8
Yuditha namwandu Omuisiraeli
1Mu kiseera ekyo Yuditha namwandu yaawulira ebyo ebyaligho. Yuditha oyo yali mughala wa Merari, nga Merari oyo yali mwana wa Okisi. Ate Okisi yaaba mwana wa Yosefu, Yosefu yaaba mwana wa Ozieli, Ozieli yaaba mwana wa Elikia, Elikia yaaba mwana wa Anania, Anania yaaba mwana wa Gideoni, Gideoni yaaba mwana wa Rafaimu, Rafaimu yaaba mwana wa Ahitubu, Ahitubu yaaba mwana wa Eliya, Eliya yaaba mwana wa Hilikia, Hilikia yaaba mwana wa Eliabu, Eliabu yaaba mwana wa Nathanaeli, Nathanaeli yaaba mwana wa Salamieli, Salamieli yaaba mwana wa Sarasadai, ate Sarasadai oyo yaaba mwana wa Isiraeli. 2Yuditha yabaaku n’iba nga ni Manasse, era nga bombi n’iba ba mu kika kirala. Aye nga iba yali yafa mu biseera eby’okukungula sayiri, 3omusana omubitirivu bwe gwamumamula ng’ali kulabirira abakozi abaali bali kusiba ebinhwa bya sayiri mu nimiro. Yaamala yaafiira ku buliri mu kibuga Bethulia eky’ewaibwe, era baamuziika mu badhaadha be abaafa, mu kibandha ekyali ghagati gh’e Dothani n’e Balamoni.
4Yuditha yali amaze emyaka esatu n’emyezi ena eka we nga namwandu. 58:5: Balam 3:20; 2 Bakyab 4:10Nga yasimba weema ghaigulu ku ngulu kw’endhu ye,8:5 … ku ngulu kw’endhu … Obusolya bw’endhu tibwabangaku migongo. Kale ng’omuntu asobola okuba okwo. yaabanga eyo ng’alira enaku ye nga yeesibye ekutiya mu nkende, era ng’ali mu bivaalo eby’obwanamwandu. 6Ekiseera ekyo kyonakyona kye yali yaakamala nga namwandu yabanga mu kusiiba kwonka, okutoolaku ku nnaku edhitaikirizibwanga kusiibiraku: ku lukulembera Sabbato, ni ku lwa Sabbato lwene ku lukulembera Ekibinuko eky’Okuboneka kw’Omwezi, ni ku lw’Ekibinuko eky’Okuboneka kw’Omwezi lwene n’enaku edhindi ab’eighanga lya Isiraeli dhe bakoleraku embaga edh’ebibinuko. 7Yuditha yali mukazi mulungi inho mu mboneka, ng’asanhusa okubona. Iba yali yamulekera zaabu, feeza, abairu abasaadha n’abakazi, ebyayo, n’ebibandha. Kale Yuditha yaasigala ng’akaalabirira ebintu ebyo, 8era nga ghazira amwogeraku bubi, kuba yali muntu munaidiini inho eyaisanga mu Katonda ekitiisa.
Yuditha n’abakulira ekibuga
9Yuditha yawulira ng’abantu bali kwemuluguunhiza inho Uzzia, amaani nga gabawoiremu olw’eibula ly’amaadhi. Era yaawulira ni Uzzia oyo kye yabairamu ng’alayira ati ekibuga aja kukiwaayo y’Abassiria nga ghabiseegho enaku itaanu. 10Agho yaatuma omwiru we omukazi eyalabiriranga ebintu bye byonabyona, aje ayete Uzzia,8:10: Uzzia: mu bighandiiko ebindi eby’Olugureki muziramu liina eryo. Kaburi ni Karumi abaakuliranga ekibuga. 11Bwe baidha, Yuditha yaabakoba ati: “Mbasaba imwe abakulira ekibuga Bethulia, mumpulirise. Ebibono bye mukobye abantu olwaleero ti bye mubaire nga mugwaniire okwogera. Timwandyogeire ni mulayirira na Katonda mbu mwidha kuwaayo ekibuga y’abazigu baife, mbu kasita Musengwa Katonda oyo anaaba nga tatuyambye mu nnaku edho. 128:12: Ma 6:16; Yob 38:2 Kale mweyeta ki imwe okuleba Katonda mutyo nga bwe mukoze olwaleero? Niimwe baani okweta mu kifo kye nga muli kukola ku nsonga edh’abantu obuntu? 13Muli kuleba Musengwa Aghanga Ebintu Byonabyona, aye ghazira kintu waire ekirala kiti kye musobola kutegeera. 148:14: Rom 11:33-34; 1 Kor 2:11 Timusobola kwekebeedha kiri munda mu mwoyo gwa muntu, waire okumanha obumanhe ky’alowooza. Memale musobola mutya okwagaaza ebidhuubo bya Katonda eyatonda ebintu byonabyona, ni muzuula by’alowooza era ni mubitegeera? Busa, bakagwa mulobe kwesonsa mutyo ku Musengwa Katonda waife, kumuleetera kusungughala. 15Ni bw’asalagho obutatuyamba mu nnaku edho eitaanu, akaasobola okutuwonia mu kiseera ekindi kyonakyona ky’aba ayenze, oba okutuleka obuleke abazigu baife ni batuzikiriza. 16Mutagezaaku naire kuta mateeka ku ntegeka dha Musengwa Katonda waife; kuba Katonda tatiisibwatiisibwa waire okusendebwasendebwa ng’oti bantu. 17Agho ni ka tumusabe busabe aidhe atuyambe, era tuteegerere buteegerere okutuusa lw’anairamu okusaba kwaife, bw’anaaba ayenze.
