AMAWULIRE AMALUNGI NGA BWE GAAGHANDIIKIBWA
YOANNE
Enhandhula
Mu Kitabo kino eky’Amawulire Amalungi nga bwe gaaghandiikibwa Yoanne, Yoanne oyo alaga nga Yesu ni Kibono wa Katonda atawaagho “eyafuuka omuntu era n’aba mu ife.” Ng’ekitabo kino kyene bwe kikoba, Amawulire gano Amalungi gaaghandiikibwa, abo abagasoma basobole okwikiriza nga Yesu n’Omulokozi, Katonda ye yasuubiza; nga n’Omwana wa Katonda; era nga basobola okufuna obulamu obutawaagho lwa kumwikiriza (20:31).
Oluvainhuma olw’enhandhula eraga nga Yesu bw’ali Kibono wa Katonda atawaagho, mu kimega ekiinhama ekitabo kino mulimu ebyewuunhio eby’endhawulo ebiraga nga Yesu bw’ali Omulokozi, Katonda ye yasuubiza, era Omwana wa Katonda. Ku bino kwiraku empayo edhiinhonhola ebyo ebyewuunhio bye byoleka. Ghano ekitabo ghe kitukoberera ng’abantu abandi bwe baikiriza Yesu era ni bamunonereza, ate abandi ni bamutakania era ni baloba okwikiriza. Enkenga dhino: 13—17, dhoogera ku bintu kamaala ebyoleka okwisania okw’amaani okwaligho ghagati gha Yesu n’Abeegeresebwa be obwire obwo Yesu bwe baamugemeramu ni bamughaayo. Era mu nkenga edho twagaanamu Yesu bye yakoba Abeegeresebwa be ng’abategeka okuguma mu bwire obwo bwe baamugemeramu memale ni bamala bamukomerera ku musalaba. Enkenga edhifundikira ekitabo kino dhoogera ku kugemwa kwa Yesu, okuwozesebwa, okukomererwa ku musalaba, okuzuukira n’okubonekera Abeegeresebwa be ng’amaze okuzuukira.
Olughayo olugema ku mukazi ye baagema ng’ali mu bwenzi (8:1-11) lusibiibwa mu bumanhiso obufaanana buti: [ ], kuba lwagaanibwa mu bighandiiko ebindi eby’eira eby’Endagaano Empyaka, aye nga mu bindi luziramu.
Yoanne alaga obukulu obw’ekirabo eky’obulamu obutawaagho omuntu ky’afuna olw’okwikiriza Kurisito. Ekirabo ekyo kitoolera buti era nga kigheebwa abo abajiira ku Yesu nga n’engira, amazima era obulamu.
Ekisinga kweyoleka mu kitabo kino, n’ensambo Yoanne yaakozesaamu ebintu eby’omu bulamu obwabuliidho okusonka ku by’amazima eby’omwoyo nga: amaadhi, omugaati, obutangaavu, omwayi n’entaama dhe, omuzabbibu n’ebibala byaku.
Ebirimu nga bwe biiraganwaku
Enhandhula 1:1-18
Yoanne Omubatiza n’Abeegeresebwa ba Yesu abaasooka 1:19-51
Okwegeresa kwa Yesu mu bantu 2:1—12:50
Enaku edhaasembayo okumpi ni Yerusalemu, ni munda mwakyo 13:1—19:42
Okuzuukira n’okweyoleka kwa Musengwa 20:1-31
Okuzuukira n’okweyoleka kwa Musengwa okundi mu Galilaaya 21:1-25