EKITABO KYA
YOBU
Enhandhula
Ekitabo kya Yobu kyogera ku musaadha ow’empisa enkalamu, eyatuukibwaku ebizibu ebitaloodheka: n’afiirwa abaana be boonaboona, n’ebintu bye byonabyona, era n’alwala obulwaire obubi obugemya entiisa.
Mu mpayo isatu edhiiraganwaku nga dhiri mu nsambo ya ndheso, omughandiisi ayoleka ekyo bakagwa ba Yobu ni Yobu mwene, kye baalowooza ku bizibu ebyo. Mu mpayo edho baghaanhisagania ebidhuubo ku nsambo Katonda y’akolaganamu n’abantu. Era ku nkomerero ya byonabyona, Katonda mwene abonekera Yobu.
Bakagwa ba Yobu bainhonhola amakulu ag’okudaazibwadaazibwa kwe, nga bajiira ku bye baali baidhi mu idiini lyaibwe: nga bakoba bati, buliidho Katonda agha abalungi empeera, ate yaabonereza ababi. Agho ni, okudaazibwadaazibwa kwa Yobu kutegeeza nti yali ayonoine. Aye Yobu ekyo nga takiikiriza. Yalowooza ati yali tagwaniire kibonerezo kikakali ng’oti n’ekyo, kuba yali wa mpisa nkalamu era nga mutuufu mu bye yakolanga. Yalemwa okutegeera ensonga Katonda kw’asinziira okuleka omuntu omukalamu atyo, okutuukibwaku ebizibu ebyaga agho. Kale yaakana yaasonsoonia Katonda, aye nga taswire ere kwikiriza kwe. Yayenda okusiimibwa mu maiso ga Katonda, era n’okwiramu okuba n’ekitiisa ekigwanira omuntu omukalamu.
Ku nkomerero, Katonda mwene abonekera Yobu. Katonda tairamu bibuuzo bya Yobu. Aye ayoleka Yobu obukumu n’amagezi by’ali nabyo mu bitonde bye, ng’akozesa endheso. Agho Yobu yeemenha, yaikiriza ati Katonda n’omugezi era omukologho. Era Yobu yeenenia olw’ebibono eby’obusungu einho bye yayogera.
Ekitabo kifundikira nga kyoleka nga Katonda bw’airamu okugha Yobu obulamu obukalamu, okusinga ni bwe yalimu mu kusooka. Katonda anenia bakagwa ba Yobu olw’okulemwa okutegeera amakulu g’okudaazibwadaazibwa kwa Yobu. Yobu yenka n’eyasobola okutegeera nti Katonda mukologho inho okusinga endhegeresa y’eidiini lyaibwe bweyali ekoba.
Ebirimu nga bwe biiraganwaku
Ebisookerwaku 1:1—2:13
Yobu ni bakagwa be 3:1—31:40
a. Yobu yeemuluguunhia 3:1-26
b. Olughayo olusooka 4:1—14:22
c. Olughayo olwokubiri 15:1—21:34
d. Olughayo olwokusatu 22:1—27:23
e. Okusaaka amagezi 28:1-28
f. Yobu bye yasembyayo okwogera 29:1—31:40
Olughayo lwa Elihu 32:1—37:24
Musengwa Katonda airamu Yobu 38:1—42:6
Ebisembayo 42:7-17