15
Abaisiraeli baghangula
1Abaisirukale abaali mu weema bwe baawulira ebibairegho beesisighala inho. 2Baadhugumira olw’okutya era boonaboona baasitukiramu, baaziinhuuka okuva mu nkambi baasansaana busansaane. Buli muntu yaalumukira mu kiisi kagira ke yayagaananga eyo mu nsozi ni mu biiko. 3N’abaisirukale abaali basimbye weema dhaibwe mu nsozi okwezunguluza Bethulia, boona baalumuka. Agho abaisirukale Abaisiraeli boonaboona baasitula, baaja okubabingirira.
4Uzzia yaatuma abakwenda mu bibuga Betomasuthaimu, ni Bebai, ni Koba, ni Kola, ni ku nsalosalo dhoonadhoona edha Isiraeli. Yaabakoba baje bakobere abantu ebigwiregho, era babakubirize baje babingirire abazigu baibwe abo babazikirize. 5Obukwenda obwo bwe bwatuuka ku Baisiraeli, boonaboona beeyimba kitole, baabingirira Abassiria nga baja bwebabaita okubatuusa e Koba. Era bwe bwatuuka ni ku bantu b’e Yerusalemu ni ku bandi abaabanga mu biketezo eby’oku nsozi, boona beeyimba mu kubingirira okwo. N’abantu ab’e Gileadi n’ab’e Galilaaya boona baazingiza Abassiria abaali bali kulumuka, baja nga bwebabaita inho okutuukira irala e Damasiko ni mu biketezo ebikiriinaine.
6Abantu abandi abaasigala e Bethulia, baaserengeta mu nkambi y’Abassiria, baanhagulula ebintu kamaala ebyabaleetera okufuuka abakombe einho. 7Abaisirukale Abaisiraeli bwe baira nga bamaze okwita Abassiria, boona baanhaga ebintu ebyali bisigairegho. N’abantu ab’omu bibuga n’ab’omu byalo ebyali mu biketezo eby’oku nsozi n’eby’oku museetwe, boona baafuna ebintu kamaala, kuba omunhago gwali mungi inho.
Abaisiraeli basagambya olw’obughanguzi
8Agho Omukulu wa Bakabona Yoakimu, n’ab’oku lwekobaano olw’e Yerusalemu, baidha beebonereku beene ebirungi Musengwa bye yakolera abantu be Abaisiraeli, era babone ni Yuditha bamweisuuse. 9Bwe baatuuka, boonaboona baamusabira enkabi bati: “Niiwe ekitiisa kya Yerusalemu, niiwe eisanhu lya Isiraeli eritaloodheka, era niiwe weesiimisa einho eighanga lyaife. 10Niiwe wenka oti owaleetera Isiraeli okutuuka ku bughanguzi buno bwonabwona. Wakolera Isiraeli ebirungi ebitaloodheka, ni Katonda yeena abisiimye. Era tusaba Musengwa oyo Aghanga Ebintu Byonabyona, akughenga enkabi obulamu bwo bwonabwona.”
Abantu boonaboona bairamu bati: “Amiina.”
11Abantu baamala enaku amakumi asatu nga bali kunhagulula ebintu ebyali mu nkambi y’Abassiria. Yuditha baamugha weema ya Holoferene n’ebintu ebyagirimu: esowaani n’ebikopo ebya feeza, n’obuliri, n’entebe, n’ebintu ebindi. Yaabitwala yaabitwika ku nhumbu ye, n’ebindi yaabitwika ku bigaali bye ebighaluzibwa.
12Agho abakazi Abaisiraeli boonaboona baidha okumubona. Baamwembera enhembo edhimusaaka era baamukinira n’amakina olw’eisanhu. Yuditha n’abakazi abo baagema obusaga bw’emiti mu ngalo baabuwuuba. 13Beedholiga ku mitwe n’amakaba g’emiti emyoliva. Yuditha yaakulemberamu, baaja nga bali kukina. N’abasaadha ab’omu Isiraeli boonaboona baanonereza nga beetimbye emige egy’ebimuli ku mitwe, era nga bagemye eby’okulwanisa nga bali kuja bwe bemba enhembo.