1
1Eno n’embaluwa eyakoopololwa ku ere Yeremia ye yagheereza abantu b’e Yerusalemu, agho nga kyabazinga w’e Babilonia ali kumpi okubagema abatwale e Babiloni. Erimu obukwenda Katonda bwe yalagira Yeremia okubagha.
Abantu batwalibwa mu bunhage baaba eyo ekiseera ekireeyiriri
2Mwakola ebibi ye Katonda, era eyo n’ensonga lwaki muli kumpi okutwalibwa kyabazinga Nebukadinezzari e Babiloni mu bunhage. 3Muliba eyo okumalira irala ense edhighera omusanvu, memale Katonda abaize eka mu miraala.
4Nga muli eyo e Babiloni mulibona bakatonda abaakolebwa mu miti, ni mu feeza, ni mu zaabu, abantu be babbeedera ku mabega gaibwe era abatiisa einho abantu abatatya Katonda. 5Kale mwegenderezanga obutakola ng’abamaghanga agandi abo bwe bakola. Mutaganhanga bakatonda baibwe kubatiisa, ni bwemubonanga nga bali kutwalibwa nga bagherekerwaku abantu olukunkumuli abali kubasinza. 6Aye mukobanga mule muti: “Musengwa, niiwe wenka ye tuteekwa okusinza.” 7Malaika wa Katonda aidha kubanga eyo n’imwe era aidha kubalabiriranga.
Obuteesobola obw’ebisinzibwa ebitali Katonda
8Ebifaananie byaibwe ebyo bye basinza baabirimbyaku feeza ni zaabu. Era enimi dhaabyo mu kanwa dhaakolebwa babaadhi. Aye nga ebintu ebyo tibiba bakatonda beene era tibyogera. 9Abantu bakola engule dha zaabu baadhita ku mitwe gya bakatonda baibwe abo, ng’oti se ebifaananie ebyo bifuuse baghala abenda einho okuvaala ebyamadholobera. 10Olwisi bakabona baiba feeza ni zaabu okuva ku bakatonda baibwe, baamukozesa ebyaibwe ku bwaibwe. 11Era baatoola owundi ku feeza ni zaabu oyo baamugha ba malaaya ab’omu masabo. Abantu batoola bakatonda abo abaakolebwa mu miti, mu feeza, ni mu zaabu, baabavaaza engoye ng’oti se bantu. 12Aye waire bakatonda abo babavaaza engoye dha langi ya nakasooma ng’oti bakyabazinga, tibasobola kwekuuma obutoonoonebwa n’obutaliibwa nseete. 13Enkungu ey’omu isabo bw’ebagwa mu maiso, ghateekwa okubaagho omuntu aidha n’agibisiimuulaku. 14Bagema emiigo mu ngalo ng’oti bafuzi, aye nga bazira bukumu bwonabwona bwa kubonereza muntu akoze ekibi ye bali. 15Olwisi bagema empiima oba empasa mu ngalo, aye nga tibasobola kwekuuma ni batazikirizibwa mu lutalo, oba ni batatwalibwa baibi. 16Ebyo byonabyona bikakasa nti ebintu ebyo ti bakatonda. Kale mutabisinzanga.
17Bakatonda abo nga bamaze okubatengeka mu masabo gaibwe baba bw’agho batyo nga bazira mugaso, ng’oti kibya kimenhefu. Amaiso gaibwe gaidhula nkungu abantu ye bafuumuula nga bangira mu masabo ago. 18Bakabona bagumiza irala amasabo ago, nga galiku endhigi engumu edhiriku ebisiba eby’ekyuma, olw’okulobera abaibi okumenha okwingira. Olwo baabasibiramu era baakalanguza endhigi ng’oti basibiiremu musibe ow’okwitibwa olw’okwiza omusango ku kyabazinga. 19Bakabona bakunaaniza bakatonda abo amataala agasinga ni bakabona abo beene ge beetaaga okubonesa, aye nga bakatonda abo tibasobola kubonaku waire eitaala eirala liti. 20Munda mw’ebifaananie ebyo enseete yalyamu ng’oti ni bw’erya empango dh’emiti edh’omu isabo, n’engoye dhaabyo dhoona dhaayonoonebwayonoonebwa. Aye ng’ekyo tibikiidhi naire. 21Mu maiso mwabiirugala olw’omwosi oguba mu masabo. 22Obuwundowundo, obumiini n’obunhonhi obundi, bwidha bwabityamaku. Ni kapa dhoona dhiidha dhaabityamaku. 23Ebyo byonabyona bikakasa nti ebintu ebyo tibiba bakatonda. Kale mutabisinzanga.
