16
Yobu yeemuluguunhiza bakagwa be olw’obutamusaasira
1Agho Yobu yairamu ng’akoba ati:
2“Mpuliire ebintu kamaala ebiri ng’oti n’ebyo.
Kale okunsaasira kwaimwe, nnaku ndhereere.
3Ebibono ebyo ebiri ng’oti mpewo buwewo, tibiikome?
Ye kiki einho ekikusonsooniiza okundhiramu otyo?
4Zeena nandisoboire okwogera nga bwe mwogeire,
ngoli niimwe omuli mu mbeera nze ye ndimu.
Nandiboogereire ebisongovu,
nga bwe ntengeesa n’omutwe nga mbanhooma.
5Nandyogeire ebibagumya na munwa bunwa gwonka,
era bye nandibakobye obukobe byandibamaze okubawoleezaaku
ku bulumi bwaimwe.”
Yobu yeemuluguunhiza Katonda olw’okumudaazadaaza
6“Aye ni bwe ndhogera ntya, obulumi bwange tibuwoleera.
Ni bwe nsiriikirira ntya, tighegheeraku naire.
7Katonda wange, bwenebwene ommaze amaani,
n’abantu bange boonaboona obazikiriiza.
8Omaze okunsiba, oli muzigu wange.
Obugoogombe bwange, abantu kwe bava okukakasa
bati omusango gunsinga.
9Katonda ankyaye era mu busungu bwe yandhuzayuza;
omuzigu wange oyo antunguliire amaiso.
10Abantu baaningiriire baayasaamirira.
Baneebbuuseeku bankuba empi ku matama.
11Katonda ampaireyo y’ababi, yansuula mu ngalo dh’aboonooni.
12Nali nga ntyamiisa,
aye yaidha yankontakonta yangema mu mamiro,
yankuba ekigwo ghansi yaamaniangula.
Yantaagho ng’ekintu eky’okwegeraku endeega,
13olwo abalasa obusaale bwe baaneezungulula.
Atulisa ensigo dhange n’akasaale aghazira kusaasira naire,
yaafumita akaka kange, amaadhi gaamu gaayuyika ku itaka.
14Anumba ng’oti n’omulwani ow’omu lutalo,
yaamenhamenha buli buyungiro bwange.
15Neetungiire ekutiya era naagivaala olw’okunakughala,
era naagyeta ku mubiri.
Mpoiremu amaani, naagalaamirira agho mu nkungu.
16Amaiso gaamyuse olw’okulira,
era ganzimbye gaidhaku ekifu.
17Ate nga tikolangaku bukambwe,
era nsinza Katonda bukalamu.”
Yobu ali n’amudhulira mu igulu
18“Iwe ensi otalobera musaayi gwange, n’ogulobera kululuma;
otaganha kulira kwange kusirisibwa.
1916:19: Yob 19:25 Ni mu kaseera kano mu igulu eriyo andhulira;
ghaigulu eyo eriyo ansemba nga ndi mutuufu.
20Bakagwa bange baanhooma,
aye ye Katonda ye numukira nga ndira amaziga.
21Nandyenze ghabeegho ampolerezaayo ye Katonda,
ng’oti n’omuntu bw’awolerezaayo muntu mwine,
eri omuntu amuvunaana omusango.
22Kuba emyaka mitono gye nsigaiza,
ntambule okuja eyo ye ntaliva kwira.”