12
Yuditha asigala ng’akaagumiire ku idiini lye
1Agho Holoferene yaalagira abasaadha be batwale Yuditha ku meeza etegekeibwaku esowaani dhe edha feeza. Era yaalagira bamughe ni ku mere ye yeene y’alyaku, era ni ku mwenge gwe gwene ogw’emizabbibu gw’anhwaku. 212:2: Dan 1:8; Esit Lug C:28 Aye Yuditha yaakoba ati: “Tisobola kulya ku mere eyo, kuba esobola okundeetera okukola ekibi. Ndidha kulya ku yange ye naidhie nayo.”
3Holoferene yaamubuuza ati: “Emere eyo ye waidhie nayo bw’eriwaagho olikola otya? Ife tulitoola gha emere eri ng’oti n’eyo okukugha? Mu nkambi yaife muziramu bantu ba ighanga lyo!”
4Yuditha yaamwiramu ati: “Ndayira musengwa wange iwe kyabazinga omulamu, nti bwenebwene Katonda aidha kubita mu nze omugheereza wo atuukirize entegeka ye, nga n’emere ye naidhie nayo ekaali kuwaagho.”
5Agho abagheereza ba Holoferene baatwala Yuditha mu weema eyindi, yaatenduka okutuusa eyo nga mu bwire ghagati. Aye agho ng’obwire buli kumpi okukya yaasitukagho, 6yaatuma ye Holoferene ng’amusaba amuganhe, aje asabe Katonda. 7Era Holoferene yaalagira abakuumi be baleke Yuditha aje. Agho Yuditha yaamala enaku isatu mu nkambi. Era yaafulumanga obwire, yaajanga mu kiiko ky’e Bethulia okunaaba mu kaiga akaali kumpi n’enkambi. 8Bwe yamalanga okunaaba, ng’asaba Musengwa Katonda amugalagire bw’anaaleetera eighanga lye obughanguzi. 9Agho yairangayo mu nkambi ng’amaze okwetukuza, era yaabanga mu weema ye okutuusa bwe yamalanga okulya ekyeigulo.
Holoferene agabula embaga
10Ku lunaku olwokuna kasookanga Yuditha aingira mu nkambi, Holoferene yaagabula embaga ng’eriku bagheereza be bonka. Yaaloba kwetaku bakungu be waire omulala ati. 11Yaakoba Bagoa omulaawe eyamukoleranga ku nsonga edhimugemaku ati: “Ja y’omukazi oyo Omuheburayi ye nakugemya okukuuma, omwikirizise aidhe alye era anhwe n’ife. 12Kiidha kuba kya budoofu okuleka obuleke omukazi oyo n’aja nga titusanhwikeeku naye. Aidha kutusekerera bwe tutaamukobeeku kantu koonakoona.”
13Kale Bagoa yaavaagho yaaja ye Yuditha, yaamukoba ati: “Mukazi iwe aboneka obulungi, idha oje ye musengwa wange ofune ekitiibwa eky’okuba gh’ali, onhwe omwenge era osagambire ghalala naye. Olwaleero oidha kuba ng’oti n’abakazi Abassiria abagheereza mu kisaagaati kya kyabazinga Nebukadinezzari.”
14Yuditha yairamu ati: “Ninze ani aloba okukola musengwa wange ky’ayenda? Ndidha kukola kyonakyona ky’anaayenda era obwire buno nnaabwidhukiranga obulamu bwange bwonabwona.”
15Kale Yuditha yaasituka, yaavaala engoye dhe edhisingamu bulungi. Omwiru we omukazi yaamwesookangayo emberi, yaaja yaamwalirira mu maiso ga Holoferene amawu g’entaama, Bagoa ge yagha Yuditha oyo okutyamangaku ng’ali kulya.12:15: okutyamangaku ng’ali kulya: Omuntu ow’ekitiibwa bwe yatyamanga okulya, yeeghendhekeranga ku luuyi lwe olundi ng’olukokola alusiire ghansi, ng’oti n’ali kulambaala eky’embavu. 16Agho Yuditha yaingira mu weema, yaatyama agho. Holoferene bwe yamubona omwoyo gwamudunguda, era yeegomba inho okuba naye mu buliri kuba okuviira irala lwe yasooka okumubona yali ateegereire akaghagaanhia k’anaasobola okumusenderasenderamu. 17Agho yaakoba Yuditha ati: “Nhwa omwenge osagambe n’ife.”
18Yuditha yairamu ati: “Musengwa wange, nsiimye inho. Era nja kunhwa kuba luno n’olunaku olukaasinze mu dhoonadhoona okuba olw’eisanhu mu bulamu bwange.” 19Agho Yuditha yaalya era yaanhwa ng’ali agho mu maiso ga Holoferene, aye nga bire omwiru omukazi bye yamutegekera by’ali kulya n’okunhwa byonka. 20Holoferene yaasuuyiirira inho olwa Yuditha, era yaanhwa omwenge mungi inho gwe yali tanhwangaku mu bulamu bwe bwonabwona.