3
Kyabazinga Nebukadinezzari bamusaba ghabeegho emiraala
1Agho abantu ab’amaghanga ago goonagoona baatuma abakwenda ye kyabazinga Nebukadinezzari, bamusabe ghabeegho emiraala, nga bakoba bati: 2“Bwenebwene ife tuli bagheereza bo, kyabazinga Nebukadinezzari omukologho. Era tweyala ku itaka nga twefundiike mu maiso go. Tuli beetegefu okukola kyonakyona ky’oyenda. 3Tukughaire ebizimbe byaife, n’eitaka lyaife lyonalyona, n’emisiri gyaife egy’engaano, n’ebyayo byaife, ni weema dhaife. Bikozese nga bw’oyenda. 4Ebibuga byaife biidha kuba bibyo, n’abantu ababibaamu babe bairu bo. Idha okole kyonakyona ky’oyenda.”
5Kale abakwenda baakobera Holoferene ebyo byonabyona. 6Agho Holoferene oyo yaaserengeta n’eigye lya Nebukadinezzari mu biketezo eby’oku Nhandha Eyaghagati, yaata enkambi edh’abalwani mu bibuga byonabyona ebyezungulwirwa ebimante ebigumu. Yaalonda n’abandi ku batyamye baayo, babe mu eigye ery’okwekuumisa bweghabaagho obwetaavu. 7Abantu b’omu bibuga ebyo ni mu biketezo ebibiriinainegho baasangaalira Holoferene. Beetimba ebimuli era baakuba obugoma nga bwe bakina. 83:8: Kuv 34:13; 2 Byom 17:6 Aye Holoferene yaazikiriza amasabo gaibwe goonagoona n’emiti gye baasinzizangamu. Yali agheereibwa ekiragiro okuzikiriza bakatonda boonaboona mu nsi edho, olwo amaghanga goonagoona gabe nga gasinza Nebukadinezzari nga ni katonda.
9Agho Holoferene yaabitira mu Kiiko ky’e Yezireeli okumpi n’e Dothani, ng’olingiriiza ensozi enkologho edh’e Buyudaaya. 10Yaasimba weema dhe ghagati gha Geba ni Sikithopoli, yaamala agho omwezi mulamba ng’akaasolokeza eigye lye eby’okukozesa.