4
Omusango Musengwa Katonda gw’alumiriza Abaisiraeli
1Imwe Abaisiraeli muwulire Musengwa Katonda by’akoba.
Ghaligho omusango gw’ali kulumiriza abantu ababa mu nsi eno,
kuba abantu b’omu nsi eno ti beesigwa era ti ba kisa,
waire okutya Katonda.
2Balayira bye bataatuukirize, balimba, batemula, baiba, era baakola obwenzi.
Okwiza emisango kweyongera bweyongere, era obutemo bubaagho buli kiseera.
3Kale ni ensi eno erikala,
na buli kiramu ekigiriku kyafa.
Ensolo edh’omu nsiko,
n’enhonhi edhiguluka,
n’ebyenhandha, byonabyona birifa.
Musengwa Katonda alumiriza bakabona omusango
4Musengwa Katonda akoba ati:
“Ghatabaagho alumiriza bantu musango
waire okubanenia,
kuba imwe bakabona niimwe be ndi kulumiriza.
5Imwe bakabona mugwa mu nsobi
omusana n’obwire,
n’abalanzi boona baakola n’ekirala
ng’oti niimwe.
Kale ni ndizikiriza Isiraeli inhaimwe.
6Abantu bange bazikirira olw’okuba
tibandidhi nze.
Imwe bakabona mwaloba okuumanha nze,
kale ni zeena ndibaloba okuba bakabona bange.
Era nga bwe mwerabira amateeka gange
nze Katonda waimwe,
zeena nja kwerabira abaana baimwe.
7Imwe bakabona ye mukoma okweyongera
okuba abangi,
ye mukoma n’okweyongera okwonoona ye ndi.
Kale ni ndibaleetera okuswazibwa
mu kifo eky’okuteebwamu ekinhagansi.
8Mufuuka bakombe olw’ebyo ebigheebwayo
abantu bange ku lw’ebibi byaibwe,
kyemuva mwenda inho beeyongere
okwonoona.
9Ekibonerezo abantu kye balifuna,
mwena bakabona kye mulifuna.
Ndibabonereza olw’engeri dhaimwe embi,
naabeesasuulizaaku olw’ebikolwa
byaimwe ebibi.
10Baliryanga era baalyanga aye nga tibaiguta.
Era balikolanga obwamalaaya obw’omu masabo aye nga tibazaalagana naire;
kuba banvaaku nze Musengwa Katonda baira ku kusinza bakatonda abandi.”
Musengwa Katonda avumirira okusinza ebitali Katonda
11Musengwa Katonda akoba ati:
“Omwenge omusu n’oguwoze,
gumala mu bantu bange okutegeera.
12Beebuuza ku bintu ebyakolebwa mu muti obuti.
Omwigo obwigo n’ogubakobera bye benda okumanha.
Bali ng’oti mukazi mwenzi: banvaaku nze Katonda waibwe,
baadaaliima, baaja baasinza bakatonda abandi.
13Baghaayo emisengo ku ngulu okw’ensozi enene,
baaghaayo ebigheebwayo ku busozi obutono, ni ghansi gh’emiti emikologho emizibirivu,
kuba ebinsense byagyo birungi.
Baghala baibwe kyebava ni bakola obwamalaaya,
ni bakazi baibwe ni bakola obwenzi.
14Tiribonereza baghala baimwe nga bakoze obwamalaaya,
waire okubonereza bakazi baimwe nga bakoze obwenzi;
kuba n’imwe abasaadha beene muja n’abakazi bamalaaya ab’omu isabo,4:14: abakazi bamalaaya ab’omu isabo: Bano baayagaanibwanga mu masabo ag’Abakanaani, nga kirowoozebwa nti omuntu bw’aba nabo mu buliri, ng’olwo enimiro dhe dhibaza inho, n’ebyayo bye byeyongera obungi.
era mwabeeyimbaku mwaghaayo emisengo.
Kale ni abantu abatategeera balizikirira.
15Waire nga imwe Abaisiraeli timuli beesigwa ye ndi,
Abayudaaya bagwananga baaloba kugwa mu nsobi eyo.
Mutajanga kusinziza mu Giligali
waire okusinziza mu Bethaveni.4:15: Bethaveni: Kino kitegeeza “endhu ey’ebibi.” Ghano, eryo n’eriina omulanzi ly’ali kutuuma ekifo ekyetebwa “Betheli,” ekitegeeza “endhu ya Katonda.” 10:8
Era mutalayiranga muti, ‘Nga Musengwa Katonda bw’ali omulamu.’
16Abaisiraeli bamagalavu ng’oti nte nto.
Kale nze Musengwa Katonda nnaasobola ntya
okubaliikiza mu kyayiro ekigazi,
ng’omuntu bw’aliisa entaama ento?
17Ebisinzibwa ebitali Katonda bipaaziiza Abaisiraeli.
Kale ka basigale batyo.
18Bwe bamala okutamiira beemalira mu bwenzi;
baasanhukira ebibaswaza, okusinga ebyo ebibateesaamu ekinhagansi.
19Empewo eribawungula yaaja nabo,
era ensoni dhiribagema olw’emisengo gye baghaayo mu kusinza ebitali Katonda.”