5
1Kiisi Mukulu wa Bakabona alondebwa mu bantu, era ateebwagho okugheereza Katonda ku lwaibwe. Aghaayo ebigheebwayo, n’emisengo ye Katonda olw’ebibi byaibwe. 2Asobola okugema empola abo abadaaliima olw’obutamanha, kuba yeena mwene munafu mu bintu kamaala. 3Era olw’obunafu obwo ateekwa okughaayo emisengo olw’ebibi bye, n’olw’ebibi eby’abantu abandi.5:3: Lev 9:7 4Era omuntu tasobola kwegha mwene kitiisa ekyo kya kuba Kabona Mukulu. Aye ayetebwa bwetebwe Katonda ng’oti ni Aaroni bwe yayetebwa.5:4: Kuv 28:1
5Mu nsambo n’endala Kurisito tiyeegha yenka kitiisa kya kuba Mukulu wa Bakabona, aye kyamugheebwa Katonda eyamukoba ati:5:5: Zab 2:7
“Iwe oli Mwana wange,
olwaleero nkuzaire.”
6Ate era akoba aghandi ati:5:6: Zab 110:4
“Iwe oli kabona ebyanda n’ebyanda,
nga Melekizedeki bwe yali.”
7Yesu mu bulamu bwe obw’oku nsi kuno, yayogerera ghaigulu mu kusaba kwe, era yaalira n’amaziga nga yeeghemba Katonda, eyali nga n’asobola okumuwonia okufa. Era olw’okutya Katonda okwo kwe yali nakwo, Katonda yamuwulira.5:7: Mat 26:36-46; Mar 14:32-42; Luk 22:39-46 8Waire yali Mwana wa Katonda, yayega obuwulize olw’okudaazibwadaazibwa kwe yabitamu. 9Era ng’amaze okutuukirizibwa, abo boonaboona abamugondera yabafuukira ensimuko ey’obulokozi obutawaagho, 10era Katonda yaamufuula Omukulu wa Bakabona ng’oti ni Melekizedeki bwe yali.
Okulabula
11Tuli n’ebintu kamaala eby’okwogera ku nsonga eno, aye nga bizibu okwinhonhola, kuba mulwagho okutegeera. 12Waire nga buti mwandibaire nga muli beegeresa, aye ate mukaayenda omuntu okubeegeresa ebyo ebiinhamirwaku mu kwega ekibono kya Katonda. Mukaayenda mata buta ng’oti n’abaana abato, mu kifo ky’emere yeene.5:12-13: 1 Kor 3:2 13Kiisi anhwa amata obuta, aba akaali mwana muto ataghanga kwawulagho kituufu na kikyamu. 14Aye emere yeene n’ey’abantu abakulu abamaze okwega olw’ebyo bye babitamu, era ni basobola okwawulagho ekirungi n’ekibi.