18“Mu biseera bya badhaadha baife ebyabita ghaalingagho okusinza ebintu nga byetebwa bakatonda, ebyakolebwa abantu obuntu. Aye mpegaano mu ighanga lyaife timukaalimu akaakola atyo, ka kibe mu kika, oba mu maka, oba mu kyalo, oba mu kibuga. 19Eky’okusinza ebintu ebyetebwa bakatonda n’ekyaleetera Katonda okuleka badhaadha baife okwitirwa mu ntalo n’okunhagululwa abazigu ebitaloodheka. 20Aye ife nga bwe tutasinza katonda wundi okutoolaku Katonda oyo mwene, tusuubira nga taidha kutulekulira agho oba okulekulira agho omuntu ow’eighanga lyaife owundi yeenayeena.
21“Abazigu bwe bagema ekibuga kyaife, olwo ni Buyudaaya yoonayoona baidha kuba nga bagigemye n’eisinzizo lyaife balinhagulule. Era olwo Katonda anaaba ng’ali n’okutubonereza olw’okuleka eisinzizo eryo okwonoonebwa. 22Aja kutuvunaana olw’abantu baife okwitibwa n’okutwalibwa mu bunhage, n’olw’okuzikirizibwa kw’ensi yaife ey’ensikirano. N’abantu ab’omu maghanga ye tulitwalibwa nga tuli bairu, baja kutuvuma era batuyeeyereze. 23Okweghaayo y’abazigu baife mpegaano tikuja kuleetera bazigu abo kutusiima naire.8:23: Okweghaayo … mpegaano: oba Okufuulibwa abairu tikuja kutuviiramu kalungi naire. Aye Musengwa Katonda waife aidha kutuvaamu buve, atugheeyo tuswazibwe.
24“Kale bakagwa, tuteeregho ab’eighanga lyaife eky’okuboneraku, kuba niife tuvunaanizibwa okuwonia obulamu bwaibwe n’okukuuma eisinzizo ni alutaari. 25Mu bino byonabyona Musengwa Katonda waife ali kutuleba nga bwe yaleba badhaadha baife, agho ni tugwaniire bwa kumwebaza. 268:26: Mainh 22:1-18; 29:1—31:55Mwidhukire nga bwe yaleba Aburahamu ni Isaaka. Mwidhukire n’ebyatuuka ku Yakobo ng’ali e Mesopotamia mu Siria, bwe yali ng’ayaya entaama dha Labani eyali mwanhina inhina. 27Aye ife Katonda tatulebye na bukambwe bubitirivu, ng’oti ni beene bwe yabaleba abone nga bwe baali abeesigwa y’ali. Era tatubonereiza lwa kwenda kutwesasuulizaaku, aye lwa kwenda kutulamba ife abamusinza.”
28Agho Uzzia yairamu Yuditha ati: “Ebyo byonabyona by’okobye bituufu, era ghazira asobola kubitakania naire. 29Guno ti n’omukuzi ogusoose iwe okwoleka amagezi go. Okuviira irala mu buto bwo, abantu boonaboona baabona nga bw’oli omutegeevu mu kusala ensonga. 30Aye abantu bali kufa endiwo. Era n’abaatukase ni batuleetera okwogera ebyo bye twakobye, ni tulayira n’okulayira nga tubasuubiza ekyo buti kye tutakaasobola kumenhagho. 31Kale iwe nga bw’oli omukazi omunaidiini einho aisa mu Katonda ekitiisa, tusabire eri Musengwa atugwikize amaadhi gaidhuze ebidiba byaife, tusobole okwiramu amaani.”
32Yuditha yaabakoba ati: “Muwulirise kye nkoba: Nja kukola ekintu abaana baife n’abaidhukulu baife kye banaidhukiranga. 33Obwire obwaleero imwe mwidha kuja mwemerere ku mulyango gw’ekibuga. Ate nze n’omwiru wange omukazi tufulume tuje. Era Musengwa aidha kunkozesa okununula abantu ba Isiraeli, ng’olunaku lwe mwakoba okugheerayo ekibuga lukaali kutuuka. 34Aye mutambuuza kye nja kukola. Ndidha kukibakobera nga mmaze okukituukiriza.”
35Uzzia n’abakulembeze bale abandi baamukoba bati: “Tukwendeza nkabi, Musengwa Katonda waife akukulembere ng’oja okwesasuuliza ku bazigu baife.” 36Agho baava mu weema ya Yuditha ghaigulu ku ngulu kw’endhu ye, bairayo mu bifo byaibwe.