24Ebisinzibwa ebyo ebitali Katonda baabirimbyaku zaabu okubibonesa obulungi, aye tibimesunkana okutoolaku nga ghaligho abizigwire. Abagheesi ni bwe baali nga bali kuyugha ebyuma ebisaanuusiibwa mu butiba okubikola, ghazira kye byawulira naire. 25Ni bwebigulibwa omughendo omunene einho, bisigala nga tibisobola kugheera. 26Bonayo nga bwe bizira muganhulo. Tibisobola kutambula na bigere byabyo byene, bali na kubibbeeda bubbeede okuva mu kifo. 27Abo ababirabirira n’ensoni dhibagema, kuba ekindi ku ebyo bwe kigwa ghansi, baba bali na kukibbeedagho bubbeede. Omuntu bw’ayemereza ekindi mu kifo, tikisobola kuva mu kifo ekyo naire. Era ni bwe kiba nga kyeghendheike, tikighanga kwetereeza. Okughaayo ebirabo y’ebyo, kwagayaga n’okugha omulambo. 28Bakabona batunda ebiba bigheereibwayo ng’emisengo ye biri, baamala baakozesa empiiya edho beene. N’abakazi ba bakabona abo bakozesa omuunhu okukuuma ebindi ku ebyo ebiba bigheereibwayo ng’emisengo, birobe kwonooneka. Olwo babe nga basobola okubikozesa nga ghabiseeghooku ekiseera, mu kifo eky’okubigabira abaavu n’abo abazira babayamba. 29Ni bwe baba abakazi abali mu biseera byaibwe eby’okulwala oba abakaali abaibo, boona babaganha baagema ku misengo. Ebyo byonabyona bikakasa nti ebintu ebyo ti bakatonda. Kale mutabisinzanga.
30Ebintu ebyo ebyakolebwa mu miti ni mu feeza ni mu zaabu, bisobola bitya okwetebwa bakatonda, ng’ate n’abakazi babaganha okubigheereza ebigheebwayo? 31Bakabona baja baatyama ni mu masabo nga bali mu bivaalo ebikanufu eby’okuliriramu abafu, nga bamweireku enviiri, era nga ni ku mitwe tibaghembyeku naire. 32Bakabona bawologoma, baakaabuka, mu maiso ga bakatonda baibwe abo ng’oti se bali ku mukolo gwa kuziika. 33Babatoolaku ebivaalo, baabigha bakazi baibwe n’abaana baibwe. 34Omuntu ni bw’ayamba bakatonda abo oba n’akola ekibalumya tighaba ndhawulo naire, kuba tibasobola kwesasuuza. Tibasobola kufuula muntu kyabazinga, oba kutoola muntu ku kityamo kya bwakyabazinga. 35Era tibasobola kufuula muntu n’aba mukombe, oba okumugha ku mpiiya waire entono dhiti. Omuntu bw’abaaku kye yeeyamye ye bali aye n’atakituukiriza, tibasobola kumukaka kusasula kye yeeyama. 36Tibasobola kuwonia muntu kufa, oba okuyamba omuntu omunafu ng’ali kutuntuzibwa ow’amaani. 37Tibasobola kuzibula maiso ga mutulu n’airamu kubona, oba okutoola ku muntu enaku emugemye. 38Tibasobola kwoleka muntu yeenayeena busaasizi, oba okuyamba banamwandu oba bamulekwa. 39Ebintu ebyo ebikolebwa mu miti ni babirimbyaku feeza ni zaabu, bizira buyinza naire. Biri ng’oti n’eibaale lye balonze obulonde eyo mu nsozi, era abo boonaboona ababisinza baliswazibwa. 40Kale omuntu asobola atya okulowooza ati ebyo biba bakatonda beene, era asobola atya okubyeta Katonda?
Obusiru obuli mu kusinza ebitali Katonda
Abababilonia beene n’abaleetera bakatonda byaibwe okuwaamu ekitiibwa. 41Omuntu bw’aba nga tasobola kwogera bamutwala mu isabo, baasaba Beli amusobozese okwogera, ate nga Beli azira ky’ategeera.41: Isa 46:1 42Aye abantu ni bwe bategeera nga bakatonda baibwe tibasobola kubayamba, baja bwa mu maiso n’okubasinza olw’obusiru bwaibwe. 43Ti n’ekyo kyonka, aye n’abakazi beezingirira emigugha baatyama ku mbali okw’enguudo, baaniokeza obubbaani era beeghaayo nga bamalaaya. Bweghabaagho omusaadha n’atwala owundi ku abo naaba naye mu buliri, oyo ye batwaire bw’aira asekerera mukazi mwine amuliiraine olw’obutaboneka bulungi kimala, kusobola kulondebwamu. 44Ebintu byonabyona ebifa ku bifaananie ebyo, birimu obuguya. Kale omuntu asobola atya okulowooza ati ebyo biba bakatonda beene, era asobola atya okubyeta Katonda?
45Ababaadhi n’abagheesi ab’ebintu bya zaabu, n’abakola bakatonda abo. Kale bakatonda abo tibisobola kuba kintu kindi kyonakyona, okutoolaku ababikola abo kye benda babe. 46Oba nga abo ababikola beene tibaghangaala, memale basobola batya okukola katonda? 47Abantu abo bazira kindi kya kusikira kye balekera bantu ba nse dhiriiragho, okutoolaku obuguya n’okunhoomebwanga. 48Entalo n’okutabukatabuka bwe biidha, bakabona bategeka ghe banaalumukira beegise ni bakatonda baibwe. 49Kale oba nga ebifaananie ebyo ebisinzibwa ghazira kye bisobola kwekolera naire mu biseera eby’olutalo n’okutabukatabuka, lwaki abantu tibategeera ng’ebyo ti bakatonda?
