16
Olwembo lwa Yuditha olw’okusaaka Katonda
1Agho Yuditha ng’ali agho n’Abaisiraeli boonaboona abaaligho, yaayemba olwembo olw’okusiima Katonda, era Abaisiraeli abo baamweyimbaku. 2Yayemba ati:
Mwembere Katonda wange olwembo nga mukuba obugoma.
Mwembere Musengwa wange nga mukuba ebide.
Mumwembere olwembo oluyaaka,
mumusaake era mumweghembe.
3Musengwa n’omulwani ow’amaani aghangula entalo.
Yamponia, yantoola mu ngalo edh’abaali bali kuumingirira,
yandhiza mu bantu be, naaba ghalala nabo.
4Abassiria baaserengeta nga baviira mu nsozi edh’oku luuyi olw’omukono omugooda
olw’e buvandhuba,
nga bali n’abalwani ab’amaani nkumi na nkumi.
Abaisirukale baibwe olukunkumuli beeyugha mu biiko baabimaamira;
abalwani baibwe ab’oku mbalaasi baidhula ku nsozi.
5Baatwesuutiraku nga bwe baali baja okukunaania omuliro gwokye ensi yaife,
baite abaana baife abaisuka,
bakube ghansi abaana baife abaghere bafe,
bageme abaana baife babatwale ng’omuyiigo,
era batwale baghala baife abaguna ng’omunhago.
6Aye Musengwa Aghanga Ebintu Byonabyona yaabasalira amagezi,
era yaabaghangula ng’abita mu mukazi.
7Omusaadha waibwe eyali ow’amaani agatoloodheka tiyatirimbulwa baisirukale
ba maani ga kivubuka,
waire okwitibwa abasaadha abawaigufu.
Aye Yuditha mughala wa Merari n’eyamwita
ng’akozesa obulungi obw’emboneka ye.
8Yatuusa ku bughanguzi abantu b’omu Isiraeli abaali batuntuzibwa,
bwe yeetoolamu ebivaalo bye eby’obwanamwandu,
ni yeesiiga obuwoowo obw’omughendo,
n’avaala engoye empegheevu,
era ni yeesiba ku nviiri ekintu ekyamadholobera ekyali ng’oti muge,
olwo asobole okumusendasenda.
9Engaito dha Yuditha dhaasendasenda Holoferene,
obulungi obw’emboneka ye bwamutwaliriza omwoyo,
olwo empiima yaamusala amamiro.
10Yuditha yaleetera abantu b’e Perusia okudhugumira olw’obugumu bwe,
n’ab’e Media yaabaleetera okutya olw’obutabaamu ntete naire.
11Olwo abantu baife abaali batuntuzibwa baakuba emizira;
abantu baife abo abaali banafiighe baasiikana, baaleetera abazigu okulumuka
nga bali kudhugumira olw’okutya.
12Ife tuli baidhukulu ba bairu bwiru, aye twairirizaayo abazigu baife einhuma nga tuli
kubafumitafumita.
Twabafumita baaba ng’oti bairu abali kulumuka okwewonia.
Eigye lya Musengwa lyabazikiriza.
1316:13: Zab 144:9Ka nhembere Katonda wange olwembo oluyaaka.
Wo Musengwa, oli mukologho era wa kitiisa,
oli n’amaani agataloodheka era ezira asobola kukughangula.
14Ebitonde byo byonabyona ka bikugheerezenga,
kuba walagira bulagire, byonabyona byabaagho;
waasindika omwoyo gwo, byonabyona byatondebwa.
Ghazira muntu waire omulala ati asobola kutakania biragiro byo.
15Iwe gh’oba, emisingi egy’ensozi n’enhanda bitengeesebwa,
n’amabaale gaasaanuuka ng’oti muzigo.
Aye abakutya obagemerwa ekisa.
1616:16: 1 Sam 15:22; Zab 51:16-17; Hos 6:6 Abantu okughaayo omusengo oguwunha akawoowo y’oli, kiba kintu kitono inho y’oli;
n’okukugheereza ekigheebwayo ekyokebwa ekisavu, kyona tikiba kikulu y’oli naire.
Aye abo abakutya obasiima waabaleetera okuba abakologho ebyanda n’ebyanda.
17Abantu b’amaghanga ago agasituka okulwanisa abantu bange, bakagwireku!
Musengwa oyo Aghanga Ebintu Byonabyona alibeesasuulizaaku ku lunaku
olw’okusalirwaku omusango.
Alisindika omuliro gwabamamula, n’enhengere dhaalya emibiri gyaibwe.
Balirira amaziga olw’obulumi ebyanda n’ebyanda.
Yuditha amanhikana inho
18Abantu bwe baatuuka e Yerusalemu baakola omukolo ogw’okwetukuza, baasinza Katonda. Baaghaayo ebigheebwayo byaibwe ebyokebwa, n’ebigheebwayo byaibwe eby’ekyeyendere, era n’ebirabo byaibwe. 19Yuditha yaaghaayo ye Katonda ebintu byonabyona abantu bye baamugha ebyali ebya Holoferene. Ate olutimbe lwe yaghanula ku buliri bwa Holoferene, yaalughaayo ye Musengwa oyo ng’ekigheebwayo olw’okutuukiriza obweyamo. 20Abantu beeyongera okukola embaga mu maiso g’eisinzizo mu Yerusalemu, okumala emyezi esatu. Ni Yuditha yeena yaasigala nabo eyo.
21Embaga eyo bwe yawa, buli muntu yairayo eka we. Ni Yuditha yeena yairayo e Bethulia, yaaba mu kibandha kye. Abantu b’omu nsi Isiraeli baamughanga ekitiibwa, ekiseera kyonakyona kye yamala nga mulamu. 22Abasaadha kamaala baayendanga okumufumbirwa, aye mwene yaasigala nga namwandu ekiseera kyonakyona kye yamala nga mulamu, nga Manasse iba amaze okufa. 23Yeeyongera okumanhikana einho. Yaakairiikirira okutuuka ku myaka kikumi n’etaanu (105) egy’obukulu ng’akaali mu ndhu iba ye yamulekera. Yaalekula omwiru we omukazi yaaba wa idembe. Era Yuditha oyo yaamala yaafa, baamuziika mu mpuku ya iba Manasse. 24Abantu b’omu ighanga Isiraeli baamulira okumala enaku musanvu. Bwe yali ng’akaali kufa yagabaniamu ebintu bye, ebindi yaabigha abo abaali n’oluganda einho ku iba Manasse, ate ebindi yaabigha abo abaamuliku mwene oluganda einho. 25Yuditha oyo mu kiseera kye yamala ng’akaali mulamu era ni mu myaka kamaala egyairirira ng’amaze okufa, tiwaaligho muntu yeenayeena yaleeteraku bantu ba mu nsi Isiraeli kutya naire.