10
Yuditha aja mu nkambi ya Holoferene
1Yuditha bwe yamala okusaba Katonda wa Isiraeli ng’akozesa ebibono ebyo, 2yaasituka yaava ku itaka ghe yali yeeyaze nga yeefundiike. Yaayeta omwiru we omukazi era yaamala yaika ghansi mu ndhu ye, nga bwe yakolanga ku Sabbato ni ku nnaku dh’ebibinuko. 3Yeesibulamu ekutiya ye yali yeesibye, era yeetoolamu n’ebivaalo bye eby’obwanamwandu. Yaanaaba omubiri, yeesiiga obuwoowo obw’omughendo, yeesunsula enviiri era yaadhisibaku ekintu ekyamadholobera ekyali ng’oti muge, yaavaala ebivaalo ebisingira irala obulungi bye yavaalanga ku mikolo egy’okusagamba nga iba Manasse akaali mulamu. 4Yaavaala engaito mu bigere n’ebyamadholobera ku bukongoivule, yaataaku empeta edh’oku ngalo n’edh’oku matu, yaataaku n’ebikomo ku mikono, n’ebyamadholobera ebindi byonabyona bye yali nabyo. Yaaba ng’awoomye inho mu mboneka ye era ng’asobola okusikiriza buli musaadha amulingaku. 5Era yaagemya omwiru we omukazi ensawo ey’oluwu erimu omwenge ogw’emizabbibu, n’akadoome akalimu omuzigo. Ate yaidhuza mu nsawo eyindi emere ey’empeke enkalange, n’ebitole eby’ebibala ebikaziibwa, n’emigaati egindi egifumbiibwa obukalamu. Ebyo byonabyona yaabisiba bukalamu era yaabigemya omwiru we omukazi. 6Agho bombi baafuluma mu ndhu, baaja baatuuka ku mulyango ogw’e kibuga Bethulia, baayagaana eyo Uzzia ng’ayememeire ni Kaburi ni Karumi abaakuliranga ekibuga ekyo. 7Bwe baamubona ng’amaze okukyusa ebivaalo bye n’okwezigula mu maiso, beegomba inho obulungi obw’emboneka ye. Baamukoba bati: 8Katonda wa badhaadha baife akughe enkabi, otuukirize by’otegeike okukola, oleetere Yerusalemu okugheebwa ekitiisa era otuuse Isiraeli ku bughanguzi.
Agho Yuditha yaasinza Katonda, 9era yaamala yaakoba ati: “Ka bandhiguliregho omulyango gw’ekibuga, nje nkole kye twayogeireku.” Kale baalagira abaisuka okumwiguliragho. 10Agho Yuditha n’omwiru we omukazi baafuluma ekibuga, baaserengeta olusozi, baaja baatuuka mu kiiko. Abasaadha ab’omu kibuga baabataaku amaiso okutuusa bwe baabulirayo.
11Abakazi abo bombi bwe baali bali kutambula mu kiiko, Abassiria abakuumi baabaagaana. 12Baagema Yuditha, baamubuuza bati: “Oli wa ighanga ki? Oviiriire gha? Era oli kuja gha?”
Yaabairamu ati: “Ndi Muheburayi. Aye ndi kulumuka nve mu Baisiraeli abo, kuba Katonda aja kubaghaayo ye muli mubazikirize. 13Mpegaano ndi kuja kubona Holoferene omuduumizi omukulu ow’eigye lyaimwe, mmukobere ekituufu era mmulage engira y’anaabitamu okuja okugema ebiketezo byonabyona eby’oku nsozi aghazira kufiirwaku muntu waire omulala ati.”
14Abasaadha abo baamulingirira obutatemya olw’okuba yali mulungi inho mu mboneka. Era bwe baamala okuwulirisa bye yakoba, baamukoba bati: 15“Okoze bukalamu okwangughaku n’oidha okubona omuduumizi waife, kuba ekyo kikuleeteire okuwonia obulamu bwo. Kale kola oje mangu y’ali mu weema ye. Abandi ku ife baidha kukutuusa y’ali bakwandhuleyo. 16Era ng’otuuseeyo mu maiso ge guma omwoyo otatya. Omukobere bukobere ebyo by’otukobye, aidha kukubisa bukalamu.” 17Agho beerondamu abasaadha kikumi (100), baagherekeraku Yuditha n’omwiru we omukazi okubatuusa ku weema ya Holoferene. 18Yuditha bwe yali akaayemereire kuliya kw’eweema ya Holoferene ng’ali kuteegerera okumwandhulayo, amawulire ag’okutuuka kwe gaaja nga gatuuka ku buli weema. Ghaabaagho akabuguutano ak’amaani mu nkambi yoonayoona, era abaisirukale kamaala baidha baayemerera agho gh’ali, baamwezungulula. 19Beegomba inho obulungi obw’emboneka ye, era ekyo kyabaleetera okwewuunhia Abaisiraeli. Kale beebuuzagania beene na beene nga bakoba bati: “Naani asobola okunhoomerera abantu abo abali n’abakazi ababoneka obulungi batyo? Bwenebwene ekisinga n’okwita abasaadha boonaboona ghaaloba kusigalagho waire omulala ati; kuba bwe tubaleka basobola okuleetera ensi yoonayoona okusikirizibwa.”
20Agho abaakuumanga n’abaagheerezanga Holoferene baidha baingiza Yuditha mu weema. 21Holoferene yali alambaire ku buliri bwe, nga buliku olutimbe olubwezungulwire. Olutimbe olwo nga baalukola mu wuuzi edh’erangi ya nakasooma n’edh’eya zaabu, era nga baaludholigadholiga n’amabaale ageetebwa emeraludo ghalala n’amabaale agandi ag’omughendo. 22Bwe baamukobera bati Yuditha atuuse, yaidha mu kitundu kya weema eky’emberi ng’abantu abagemye entaala dha feeza bamukulembeiremu. 23Yuditha bwe yaseeta mu maiso ga Holoferene n’ag’abagheereza be, boonaboona beegomba inho obulungi obw’emboneka ye. Yuditha yaakubira Holoferene amakiryaivu era yaakutama n’ekyeni kyatuuka ku itaka. Aye abagheereza ba Holoferene baamusitusa yaayemerera.