EKITABO KYA
ISAIA
Enhandhula
Ekitabo kya Isaia baakituuma eriina ly’omulanzi eyamanhikana einho. Omulanzi oyo yaligho mu Yerusalemu okuva agho ng’ekyasa ekyomunaana kiwaaku, Kurisito ng’akaali kwidha.Kurisito ng’akaali kwidha: Mu biseera ebyaligho nga Kurisito akaali kwidha, ebyasa baabibalanga nga baira inhuma, emyaka gyaja nga gikendeera. Ate bwe yamala okwidha baatoolera okubibala nga baja emberi, emyaka gyaja nga gyeyongera obungi ng’oti ni bwetukola mperaano. Ekitabo kino osobola okukyawulamu ebitundu ebikulu bisatu: Ekitundu ekisooka, Enkenga 1–39, kiva mu biseera obwakyabazinga bw’e Assiria obwali obw’amaani bye bwatiisizatiisizaamu obwakyabazinga bwa Buyudaaya obwali ku luuyi olw’omukono omusaadha olw’e buvandhuba. Aye Isaia yabona ng’ekya Assiria okuba ow’amaani ti n’ekyali ekizibu kyenekyene, ekyali eky’okuvaaku akabi ak’okuzikiriza Buyudaaya. Ekizibu kyenekyene kyali kya bantu kukola bibi eri Katonda, n’okumudheemera, era n’obutamwesiga. Kale omulanzi Isaia oyo yaayogera ebibono ebisoononkereza abantu era yaakozesa ebikolwa ebiboneekerera, asobole okweta abantu n’abakulembeze baibwe bakolenga ebituufu nga bajiira ku mazima. Era yaabalabula ati okuloba okutuukiriza ebyo Katonda by’abalagira kuja kubaleetera kuzikirira. Ate yaalanga ekiseera eky’emiraala ekiribaagho mu nsi yoonayoona, n’okwidha kw’omwidhukulu ow’oku lulyo lwa Daudi, aliba kyabazinga ng’aziraku ky’anenezebwa.
Ekitundu ekyokubiri, Enkenga 40–55, kiva mu biseera abantu abangi ku b’omu Buyudaaya bye baabeera mu bunhage e Babilonia, nga bali mu kudaazibwadaazibwa era nga bawoiremu n’eisuubi. Agho omulanzi yaalanga nga Katonda bw’aidha okubatoola mu bunhage abaizeeyo ewaibwe mu Yerusalemu, batoolere okuba mu bulamu obuyaaka. Mu kitundu kino ekyokubiri twagaanamu n’obukwenda obwoleka nga Katonda n’aleetera ebintu okuja nga bibaagho mu byafaayo by’abantu, era yaategekera abantu be Abaisiraeli babe batume eri amaghanga agandi goonagoona, gasobole okugheebwa enkabi nga gabita mu abo. Ebindi ku bibono eby’omu kitundu kino ekyokubiri ebimanhiibwa einho mu Ndagaano Enkaire, n’ebyo ebyogera ku “Mugheereza wa Musengwa.”
Ekitundu ekyokusatu, Enkenga 56–66, kisinga kwogera ku bantu abaira mu Yerusalemu okuva mu bunhage. Kyali nga kyetaagisa okubagumya n’okubakakasa nti Katonda yali aidha kutuukiriza bye yasuubiza eighanga lye Isiraeli. Abantu baakubirizibwa okukolanga ebituufu nga bajiira ku mazima, okukuumanga Sabbato, okughangayo emisengo eri Musengwa Katonda, n’okumusinzanga. Ebindi ku bibono eby’omu kitundu kino ekyokusatu ebimanhiibwa einho mu Ndagaano Enkaire, n’ebyo ebiri mu 61:1-2 Musengwa waife Yesu Kurisito bye yadhuliza nga yaakatoolera okwegeresa, n’ayoleka nga bweyatumibwa Katonda.
Ebirimu nga bwe biiraganwaku
Okulabula n’okusuubiza 1:1—12:6
Amaghanga gabonerezebwa 13:1—23:18
Katonda asalira ensi omusango 24:1—27:13
Okwongera okulabula n’okusuubiza 28:1—35:10
Kyabazinga Hezekia owa Buyudaaya n’Abassiria 36:1—39:8
Obukwenda obw’okugumya abantu n’okubaizaamu eisuubi 40:1—55:13
Okulabula n’okusuubiza 56:1—66:24