11
1Agho Holoferene yaakoba Yuditha ati: “Mukazi iwe guma omwoyo otatya, ghazira muntu yeenayeena ye naali nkozeeku kabi bw’aba ng’asazeegho okugheereza Nebukadinezzari kyabazinga w’ensi yoonayoona. 2Era ngoli n’abantu bo mpegaano abali eyo mu biketezo eby’oku nsozi tibaanhooma, tyandibatanwireku lutalo. Aye beene n’abeereeteire akabi kano okubaidhira. 3Kale nkobera ekikulumwisaayo n’oidha ye tuli. Otatya naire, kuba ghano gh’oidhie ghakuwoniiza. 4Guma omwoyo, oidha kubanga mulamu okuva n’olwaleero. Ghazira muntu yeenayeena aidha kukukolaku kabi. Boonaboona baidha kukubisanga bukalamu ng’oti bwe babisa abagheereza boonaboona aba musengwa wange kyabazinga Nebukadinezzari.”
5Agho Yuditha yaakoba Holoferene ati: “Musengwa wange, nkweghembye ganha owulirise nze omugheereza wo omukazi bye nja okukoba. Nja kwogera mazima gonka. 6Bw’onaajiira ku ebyo nze omugheereza wo omukazi bye nja okukukoba, Katonda aidha kukola eby’amaani ng’abita mu iwe. Era iwe musengwa wange oidha kusobola okutuukiriza by’otegeike okukola. 711:7: Yer 27:6; Dan 2:38Kyabazinga Nebukadinezzari aghangaale, n’obuyinza bwe busigalenga nga bukaaligho; kuba oyo n’eyakutuma oidhe ogoloze ebintu ebiramu byonabyona obireetere okumugheerezanga, ka babe abantu, oba ensolo edh’omu nsiko, oba ebyayo eby’omu maka, oba enhonhi. Era olw’obusobozi bwo, kyabazinga Nebukadinezzari aidha kubanga mu miraala mu bwakyabazinga bwe bwonabwona. 8Twawulira nga iwe oli mugezi era ng’oidhi inho okutetenkania. N’ensi yoonayoona ekiidhi bukalamu nga niiwe omuduumizi w’eigye omukulu asingayo okuba n’obumanhirivu mu by’entalo mu bwakyabazinga bw’e bwonabwona. 9Era twawulira n’ebibono Akiori bye yayogera mu lwekobaano lwe wayeta okubaagho kuba abantu b’e Bethulia bwe baamugema tibaamukolaku kabi koonakoona, kale yaamala yaabibakobera byonabyona. 10Agho ni, isebo musengwa wange, nkweghembye otanhoomerera ebyo Akiori bye yakukobera, aye biteeku omwoyo kuba bituufu. Ghazira muntu asobola kukola kabi koonakoona ku bantu ba ighanga lyaife waire okubaghangula, okutoolaku nga beene n’abakoze ekibi baaleetera Katonda waibwe okusungughala.
11“Aye Abaisiraeli bwe banaakola ekibi eri Katonda waibwe ni bamuleetera okubasungughalira, olwo iwe toidha kulemwa kutuukiriza ntegeka dho edh’okubaghangula. Era ni beene baidha kufa bufe. 12Mpegaano emere ebawoireku n’eibula ly’amaadhi lyeyongeire. N’olw’ekyo basazeegho okwita ensolo dhaibwe, olwo balye byonabyona nga baliiramu n’ebyo Katonda bye yabalobera mu mateeka ge okulyanga. 1311:13: Kuv 23:19; Lev 27:30Basazeegho okulya engaano ye basooka okukungula mu mwaka ni bagighaayo ng’ekigheebwayo. Era basazeegho n’okweiriza ekigero ekirala ekirala ku buli bigero eikumi eby’omwenge ogw’emizabbibu n’eby’omuzigo ogw’ebibala eby’emiti emyoliva. Ate nga baabyawulaku baabighaayo bibe bitukuvu, nga bya bakabona abagheereza Katonda mu Yerusalemu. Era ng’abantu abandi boonaboona tibaikirizibwa waire okubigemaku obugeme. 14Aye ng’abantu ab’omu Yerusalemu bwe baamala eira okumenha eiteeka eryo, ekyo kireeteire abantu ab’omu kibuga kyaife okutuma abakwenda mu lwekobaano lw’e Yerusalemu, boona baikirizibwe okukozesa ebintu ebyo. 15Ku lunaku lwe baliikirizibwa ni bakozesa ebintu ebyo, oja kusobola okubazikiriza.
16“Kale nze omugheereza wo olwamala okumanha ebyo, naalumuka naava mu bantu bange. Katonda n’antumye nkole n’iwe ekintu ekinaaleetera buli muntu yeenayeena anaakiwuliraku mu nsi yoonayoona okwewuunhia einho. 17Nze omugheereza wo ndi mukazi aidhwire eidiini, era nsinza Katonda ow’eigulu omusana n’obwire. Nja kusigala ghano mu nkambi yo, aye buli bwire ndidha kufulumanga nje mu kiiko nsabe Katonda ammanhise oba nga Abaisiraeli bamaze okukola ekibi. 18Olulikimanha nti, nga ndidha nkukobera ng’oja obalumba n’eigye lyo lyonalyona. Era ghazira Muisiraeli waire omulala alisobola okukulwanisa. 19Olwo nze ndikutwala naakubisa mu Buyudaaya ghagati, naakutuusa mu Yerusalemu ye ndikutyamisa ku kityamo eky’obwakyabazinga mu kibuga ghagati, waaba kyabazinga. Abantu ab’omu Yerusalemu olibasansaania baaba ng’oti n’entaama edhiziraku mwayi. Era tighalibaagho mbwa erikana kukuboigolera waire okuvuuma obuvuume. Ebyo byonabyona Katonda n’eyabindholeka nga bukaali, yantuma ndidhe mbikukobere.”
20Ebyo Yuditha bye yakoba byasanhusa inho Holoferene n’abagheereza be boonaboona, era beewuunhia inho amagezi ge. 21Baakoba bati: “Mu nsi yoonayoona ezirayo mukazi wundi atuuka ku bulungi bw’oyo mu mboneka, waire okutuuka ku bugezi bwe mu ndhogera.” 22Agho Holoferene yaamukoba ati: “Katonda akoze bukalamu okukutuma n’ova mu bantu bo, n’oidha okutuleetera obughanguzi, tusobole okuzikiriza abo abaanhooma musengwa wange Nebukadinezzari. 23Mu butuufu toli mulungi mu mboneka kyonka, aye era oli mugezi ni mu ndhogera. Bw’onaakola nga bw’osuubiiza, olwo Katonda wo zeena n’aidha okubanga Katonda wange. Era oidha kubanga mu kisaagaati kya kyabazinga Nebukadinezzari, obe mumanhifu inho mu nsi yoonayoona.”