19
Yobu anenia bakagwa be olw’okumuvuma
1Agho Yobu yairamu ng’akoba ati:
2“Mulituusa gha okuneeraliikiriza n’okuunumiriza n’ebibono.
3Mwiragainemu emikuzi kamaala nga muli ku nze mwevumira,
timuswalaku kumbisa mutyo?
4Ni bwe kyandibaire ekituufu nti nasobya,
ensobi yange imwe yandibagemeireku gha?
5Muli kuneekuluntalizaaku muti munsinga,
era mwatoola enaku yange mwagifuula obukakafu nti ndi mwonooni.
6Aye mugwaine mukimanhe muti Katonda n’antuusisaaku ekyo,
ng’anzingiza n’olutuula okungemya.”
Yobu yeemuluguunhiza Katonda olw’okumubisa ng’omuzigu
7“Bona, ndi kwasiikana nti, ‘Bandhita’,
aye ghaabula ampulira;
ndi kukuba enduulu aye ghazira ali kumbisa mu butuufu.
8Katonda asembye engira yange, nzira bwe mbitagho;
ansibiire mu nzikiiza, tikaabona ye nja.
9Antoireku ebitiibwa,
yantoola n’engule ku mutwe.
10Antenteine ku ndhuyi dhoonadhoona,
tikaaliku ni bwendi?
Eisuubi lyange aliiyeegho ng’oti muti.
11Angemeirwa obusungu obwaka ng’oti muliro;
ali kumbisa ng’oti ndi muzigu we.
12Amagye ge gaidhira ghalala nga gategeka okuunumba,
gaabwama okuzingiza weema yange.”
Yobu akoba ati abantu be bamweyawireku
13“Katonda andhawukainia ni baganda bange,
n’abamanhe mbafuukiire ng’oti mugwira.
14Aboluganda ni bakagwa bange baneetoireku.
15Abantu be nakyazanga ewange baneerabiire,
abairu bange abakazi bambisa ng’oti mugwira era ow’endha.
16Bwe ndheta omwiru tanvugira,
ni bwe mmwegayirira tanfaaku.
17Mukazi wange aneesuula ghala olw’omuuka gwange;
baganda bange tibanseetaku.
18N’abaana abato baanhooma, bwe bambona bansekerera.
19Bakagwa bange einho bankyaye;
abo be nagonzanga einho baneegaine.
20Omubiri guneeriipye ku magumba,
mponeire ghatono obutafa.
21Munsaasire, munsaasire imwe bakagwa bange,
kuba Katonda ankubye.
22Ku lwaki Katonda ankiriga, n’imwe mwena ni munkiriga?
Okudaazibwadaazibwa okwo kwe ntuuseeku tikubamala?”
Yobu ali n’amudhulira mu igulu
23“Ngoli okwemuluguunhia kwange kughandiikiibwa,
ni kukubwa mu kitabo!
24Ngoli kubaadhiibwa mu lubaale n’ekyuma ekisongovu,
ni baidhuza mu nukuta eisasi eisaanuuse,
olwo kusomebwenga enaku dhoonadhoona.
25Aye ndidhi ng’Omununuzi wange mulamu,
era n’alisalagho eky’enkomerero ku nsi.
26Ndibona Katonda nga ndi n’omubiri,
waire ng’endwaire egumazeegho.
27Ndimubona nze mwene n’amaiso gange,
nga n’oyo mwene, se ti wundi.
Omwoyo gwange gweraliikirira
28kuba mukoba muti, ‘Ka tumukirige inho,
olw’okuba ensonga kwe tusinziira eva mu mwene.’
29Aye mpegaano mutye empiima:
empiima eyo ereeta ekibonerezo kya Katonda ku babi,
olwo mumanhe nti eriyo okusala omusango.”