaayogeranga ku bwaimwe, aye Mwoyo wa Iseimwe.
21“Omuntu alighaayo muganda we okwitibwa ate omuzaire yaaghaayo omwana we, n’abaana balidheemera abazaire era baabaita.10:21: Mar 13:12; Luk 21:16 22Abantu boonaboona balibakyagha olw’eriina lyange. Aye oyo alyekalangula okutuusa ku nkomerero, alirokolwa.10:22: Mat 24:9; Mar 13:13; Luk 21:17 23Era bwe babakiriganga nga muli mu kibuga kino, mulumukiranga mu kindi kuba bwenebwene mbakobera: Timulimaza bibuga bya Isiraeli ng’Omwana w’Omuntu akaali kwidha.
24“Ayegeresebwa tasinga amwegeresa, waire omugheereza okusinga musengwa we.10:24: Luk 6:40; Yoa 13:16; 15:20 25Kimala ayegeresebwa okuba ng’omwegeresa we, n’omugheereza okuba nga Musengwa we. Kale oba nga mwenemu bamweta Beelezebulu, memale leero balyaza gha okubiiya ab’omu maka ge!10:25: Mat 9:34; 12:24; Mar 3:22; Luk 11:15
Ateekwa okutiibwa
(Luk 12:2-7)
26“Kale abo mutabatyanga kuba ghazira kibwikiibwa kitalibwikulibwa, oba ekigisiibwa ekitalimanhibwa.10:26: Mar 4:22; Luk 8:17 27Kye mbakobera mu kizikiiza, mukyogeranga mu musana ate kye muwulira mu kyama, mukirangiriranga ghaigulu ku mayumba. 28Mutatyanga abo abaita omubiri aye nga tibaghanga kwita mwoyo, aye mutye oyo aghanga okuzikiriza omwoyo n’omubiri mu geyeena. 29Kale enkazaluya eibiri tidhigula sente ndala eti? Ate nga ghazira ndala ku edho egwa ku itaka nga Lata waimwe tayenze. 30Aye imwe n’enviiri edh’oku mitwe gyaimwe dhoonadhoona mbale. 31Kale ni mulekenga kutya, muli ba mughendo okusinga enkazaluya kamaala.
Okwatula n’okwegaana Kurisito mu bantu
(Luk 12:8-9)
32“Kale, kiisi ayatula mu maiso ag’abantu ati wange, nze zeena ndikobera Lata wange ali mu igulu nti wange. 33Ate kiisi alineegaana mu maiso ag’abantu, nze zeena ndimwegaana mu maiso ga Lata wange ali mu igulu.10:33: 2 Tim 2:12
Ti miraala aye ntalo
(Luk 12:51-53; 14:26-27)
34“Mutadhuuba muti naidha kuleeta miraala ku nsi tyaidha kuleeta miraala, aye ntalo. 35Kuba naidha okuleetagho obutaisania ghagati gh’omwana ni lata we, ghagati gh’omughala n’inhina, ghagati gha namughala n’inhazaala we.10:35-36: Mik 7:6 36Era abazigu b’omuntu banaabanga ba mu ndhu beene.
37“Oyo agonza lata we oba inhina okusinga nze, tangwanira, n’oyo agonza mutabane oba mughala we okusinga nze, tangwanira. 38Oyo atabbeeda musalaba gwe n’annonereza, tangwanira.10:38: Mat 16:24; Mar 8:34; Luk 9:23 39Oyo agezaaku okuwonia obulamu bwe abufiirwa, ate oyo afiirwa obulamu bwe olw’okuba nze abuwonia.10:39: Mat 16:25; Mar 8:35; Luk 9:24; 17:33; Yoa 12:25
Omuntu ky’afuna olw’ekikolwa kye
(Mar 9:41)
40“Asangaalira imwe, aba asangaaliire nze ate asangaalira nze aba asangaaliire ole eyantuma.10:40: Mar 9:37; Luk 9:48; 10:16; Yoa 13:20 41Oyo asangaalira omulanzi olw’okuba nga mulanzi, empeera alifuna ya mulanzi n’oyo asangaalira omuntu akola ebituufu olw’okuba akola ebituufu, empeera alifuna ya muntu mutuufu. 42Era yeenayeena aligha omulala ku bato bano olwendo olw’amaadhi amainhogovu okunhwa, olw’okuba Mwegeresebwa wange, bwenebwene mbakobera nti taliroba kufuna mpeera ye.”