EKITABO KYA
YEREMIA
Enhandhula
Yeremia omulanzi yaligho okuva agho ng’ekyasa ekyomusanvu kiwaaku okutuusa ng’ekyasa ekyomukaaga kyakatoolera, Kurisito ng’akaali kwidha.Kurisito ng’akaali kwidha: Mu biseera ebyaligho nga Kurisito akaali kwidha, ebyasa baabibalanga nga baira inhuma, emyaka gyaja nga gikendeera. Ate bwe yamala okwidha, baatoolera okubibala nga baja emberi, emyaka gyaja nga gyeyongera obungi ng’oti ni bwetukola mperaano. Ekiseera kye yamala ng’akola ogw’obulanzi kyali kireeyi. Yalabulanga abantu ba Katonda akabi akaali kaja okwidhira eighanga lyaibwe, olw’okusinzanga ebitali Katonda n’okukolanga ebibi ebindi kamaala. Akabi ke yalanga kaatuukirira yaakabonaku ng’akaali mulamu: kyabazinga Nebukadinezzari ow’e Babilonia yaaghangula Yerusalemu, ekibuga ekyo Yerusalemu baakizikiriza era baazikiriza n’eisinzizo, ni kyabazinga wa Buyudaaya era n’abantu abandi kamaala baabatwala e Babilonia mu bunhage. Yeremia era yalanga ati ekiseera kirituuka abantu baira okuva mu bunhage, n’eighanga lyaibwe lyairagho buyaaka.
Ekitabo kya Yeremia kisoboka okwawulwamu ebitundu bino: (1) Okwetebwa kwa Yeremia. (2) Obukwenda Katonda bwe yagha eighanga Buyudaaya n’abafuzi baalyo, mu biseera Yosia ni Yehoiakimu ni Yehoiakini ni Zedekia, bye baafugiramu Buyudaaya. (3) Ebintu ebikulu Baruku omughandiisi wa Yeremia bye yaghandiika ebyajanga nga bibaagho mu bulamu bwa Yeremia, nga n’omuli n’ebyo Yeremia bye yalanganga. (4) Obukwenda bwa Katonda obugema ku maghanga agandi ag’endhawulo. (5) Enhongereza ey’ebyafaayo ebigema ku kugwa kwa Yerusalemu, n’okutwala abantu mu bunhage e Babilonia.
Yeremia yali muntu alumirwa einho abantu be era ng’abagonza inho. Kale nga kimuluma inho okubasalira omusango n’okulanga nga bwe baja okubonerezebwa. Mu bye yaghandiika, emikuzi kamaala ayogera n’enaku nhingi ku ebyo ebyamutuukaku ni bimulumya einho olw’okuba Katonda yamweta okuba omulanzi. Ekibono kya Katonda kyali ng’oti bwa muliro ogwalinga mu mwoyo gwe, nga tasobola butakifulumya mu kanwa.
Ebindi ku bibono ebikulu einho mu kitabo kino, byoleka biti ng’ekiseera kya Yeremia ekyalimu ebizibu kiwoireku, Katonda alikola endagaano empyaka abantu be, ye banaakuumanga nga tibakeetaaga mwegeresa kubaidhusa, kuba Katonda mwene n’aligighandiika ku myoyo gyaibwe (31:31-34).
Ebirimu nga bwe biiraganwaku
Okwetebwa kwa Yeremia 1:1-19
Obulanzi mu biseera eby’obufuzi bwa Yosia, ni Yehoiakimu, ni Yehoiakini, ni Zedekia 2:1—25:38
Ebintu ebyaligho mu bulamu bwa Yeremia 26:1—45:5
Obulanzi obuvumirira amaghanga 46:1—51:64
Ekibuga Yerusalemu kigwa 52:1-34