4
Abaisiraeli beetegeka okwerwanaku
1Agho Abaisiraeli baawulira ebyo Holoferene, omuduumizi w’eigye lya kyabazinga Nebukadinezzari, bye yakola amaghanga agandi. Baawulira nga bwe yanhagulula ebintu mu masinzizo gaibwe goonagoona, era n’amala n’agazikiriza. 2Ekyo kyabaleetera okudhugumira einho n’okweraliikirira, olw’okutya ky’anaakola ku kibuga Yerusalemu ni ku isinzizo lya Musengwa Katonda waibwe. 3Abaisiraeli abo baali baakaira mu nsi yaibwe okuva mu bunhage, era nga baakamala okwiramu okutukuza esinzizo n’ebikozesebwamu ni alutaari, ebyali nga byayonoonebwa. 4Kale baagheereza obukwenda okulabula ab’omu kiketezo eky’e Samaria kyonakyona, n’ab’omu bibuga Kona, ni Bethi Horoni, ni Belamaini, ni Yeriko, ni Koba, ni Ayesora, n’ab’omu kiiko ky’e Salemu. 5Era mangu ago baasitukiramu, baaja ku ngulu kw’ensozi endeeyi okulobera abazigu okudhighamba, baataagho n’okukuuma mu byalo eby’oku nsozi edho. Era olw’okuba baali baakamala okukungula emere mu misiri gyaibwe, ekyo kyabayamba okutereka emere nga beetegekera olutalo.
6Agho Omukulu wa Bakabona eyali mu Yerusalemu mu kiseera ekyo ng’ayetebwa Yoakimu, yaaghandiikira abantu b’omu biketezo Bethulia ni Betomesithaimu ebirinzagainia n’Ekiiko ky’e Yezireeli, okumpi n’e Dothani. 7Yaabalagira beeteege buli ghantu aghaingirirwa mu nsozi okuja mu Buyudaaya, kibanguyire okulobera abazigu okulumba Buyudaaya; kuba obufo obwo bwali bufunda inho nga tibusobola kubitamu bantu baswika mu babiri ku mukuzi omulala. 8Abaisiraeli baatuukiriza ebyo Omukulu wa Bakabona Yoakimu aghalala n’abaatyama mu lwekobaano olwali e Yerusalemu bye baabalagira okukola.
Okusaba Katonda ng’olutalo lukaali
9Agho abakulembeze boonaboona mu Isiraeli baalirira Katonda abayambe era baasiiba. 104:10-12: Yon 3:7-8; Esit Lug 4:1-3 Boonaboona ghalala ni bakazi baibwe, n’abaana baibwe, n’abasenze abaabanga aghalala nabo, n’abapakasi, n’abairu, baavaala ekutiya olw’enaku. 11Abasaadha boonaboona Abaisiraeli ab’omu Yerusalemu n’abakazi, n’abaana, baakuba amakiryaivu mu maiso g’eisinzizo nga beesiize eivu mu mitwe, baayala ekutiya dhaibwe mu maiso ga Musengwa. 12Era baayala ekutiya okwezunguluza alutaari, olwo boonaboona baalirira kulala nga bali kusaba inho Katonda wa Isiraeli, alobe kuganha bamaghanga gandi kubanhagaku baana baibwe na kubatwalaku bakazi baibwe. Era alobe kubaleka kwesanhusa nga bazikiriza ebibuga byaibwe era nga boonoona eisinzizo lyaibwe okulimalamu ekitiisa. 134:13: Esit Lug 4:16 Kale Musengwa yaawulira bye baasaba era yaabona enaku ye baalimu; kuba abantu b’omu Yerusalemu beebonereza okumala enaku kamaala nga basiiba mu maiso g’eisinzizo lya Musengwa oyo Aghanga Ebintu Byonabyona. 144:14: Yoe 2:17 Omukulu wa Bakabona Yoakimu, ni bakabona abandi boonaboona abaali nga n’abagheereza mu isinzizo lya Musengwa, baavaala ekutiya nga bali kughaayo ebigheebwayo ebya buli lunaku ebyokebwa byonabyona ni biwaagho, n’ebigheebwayo abantu bye beeyama oba bye baghaayo nga bya kyeyendere. 15Baayugha eivu mu bitambaala bye beesibye ku mitwe, baalirira Musengwa n’amaani gaibwe goonagoona, nga bamusaba agemerwe eighanga lyonalyona Isiraeli ekisa.