1
Olutalo ghagati gha Nebukadinezzari ni Arifakisadi
1Kyabazinga Nebukadinezzari bwe yali nga n’afuga Abassiria mu kibuga kyaibwe ekikulu Nineve mu mwaka gwe ogweikumi n’ebiri, mu kiseera n’ekirala ekyo kyabazinga Arifakisadi yali nga n’afuga Abamedi mu kibuga kyaibwe ekikulu Ekubatana. 2Arifakisadi oyo yazimba ekimante eky’amabaale amabaadhe okwezunguluza ekibuga Ekubatana. Ekimante ekyo nga kigheza mita amakumi asatu na itaanu obugungumavu, ate omubiri gwakyo gwagheza mita amakumi abiri na itaanu. Amabaale ge yakizimbisa nga buli irala liri n’omubiri ogugheza mita endala n’ekitundu obugazi, ate mu buleeyi lyagheza mita isatu. 3Buli gha mulyango yaazimbagho ekituuti ekirengererwaku ekigheza mita amakumi ataanu obugungumavu, nga kiri ku musingi ogugheza mita amakumi asatu obugazi. 4Buli mulyango gwali gugheza mita amakumi asatu na itaanu obugungumavu, ng’obugazi gugheza mita amakumi abiri. Emiryango egyo gyali migazi okusobola okubitamu eigye lye lyonalyona ng’abaisirukale be ab’oku bigere bali mu nhiriri dhaibwe.
5Agho kyabazinga Nebukadinezzari yaaja okulwanisa kyabazinga Arifakisadi oyo mu kiketezo eky’oku museetwe ekinene, ekiri kumpi n’ekibuga Ragesi. 6Abantu ab’omu maghanga kamaala beeyimba ku kyabazinga Arifakisadi, nga n’omuli ab’omu biketezo eby’oku nsozi, n’abo abaabanga ku mbali kw’emiiga Eufurate ni Tiguri ni Hidasipe, era n’abo abaabanga mu kiketezo eky’oku museetwe ekyafugibwanga kyabazinga Arioki ow’e Elamu. Batyo abantu ab’omu maghanga kamaala bwe beeyimba okukola eigye ery’Abakaladea.
7Agho kyabazinga Nebukadinezzari ow’e Assiria yaatuma abakwenda eri abantu b’omu Perusia, n’eri abo abaabanga e bugwandhuba mu biketezo Kilikia, Damasiko, Lebanoni, ni Antilebanoni. Yaabatuma n’eri ab’omu biketezo eby’oku nhandha, 8n’eby’e Karumeli, n’eby’e Gileadi, n’eby’oku luuyi olw’omukono omusaadha olw’e buvandhuba olwa Galilaaya, n’eby’Ekiiko ky’e Yezireeli. 9Yaabatuma n’eri ab’omu Samaria n’ebiketezo ebikyezungulwire, n’eri abaabanga ere ng’osomoike omwiga Yorudani, okutuukira irala e Yerusalemu n’e Bethania n’e Kelo n’e Kadeshi n’e Gosheni, ni ku mwiga Kiyira. Yaabatuma ni mu bibuga eby’e Misiri, Tahapanhesi, Raamusesi, Tanisi, 10Menfisi, ni mu biketezo bya Misiri ebindi byonabyona okutuukira irala ku nsalosalo ni Ethiopia. 11Aye abantu ab’omu biketezo ebyo boonaboona tibaafaayo ku bukwenda bwa kyabazinga Nebukadinezzari. Baaloba okumweyimbaku okulwana olutalo, nga bamunhoomerera bati tasobola kulughangula. Kale baaloba kumutya naire, era bairirizaayo abakwenda be nga baswaire, nga bazira ni kye babaghaire naire.
12Ekyo kyasungughaza inho kyabazinga Nebukadinezzari, yaatuuka n’okulayira ati kasinga ekityamo kye eky’obwakyabazinga n’obwakyabazinga bwe bwonabwona bisaanizibwagho, aye nga yeesasuliiza ku bantu b’omu biketezo ebyo byonabyona: eky’e Kilikia, eky’e Damasiko, eky’e Siria, eky’e Moabu, eky’e Ammoni, eky’e Buyudaaya, eky’e Misiri, okuva ku Nhandha Eyaghagati okutuukira irala ku kikono eky’enhandha ey’e Perusia.
13Kyabazinga Nebukadinezzari oyo yaasitula eigye lye mu mwaka ogweikumi n’omusanvu (17) ogw’obufuzi bwe, yaaja okulwanisa kyabazinga Arifakisadi mu lutalo. Era yaamughangula ghalala n’eigye lye lyonalyona, eryalimu abalwani ab’oku bigaali by’omu lutalo n’ab’oku mbalaasi. 14Agho Nebukadinezzari yaanhaga ebibuga bya Arifakisadi oyo yaabifuula bibye. Yaamala yaayolekera ekibuga Ekubatana yaagema ebituuti byakyo ebirengererwaku, yaanhagulula obutale bwakyo era yaayonoonayonoona ekibuga ekyo ekyabonekanga obulungi. 15Yaagemera kyabazinga Arifakisadi mu nsozi edh’omu kiketezo ky’e Ragesi, baamufumita amafumo baamwita. 16Yaamala yairayo e Nineve n’eigye lye lyonalyona, ghalala n’omunhago gwonagwona, baaba mu mbaga nga basagamba okumala emyezi ena.