13
1Obwire bwe bwaziba, abantu abaali ku mbaga baasiibula baagolola. Bagoa yaakoba abagheereza ba Holoferene baveegho baje, era yaigalira kuliya olwigi lw’eweema nga tibasobola kugingiramu. Agho boonaboona baaja okutenduka nga bakooye, kuba baalwa inho ku mbaga eyo. 2Yuditha yaasigala ng’ali mu weema yenka ni Holoferene, nga Holoferene oyo alambaire ku buliri era ng’atamiire aweekereiremu. 3Yuditha yali nga yamaze okukoba omwiru we omukazi ayemerere kuliya kw’eweema, amuteegerere okutuusa lw’anaafuluma okuja okusaba nga bweyakolanga buli bwire. Yuditha era yali nga yamaze okukobera ni Bagoa ati aidha kufuluma aje asabe nga bw’akolanga buliidho.
4Olwo abaali ku mbaga boonaboona ghalala n’abagheereza baali nga baajiire ira, nga Yuditha ni Holoferene n’abasigaire mu weema bonka. Agho Yuditha yaayemerera gha buliri bwa Holoferene, yaasaba mule ati: “Wo Musengwa Katonda Afuga Amagye, mbeera mu kino kye nja okukola ku lw’ekitiisa kya Yerusalemu. 5Kino n’ekiseera eky’okuyambiramu abantu be walondamu okuba ababo ku bubwo, n’okumbeera okuzikiriza abazigu abatulumbye.”
6Agho yaaja gha kikondo ekyali emintwetwe y’obuliri bwa Holoferene, yaaghanulayo empiima eyali eghanikiibwa. 7Yaaseeta kumpi ni Holoferene era yaamugema enviiri, nga bw’akoba ati: “Wo Musengwa Katonda wa Isiraeli, mpa amaani buti.” 8Agho yaatema Holoferene enkoto n’amaani ge goonagoona emikuzi ebiri, yamukutulaku omutwe. 9Yaagalangula omulambo gwe okugutoola ku buliri nga guli bwa kiwuduwudu, era yaaghanulayo olutimbe ku bikondo. Yaamala yaafuluma n’omutwe gwa Holoferene, yaagugemya omwiru we omukazi. 10Omwiru yaaguta mu nsawo ey’emere.
Yuditha n’omwiru we omukazi bairayo e Bethulia
Agho abakazi abo bombi baaja ng’oti ni bwebaali bakolanga nga baja okusaba Katonda. Baava mu nkambi y’Abassiria baabitira mu kiiko, baaja nga baniinaniina olusozi nga balwezungulula mu mbali, okutuusa bwe baatuuka ku miryango gy’e Bethulia. 11Aye bwe baali bakaali kugituukiraku irala, Yuditha yaayeta abakuumi ati: “Mwigulegho, mwigulegho mangu olwigi! Katonda waife akaali n’ife. Era olwaleero kabiri ayoleike amaani ge mu Isiraeli, yaakozesa obuyinza bwe okulwanisa abazigu baife.”
12Bale bwe baawulira amamiro ge, baayangughaku okuserengeta nga baja ku miryango, era baayeta abakulira ekibuga ekyo. 13Abantu boonaboona abakulu n’abato baalumuka okuja ku mulyango, kuba baali tibakiikiriza nga bwenebwene Yuditha aize. Agho baigulagho olwigi, baamwingiza n’omwiru we omukazi. Beesololeza ghe baali era baakunaania n’omuliro okubamuliikirira. 14Yuditha yaayogera mu mamiro ag’amaani ati: “Musaake Katonda, bwenebwene mumusaake. Musaake Katonda oyo atalekerangaku kugemerwa ighanga Isiraeli kisa, kuba olwaleero ankozeisa okuzikiriza abazigu baife.”
15Agho yaatoola mu nsawo ey’emere omutwe, yaagubooleka ng’akoba ati: “Mubone, guno n’omutwe gwa Holoferene omuduumizi w’eigye ly’Abassiria. Era luno n’olutimbe olubaire lukingiriiza obuliri kw’abaire atendwike ng’atamiire aweekereiremu. Musengwa amwise ng’akozesa omukazi. 16Ndayira Musengwa omulamu eyankuuma mu lugendo lwange, ni nsobola okusendasenda Holoferene oyo n’obulungi obw’emboneka yange, era ni mmuleetera okuzikirira nga ghazira kibi kyonakyona ky’ankozeeku okuunhonoona n’okunswaza.”
17Abantu boonaboona beewuunhia ekibitiriire, baakuba amakiryaivu baasinza Katonda. Era baisa kirala nga bakoba bati: “Wo Katonda waife ogwaine osaakibwenga, kuba olwaleero oghangwire abazigu b’abantu bo.”
1813:18: Balam 5:24; Luk 1:28, 42Agho Uzzia yaakoba ati: “Yuditha, mwana wange, Katonda oyo Ali Ghaigulu Yeene akughaire enkabi okusinga abakazi abandi boonaboona ku nsi. Era Musengwa Katonda oyo eyatonda eigulu n’ensi asaakibwenga, eyakutwala n’otema omutwe ku mukulembeze w’abazigu baife. 19Abantu tibalyerabira naire okwesiga kwo kwe wali nakwo mu Katonda, era kwidha kubaidhukizanga amaani ga Katonda. 20Nsaba Katonda akughe ekitiibwa ekitaja kuwaagho olw’ekyo ky’okoze. Era akughe enkabi olw’okumwesiga n’oghaayo obulamu bwo okuwonia eighanga lyo nga bali kulizikiriza.”
Abantu boonaboona bairamu bati: “Amiina, amiina.”