50Ebifaananie ebyo biri miti buti gye balimbiizaaku feeza ni zaabu, era olunaku luja kutuuka kimanhikane bukalamu nti mu butuufu ti bakatonda naire. 51Amaghanga goonagoona ni bakyabazinga baja kukitegeera nti ebisinzibwa ebitali Katonda bikolebwa bantu buntu. Bizira buyinza Katonda bw’aba nabwo. 52Era buli muntu agwaine akimanhe nga mu butuufu ebintu ebyo ti bakatonda.
53Bakatonda abo tibasobola kufuula muntu yeenayeena kyabazinga, oba okugwisa amaadhi. 54Tibasobola kusalagho beene ku nsonga yoonayoona ebagemaku, oba okusaliragho omuntu ekituufu ng’abisiibwa obubi. Ghazira kintu kye basobola kukola naire era bazira muganhulo gwonagwona, bali ng’oti makoova agagulukira obw’omu ibbanga. 55Eisabo bwerigema omuliro, bakabona balumukagho okwewonia, baaleka omwo bakatonda abo be baakola mu miti ni babalimbyaku feeza ni zaabu, baaya ng’oti n’akasolya ak’emiti. 56Tibasobola kulwanisa bakyabazinga, oba okuja mu lutalo okulwanisa abazigu. Kale omuntu asobola atya okwikiriza ati abo ni Katonda?
57Ebifaananie ebyo bye baakola mu miti ni babirimbyaku feeza ni zaabu, tibisobola kwekuuma baibi na banhazi, 58abaidha ni babitoolaku feeza ni zaabu n’ebivaalo byabyo, ni baja nabyo byonabyona. Bakatonda abo ghazira kye basobola kukolagho, okubalobera okutwala ebintu ebyo. 59Ole okuba kyabazinga aziramu ntete oba okuba ekiwumbe ekiri n’omugaso ye mwene kyo, kusinga okuba ekisinzibwa ekitali Katonda. N’olwigi obwigi lusinga ekisinzibwa ekitali Katonda, kuba olwigi lukuuma ebintu ebiri mu ndhu. Ni bw’eba empango ey’omuti eri mu kisaagaati kya kyabazinga, ewula ekisinzibwa ekitali Katonda.
60Katonda yataagho endhuba n’omwezi n’emuunienie olw’okumuliikiriranga, era bimugondera. 61Era kityo bwekiri ku kumyansa kw’olukuba ni ku mpewo. Olukuba bwe lumyansa ab’okumpi n’ab’eghala balubona. Ate empewo bw’efuuwa etuuka buli ghantu. 62Katonda bw’alagira ebire byebambe bighembe ensi yoonayoona bimugondera. 63Era bw’asindika omuliro okuva mu igulu gwidhe gwokye ensozi n’ebibira, gukola nga bw’aba agukobye. Aye ebifaananie ebisinzibwa tibisobola kukola bintu ebyo naire. Era tibisobola kukola kintu kyonakyona kyefaanaanirizaaku n’ebyo. 64Kale lwaki bandibyese bakatonda ng’ate tibisobola kutuyamba oba kutukola kabi koonakoona? 65Mwidhi bukalamu nti ebintu ebyo ti bakatonda. Kale mutabisinzanga.
66Bakatonda abo bazira buyinza ku bakyabazinga. Tibasobola kubakolimira waire okubagha enkabi. 67Tibasobola kugha maghanga kamanhiso koonakoona ku igulu. Era tibasobola kwaka ng’oti ndhuba oba mwezi. 68N’ensolo obusolo edh’omu nsiko dhisinga ebifaananie ebyo, kuba dhisobola okulumuka aghali akabi dheewonia. 69Agho ni kyeyoleka bukalamu nti ebintu ebyo ti bakatonda. Kale mutabisinzanga.
70Bakatonda baibwe abo be baakola mu miti ni babalimbyaku feeza ni zaabu, omugaso gwaibwe guli ng’oti n’ogw’ekifaananie kye bata mu nimiro okutiisa enhonhi, aye nga kizira kye kiri kukuuma naire. 71Omugaso gwaibwe era guli ng’oti n’ogw’ekisaka eky’amawa ekiri mu nimiro. Mu kifo eky’okulobera enhonhi okwidha mu nimiro, kidhigha bwa kifo kirungi kya kwegisaamu. Bakatonda abo bali ng’oti n’omulambo gwe baswire kuliya mu nzikiiza. 72Engoye empegheevu edha langi ya nakasooma dhe bavaala dhivunda, ekyo kyatuleetera okumanha nti ti bakatonda. Era oluvainhuma lwa byonabyona baja kuliibwa enseete, olwo nga buli ghantu tighakaaligho muntu yeenayeena abafunamu muganhulo.
73Omuntu akola ebituufu asingaku abantu abandi boonaboona, kuba aba azira kisinzibwa kyonakyona kitali Katonda, era eba ng’ezirayo kisinzibwa ekitali Katonda ekisobola okumusirughaza.