56
Abantu ba Musengwa Katonda baliva mu maghanga goonagoona
1Musengwa Katonda akoba abantu be ati: “Mukolenga amazima n’obutuufu, kuba ndi kumpi kwidha okubalokola, era ndholeke nga ninze mbawonia ebizibu byaimwe. 2Ndigha enkabi abo abakuuma Sabbato buliidho ni batagyonoona, era naagha enkabi abo abeekuuma ni batakola bibi.”
3Omugwira eyasenga mu bantu ba Musengwa Katonda, atakobanga ati: “Nze bwenebwene Musengwa Katonda aidha kumboola mu bantu be.” N’omulaawe, olw’obutasobola kuzaala baana, atakobanga ati: “Bona, nze ndi ng’oti bwa muti mukalu.” 456:4, 5: Mag 3:14, 15 Musengwa Katonda akoba abantu abo ati: “Omulaawe akuuma Sabbato dhange, n’asalagho okukolanga bye nsiima, era ni yeekalangula ku ndagaano yange, 5ndireetera eriina lye okwidhukirwanga buliidho mu isinzizo lyange ni mu bantu bange aghazira kwerabirwa naire, okusinga bwe yandibaire azaire abaana abalenzi n’abaghala.”
6Ate eri abagwira abaasenga mu bantu ba Musengwa Katonda, ni bagheereza Musengwa Katonda oyo nga bamugonza, ni beekalangula ku ndagaano ye, era ni bakuuma Sabbato dhe ni batadhoonoona, Musengwa Katonda abakoba ati: 756:7: Mat 21:13; Mar 11:17; Luk 19:46 “Ndibatwala ku Sioni olusozi lwange olutukuvu, naabagha eisanhu mu ndhu yange ey’okusinzizaamu. Ebigheebwayo byaibwe ebyokebwa n’emisengo gyaibwe ndibiikiriza ku alutaari yange, kuba endhu yange enaayetebwanga ndhu ya kusinzizaamu ab’amaghanga goonagoona.”
8Musengwa Katonda, oyo asoloza abantu be Abaisiraeli abaabingibwa mu nsi yaibwe, akoba ati alisolozaayo n’abandi, boona baidha beeyongera ku abo abaamala eira okusolozebwa.
Abakulembeze ba Isiraeli bavumirirwa
9Musengwa Katonda era akoba ati: “Imwe mwenamwena amaghanga ag’endha mwidhe muzikirize abantu bano ng’oti n’ensolo edh’omu nsiko bwe dhizikiriza. 10Abakulembeze b’abantu bange bali ng’oti batulu beene. Tibakaalimu magezi, bali ng’oti n’embwa edhitaboigola. Baba mu kuwongera, na mu kutenduka ndoolo, na mu kuloota. 11Bali ng’oti mbwa edh’amairu amangi, edhitaiguta naire. Abakulembeze abo tibakaalimu kategeera, buli muntu yeefubiriire ku bibye, nga yeenooneza by’anaafunamu amagoba. 12Bakobagana bati, ‘Mwidhe tufuneyo ku mwenge ogw’emizabbibu tunhweku. Ka twerenge ebitamiiza, n’olwaidho lwona lwidha kuba ng’oti n’olwaleero, era n’okulusingaku.’ ”