13
Ekivaalo ky’omu nkende eky’olugoye olughegheevu
1Agho Musengwa Katonda yankoba ati: “Ja weegulire ekivaalo ky’omu nkende eky’olugoye olughegheevu, okyesibe mu nkende aye nga tokyoziizaamu.” 2Agho naakigula era naakyesiba mu nkende. 3Kabiri Musengwa Katonda yankoba ati: 4“Toola ekivaalo ky’omu nkende ekyo, oje okikweke mu kiina ekiri mu lwatika olw’olubaale okumpi n’omwiga Eufurate.” 5Kale naaja naakikweka kumpi n’omwiga ogwo Eufurate.
6Nga ghabiseegho enaku kamaala, Musengwa Katonda yankoba ati: “Situkiramu oje ku mwiga Eufurate, otooleyo ekivaalo ky’omu nkende kye nakulagira okukwekayo.” 7Agho nairayo ku mwiga Eufurate, naanoonia ekivaalo ekyo mu kifo mwe nakikweka. Aye naja okukyagaana nga kyonooneike era nga tikikaali na mugaso naire.
8Agho Musengwa Katonda yankoba ati: 9“Nze Musengwa Katonda ntyo bwe nja okumalagho okwekuluntaza okw’abantu b’omu Yerusalemu n’ab’omu Buyudaaya yoonayoona. 10Abantu abo ababi baaloba okukola bye mbalagira. Baira mu kukolanga ebyo emyoyo gyaibwe emikalangufu bye gyenda, ni mu kusinzanga n’okugheerezanga bakatonda abandi. Kale ni, baja kuba ng’oti n’ekivaalo ky’omu nkende ekyo, ekitakaali na mugaso naire. 11Ng’ekivaalo ky’omu nkende bwe kyegemera irala ku nkende y’omuntu, ntyo bwe nayenda n’abantu b’omu Isiraeli n’ab’omu Buyudaaya boonaboona baneegemereku irala. Olwo babenga bantu bange abaleetera eriina lyange okusaakibwa n’okutiibwa. Aye beene baaloba okungondera.”
Ekidoome ky’omwenge ogw’emizabbibu
12Musengwa Katonda yankoba ati: “Yeremia, kobera abantu b’omu Isiraeli oti Musengwa Katonda, Katonda wa Isiraeli akoba ati, ‘Buli kidoome kya mwenge gwa mizabbibu kiidhuzibwa mwenge gwa mizabbibu.’ Baidha kukwiramu bati, ‘Obwo olowooza oti titwidhi nga buli kidoome kya mwenge gwa mizabbibu kiidhuzibwamu mwenge gwa mizabbibu?’ 13Olwo omale obakobe oti, nze Musengwa Katonda nja kutoola abantu b’omu nsi eno: bakyabazinga baidhukulu ba Daudi, ni bakabona, n’abalanzi, n’abantu boonaboona ab’omu Yerusalemu, mbaidhuze omwenge gw’emizabbibu ng’oti n’omuntu bw’aidhuza ekidoome, okutuusa nga boonaboona batamiire. 14Memale mbakontaganie buli muntu ku mwine, k’abe omuto oba omukulu. Nga ghazira kusaasira, oba okusonigha, waire okugemerwa omuntu ekivunika, aye okutoolaku okubazikiriza obuzikirize.”
Yeremia alabula abantu obuteekuluntazanga
15Imwe abantu Abaisiraeli, muwulire era muteeyo omwoyo.
Musengwa Katonda akobye ati mubenga bawombeefu era mumuwulirenga.
16Mughe Musengwa Katonda waimwe ekitiisa
ng’akaali kuleeta nzikiiza
ni mwekontola ku nsozi.
Era nga n’obutangaavu bwe mwasuubira
akaali kubufuula nzikiiza eri bedimudimu.
17Aye bwe munaaloba okuwulirisa bye nkoba,
ndidha kulira mule mu ngiso olw’okwekuluntaza kwaimwe.
Ndidha kulira inho mmagaze n’amaziga,
olw’abantu ba Musengwa Katonda abatwaliibwa nga banhage.
18Musengwa Katonda yankoba ati:
“Koba kyabazinga n’inhina oti,
‘Muve ku bityamo byaimwe eby’obwakyabazinga,
kuba engule dhaimwe edhiboneka obulungi
dhibaviire ku mitwe gyaimwe dhaagwa.’
19Ebibuga ebiri mu kiketezo kya Buyudaaya ekikalukalu ekiri ku luuyi
olw’omukono omusaadha olw’e buvandhuba, babizingiiza.
Ghazira muntu asobola kubita kubituukaku.
Abantu b’omu Buyudaaya boonaboona
batwaliibwa mu bunhage.”
20Iwe Yerusalemu, bona ere!
Abazigu bo bali kwidha nga bava ku luuyi olw’omukono omugooda
olw’e buvandhuba!
Abantu abaakugemesebwa okulabirira,
abantu abo abaakweyagazanga einho, buti bali gha?
21Olyogera ki, ng’abantu be wadhuubanga okuba bakagwa bo
bakughangwire era baakufuga?
Toliwulira bulumi ng’oti
n’obw’omukazi ali kulumwa okuzaala?
22Bwe weebuuza mule
lwaki ebyo byonabyona bikutuuseeku,
ni bakukanulaku ebivaalo byo,
ni bakugema eby’entaka era ni bakukaka okuba niiwe?
Okwiramu kuli nti, lwa kuba ebibi byo binene inho.
23Omuntu asobola okukyusa langi y’omubiri gwe?
Oba empala esobola okukyusa obudholodhondho bwayo ku mubiri?
Ebyo bwebiba bisoboka,
olwo n’imwe mwena omwamanhirira okukola ebibi,
mwandibaire musobola okwega okukola ebirungi.
24Musengwa Katonda aidha kubasansaania
ng’oti n’empewo eva mu irungu bw’esansaania ebikaba.
25Musengwa Katonda oyo akobye ati ekyo n’ekija okubatuukaku.
Ekyo ky’asazeegho okubakola,
kuba mwamwerabira,
mwesiga bakatonda ab’obuguya.
26Musengwa Katonda mwene aja kubatoolamu ebivaalo byaimwe,
mube madu muswale.
27Musengwa Katonda oyo ababona nga mukola ebintu ebyenhinhalwa.
Era yaababona nga muja eri bakatonda ab’amaghanga agandi ku nsozi ni mu nsiko.
Mwaba ng’oti n’omuntu omwenzi, oba ng’oti n’embalaasi enume
bw’emoolera okuniina enkazi.
Imwe abantu ab’e Yerusalemu mukagwireku!
Mulibaaku li abalongoofu?