6
Holoferene bye yayogera
1Okwasiikana okw’abantu abaali agho olwekobaano ghe lwali bwe kwawoleera, Holoferene omuduumizi w’eigye ly’Assiria, yaakoba Akiori mu maiso g’abakungu boonaboona ab’omu nsi Moabu ghalala n’ebikunsu byonabyona eby’abalwani abaava mu maghanga agandi, ati:
2“Iwe Akiori,6:2: Akiori: ebighandiiko ebindi byongeraku biti: iwe n’abaisirukale bo abapangise abaava mu Efuraimu; ate ebindi byayongeraku biti: iwe n’abaisirukale bo abapangise abaava mu Ammoni. weeyeta ki einho, okwefuula omulanzi? Niiwe ani atuwooyawooya tulobe kulwanisa Baisiraeli mbu lwa kuba Katonda waibwe aidha kubalwanirira? Katonda oyo naani asinga Nebukadinezzari? 3Nebukadinezzari aidha kusindika eigye lye libasaaniegho ku nsi, olwo Katonda waibwe oyo alobe kusobola kubawonia naire. Ife abagheereza ba Nebukadinezzari oyo twidha kukuba abo, tube ng’oti n’abali kukuba omuntu omulala obulala. Tibaidha kusobola kulwanisa balwani baife ab’oku mbalaasi ab’amaani. 4Twidha kubaghangula, ensozi dhaibwe dhitenhe n’omusaayi gwaibwe, n’ebiiko byaibwe biidhule emirambo gyaibwe. Tibaidha kusobola kutulwanisa, twidha kubazikiriza tubasaaniegho. Ekyo n’ekiragiro kya Nebukadinezzari musengwa w’ensi yoonayoona, era ky’akoba kiri n’okutuukirira. 5Era iwe Akiori baakupangisa bupangise okuva mu Ammoni, aye oli kwogera ng’oti n’atukoleire olukwe. Kale toliirayo kumbona okutuusa nga ndidhie okwesasuuliza ku luse olw’abantu abairu abo abaalumuka e Misiri. 6Olwo abaisirukale bange balikwita, weena waaba mu abo abaitiibwa.
7“Mpegaano abagheereza bange baidha kukutwala mu biketezo eby’oku nsozi, bakuleke eyo mu kindi ku bibuga by’Abaisiraeli, 8okutuusa lw’olifiira eyo ghalala n’abantu baayo. 9Iwe oba nga osuubira oti abantu abo tibaaghangulwe, kale ni oteeraliikirira naire. Aye nze bye nkobye byonabyona ndidha kubituukiriza.”
Akiori bamuleeta e Bethulia
10Agho Holoferene yaalagira abantu be abaamugheerezanga mu weema ye, bageme Akiori bamutwale e Bethulia, bamugheeyo y’Abaisiraeli. 11Kale baamugema baamutoola mu nkambi ya Holoferene, baamubisa mu biketezo eby’oku museetwe, baamala baaniinaniina naye ebiketezo eby’oku nsozi okumutuukiza irala ku nsulo edh’amaadhi edh’e Bethulia eifo waakyo. 12Abantu b’omu kibuga bwe baabalengera nga bali kwidha, baagema eby’okulwanisa baalumuka baaja ku ngulu ku lusozi. Abaali n’ensuumulo baadhitaamu amabaale, baagawolooberera ye bali okubalobera okwongera okuniinaniina olusozi. 13Aye bale beewoma mu mbali mw’olusozi, baasiba Akiori era baamuleka ng’agwire agho ghansi w’olusozi.
14Nga ghabiseegho ekiseera, Abaisiraeli abo baikirira okuva e Bethulia baamutuukaku. Baamusibulula, baamutwala mu kibuga, era baamugemya abakulira ekibuga ekyo 15abaaligho mu biseera ebyo; Uzzia mutabane wa Mika ow’omu kika kya Simeoni, Kaburi mutabane wa Gothonieli ni Karumi mutabane wa Melekieli. 16Abakulira ekibuga abo baayeta abataka abakulu mu kibuga ekyo. N’abaisuka ghalala n’abakazi baamu boona baalumuka baaja mu lwekobaano. Agho baaleeta Akiori baamuta ghagati mu bantu, Uzzia yaatoolera okumubuuza nga bwe byabaire. 17Akiori yaabakobera ebyabairegho mu lwekobaano lwa Holoferene, n’ebyo mwene Akiori bye yayogera mu maiso g’abakungu b’e Assiria. Era yaabakobera nga Holoferene oyo bwe yeesuutira ku b’eighanga Isiraeli ng’akoba by’aja okubakola. 18Abantu bwe baawulira ebyo, baakuba amakiryaivu baasinza Katonda. Baamweghemba nga bakoba bati: 19“Wo Musengwa Katonda ow’eigulu, bona abazigu baife nga bwe bali kutwekudumbalizaaku ife bantu bo. Tuwonie tulobe kuswazibwa tutyo, osaasire eighanga lyo eryakwawulirwa.”
20Agho baagumya Akiori, era baamusaaka olw’ebyo bye yakola. 21Olwekobaano nga luwoire, Uzzia yaaja ni Akiori eka era yaagabula abataka abakulu mu kibuga ekyo embaga. Obwire obwo bwonabwona baabumala nga bali kweghemba Katonda wa Isiraeli abayambe.