EMBALUWA ERI
ABAHEBURAYI
Enhandhula
Embaluwa eyaghandiikirwa Abaheburayi eri n’ekigendererwa kya kugumya ekikunsu eky’Abakurisito abaali boolekaine n’okutakanizibwa okw’amaani ate okwajanga bwe kweyongera, nga basobola n’okugwa mu kabi ak’okulekera agho okwikiriza mu Kurisito. Eyagighandiika akubiriza Abakurisito obutawaamu maani mu kwikiriza kwaibwe, ng’abakobera nga Yesu Kurisito bw’ayoleka Katonda eri abantu mu butuufu bwene. Mu kukola ekyo, omughandiisi ata amaani mu nsonga enkulu isatu: (1) Yesu n’Omwana wa Katonda ebyanda n’ebyanda. Yesu ono yayega okuwulira Ise mu buwulize bwenebwene, olw’okweghaayo kwe mu kudaazibwadaazibwa okunene kwe yagumira. Yesu ng’Omwana wa Katonda, asinga abalanzi boonaboona aboogerwaku mu Ndagaano Enkaire, yaasinga bamalaika boonaboona era yaasinga ni Musa mwene. (2) Katonda yalangirira Yesu okuba kabona ebyanda n’ebyanda, ng’asinga bakabona boonaboona aboogerwaku mu Ndagaano Enkaire. (3) Omuntu yeenayeena ali na kwikiriza Yesu oyo, memale yaalokolebwa okuva mu kibi, mu kutya, ni mu kufa. Yesu, ng’Omukulu wa Bakabona, n’agha okulokolebwa kwene okwakingirizibwanga emironso n’okughaayo ensolo ng’emisengo mu ndhikiriza ey’Ekiyudaaya.
Omughandiisi w’Embaluwa eno aleeta amaina ag’abantu abamanhiibwa einho mu byafaayo bya Isiraeli ng’eby’okuboneraku, olw’okukubiriza abagisoma basigale nga bakaali mu kwikiriza kwaibwe. Abantu abo baagaanibwa mu nkenga eyeikumi n’endala, era baali n’okwikiriza okw’amaani. Ate mu nkenga eyeikumi n’eibiri, omughandiisi akubiriza abagisoma okuta amaiso gaibwe ku Yesu yenka, bagumire kiisi kudaazibwadaazibwa era na kiisi kukirigibwa ebibaidhira, olwo basigale nga bakaali mu kwikiriza okutuusa ku nkomerero. Embaluwa efundikira n’okugha amagezi era n’okulabula.
Ebirimu nga bwe biiraganwaku
Enhandhula: Kurisito n’ayolekera irala ki Katonda ky’ali 1:1-3
Kurisito asinga bamalaika mu byonabyona 1:4—2:18
Kurisito asinga Musa ni Yoshua mu byonabyona 3:1—4:13
Obwakabona bwa Kurisito businga obundi bwonabwona 4:14—7:28
Endagaano ya Kurisito esinga edhindi dhoonadhoona 8:1—9:22
Kurisito kye yaghaayo ng’omusengo kisinga ebindi byonabyona 9:23—10:39
Okwikiriza n’okukulembera byonabyona 11:1—12:29
Okusiimya Katonda 13:1-19
Okusaba okufundikira 13:20-21
Ebibono ebisembayo 13:22-25