EKITABO KYA
YOELI
ENHANDHULA
Ebintu bitono inho ebimanhiibwa ku mulanzi ono Yoeli. N’ebiseera byene bye yabeeragho byona tibimanhiibwa mu bukakafu. Aye kiboneka ng’oti ekitabo kino kyaghandiikibwa mu kyasa ekyokutaanu oba ekyokuna nga Kurisito akaali kwidha. nga Kurisito akaali kwidha: Kurisito bwe yali ng’akaali kwidha, ebyasa baabibalanga nga baira inhuma, emyaka gyajanga nga gikendeera. Ate bwe yamala okwidha, baatoolera okubibala nga baja emberi, emyaka gyajanga nga gyeyongera obungi ng’oti ni bwetukola mperaano. Ekyo n’ekiseera obwakyabazinga obw’Abaperusia ghe bwabeereragho.
Yoeli ayogera ku nzige edhaalumba ensi Palesitina, era yaayogera ni ku ndoboozi enkakali eyagwa mu nsi eyo. Ebintu ebyo byombi ebyaidhira ensi eyo, Yoeli abibona ng’akamanhiso ak’okwidha kw’Olunaku lwa Musengwa Katonda; ekyo nga n’ekiseera Musengwa Katonda ky’alibonerekezaamu abo abaloba okukola ebituufu by’ayenda.
Yoeli akobera abantu ati Musengwa Katonda abeeta beenenie, era abasuubiza okubaizaagho obuyaaka, n’okubagha enkabi. Era ati Musengwa Katonda oyo asuubiza n’okusindika omwoyo gwe gwike ku bantu be boonaboona: ka babe abasaadha, oba abakazi, oba abaana abato, oba abakaire.
Ebirimu nga bwe biiraganwaku
Ekibamba eky’enzige kiidha 1:1—2:17
Katonda asuubiza okwiza abantu obuyaaka 2:18-27
Olunaku lwa Musengwa Katonda 2:28—3:21