4
1Kale ni ng’ekisuubizo eky’okutuuka aghali okuwuumula bwe kikaaligho, tufengayo okubona nga tighabaagho muntu yeenayeena ku imwe alemwa kutuukagho. 2Kuba twena twawulira Amawulire Amalungi ng’oti ni beene bwe baagawulira. Aye bye baawulira tibyabaganhula, kuba byabaagaana nga baziramu kwikiriza. 3Ife abaikiriza niife abatuuka aghali okuwuumula, nga bwe yakoba ati:4:3: Zab 95:11
“Nasungughala era neefuugha nti,
‘Tiribaganha kutuuka ghe nali nja kubagheera kuwuumula.’ ”
Yakoba kino waire ng’emirimo gye gyali nga gyawa, bwe yamala okutonda ensi.
4Ghaligho mu byaghandiikibwa olunaku olwomusanvu ghe lwogerwaku luti: “Era Katonda yawuumula ku lunaku olwomusanvu nga amaze emirimo gye gyonagyona.”4:4: Mainh 2:2 5Era kabiri kyene kino eky’okuwuumula kyogerwaku kiti: “Tiribaganha kutuuka ghe nali nja kubagheera kuwuumula.”4:5: Zab 95:11 6Abo abaasooka okuwulira Amawulire Amalungi, tibaatuuka ku kuwuumula okwo, olw’obutaikiriza bwaibwe. Ghaligho niini abandi abatuuka. 7Kino kiri kityo kuba era Katonda yataagho olunaku olundi olwetebwa “Olwaleero” lw’ayogeraku nga ghabiseegho emyaka kamaala ng’abita mu Daudi, nga bwe mmaze okukyogeraku ng’akoba ati:4:7: Zab 95:7-8
“Olwaleero bwe muwulira eiroboozi lye,
mutakalangusa myoyo gyaimwe.”
8Nguli Yoshua yabatuusa aghali okuwuumula, Katonda ti yandyogeire ku lunaku lundi kabiri.4:8: Ma 31:7; Yosh 22:4 9Kale ni abantu ba Katonda bakaaliyo n’okuwuumula ng’okwa Katonda okw’olunaku olwomusanvu. 10Kuba kiisi atuuka ku kuwuumula Katonda kwe yasuubiza, awuumula mu mirimo gye oti ni Katonda yeena bwe yawuumula ng’amaze egigye.4:10: Mainh 2:2 11Agho ni tufaabiikane okutuuka ku kuwuumula okwo, ghalobe kubaagho agwa olw’obutaikiriza nga bale.
12Ekibono kya Katonda kiramu, kikola era kyogi okusinga empiima eri n’obwogi ku ndhuyi dhaayo dhombi. Kisalira irala kyatuuka n’okwawula omutima n’omwoyo, obuyungiro n’omusokono. Kisobola okubonera irala omuntu by’alowooza ni by’ayenda, ebiri mu mwoyo gwe. 13Ghazira kitonde kisobola kugisibwa mu maiso ge. Ebintu byonabyona mu maiso ge byerule era biboneka. Era y’oyo buli muntu aja kwewozaaku kiisi kye yakola.
Yesu Kabona Omukulu
14Kale nga bwe tuli n’Omukulu wa Bakabona omukologho atyo, Yesu Omwana wa Katonda, eyajiira irala ye Katonda, tukalangukire ku kwikiriza kwaife kwe twatula. 15Omukulu wa Bakabona oyo ye tuli naye, n’oyo afaayo okutusaasira mu bunafu bwaife, era n’oyo eyalebwa mu buli nsambo ng’oti niife bwe tulebwa aye n’atakola kibi kyonakyona. 16Kale ni tuseete kumpi n’ekityamo eky’ekisa kya Katonda nga tuli bagumu, memale atusaasire era atugemerwe ekisa kiisi lwe tuba nga twetaaga okubeerwa.