14
Entegeka ya Yuditha
1Agho Yuditha yaabakoba ati: “Bakagwa, muwulirise kye ndi kubakoba. Mutwale omutwe guno mugughanike ku kisenge ky’ekibuga. 2Mumale mwerondemu omukulembeze. Mu nkyo endhuba ng’eri kuvaayo, abasaadha boonaboona abaziramu ntete bageme eby’okulwanisa, bave mu kibuga ghalala n’omukulembeze oyo, nga bali ng’oti bali kuserengeta mu kiiko okulumba enkambi y’Abassiria. 3Agho Abassiria abali kukuuma baidha kugema eby’okulwanisa byaibwe baireyo mu nkambi, bazuuse abakulu b’eigye. Abakulu b’eigye abo boona baidha kuziinhuuka buziinhuuke baje mu weema ya Holoferene, aye balobe kumwagaanamu. Ekyo kiidha kubaleetera okutya inho balumuke, nga bali kubabona muli kubaidhira. 4Olwo imwe n’Abaisiraeli abandi boonaboona ababa ku nsalosalo dha Isiraeli, mwidha kubabingirira mubaite nga bali kulumuka. 5Aye nga mukaali kukola ekyo, musooke mundeetere Akiori Omuammoni. Aidhe abone oba nga anaategeera Holoferene eyanhoomoola eighanga Isiraeli, n’asindika Akiori oyo ye tuli ng’alowooza ati balimwitira ghalala n’ife.”
Akiori akyuka
6Kale baayetesa Akiori eyali mu ndhu ya Uzzia, bamuleete. Bwe yaidha n’abona omutwe gwa Holoferene nga guli mu ngalo edh’owundi ku basaadha abaali agho, yaazirika yaagwa ghansi. 7Aye bwe baamugemaku okumusitusa bamwemereze, yaakuba amakiryaivu gha bigere bya Yuditha, yaakoba ati: “Amaka goonagoona mu Buyudaaya ka gakutengamu ekinhagansi. Era mu maghanga goonagoona kiisi anaawuliranga ku liina lyo, aidha kutyanga inho. 8Mpegaano nkoberaaku bye wakola mu nnaku edho okusobola okutuuka ku ekyo.”
Agho Yuditha ng’ali agho mu maiso g’abantu abaaligho, yaamwinhonhola byonabyona bye yakola okuviira irala lwe yava mu kibuga, okutuukira irala mu kaseera ako ke yali ng’ali kwogera nabo. 9Bwe yamala okwogera, abantu baayasiikana n’amaani okumweisuusaayo, era baakuba inho emizira n’ekibuga kyawaala. 10Akiori bwe yawulira ebyo byonabyona Katonda wa Isiraeli bye yakola, yaafuuka omwikiriza mwenemwene. Baamukeketa yeeyimba ku ighanga lya Isiraeli, era ni baidhukulu be baasigala nga bakaali baikiriza ni ye buli eno.
Okutya okungi okwali mu nkambi ya Holoferene
11Bwe bwakya enkyo, Abaisiraeli baaghanika omutwe gwa Holoferene ku kisenge ky’ekibuga. Era boonaboona baagema eby’okulwanisa, buli ghantu aghaingirirwa mu nsozi nga bali mu bikunsu bikunsu. 12Abassiria bwe baababona baagheereza obukwenda y’ababakulira, ate ababakulira abo boona baaja baakobera abakulu baibwe. 13Abakulu abo baatuuka ku weema ya Holoferene, baakoba Bagoa eyalabiriranga ebintu bye bati: “Zuusa omuduumizi waife omukulu, kuba Abaisiraeli abo abairu obwiru bakanaghaire baaserengeta olusozi okutulumba. Bali kunoonia kwereetaku kuzikirira beene.”
14Bagoa yaingira yaakonkona ku mulyango gw’eweema, ng’alowooza ati Holoferene akaalambaire ni Yuditha. 15Aye tiyawulirayo muntu avugira naire. Kale yaigulagho, yaingira mu kitundu kya weema ekyalimu obuliri, yaayagaana Holoferene ng’agwire ere mufu ku kintu kye bataaku ebigere, era ng’omulambo gwe guziraku mutwe. 16Bagoa oyo yaakuba enduulu n’empungu, yaakanulamu ebivaalo bye olw’enaku, era yaalira amaziga yaawowoola. 17Yaamala yaaja yaingira mu weema Yuditha mwe yabanga, aye yaaloba kumwagaanayo. Agho yaalumuka okuja aghali abantu, nga bw’ayasiikana ati: 18“Abairu batusaliire amagezi! Omukazi Omuisiraeli omulala ati aleeteire obwakyabazinga bwa Nebukadinezzari bwonabwona okuswazibwa. Mubone, Holoferene agwire ghansi era aziraku na mutwe!”
19Abakulira amagye g’Abassiria bwe baawulira ebyo, baakanulamu ebivaalo byaibwe olw’enaku. Baatya inho ekibitiriire, era baakuba enduulu n’empungu mu nkambi yoonayoona.